گه‌ڕان

Shadow Shadow
سیاسه‌تی

هۆکارى دواکەوتنى ڕاگەیاندنى لێکۆڵینەوە لە تەقینەوەکەى ناو بارەگایەکى پێشمەرگە ئاشکراکرا

2020.10.07 - 14:59
App store icon Play store icon Play store icon
هۆکارى دواکەوتنى ڕاگەیاندنى لێکۆڵینەوە لە تەقینەوەکەى ناو بارەگایەکى پێشمەرگە ئاشکراکرا

ناس کورد-

بەرپرسانى باڵاى هێزەکانى یەکەى حەفتاى یەکێتى هۆکارى ڕانەگەیاندنى ئەنجامى لێکۆڵینەوە لە تەقینەوەی ناو بارەگایەکى ئەو هێزە لە تاسڵوجە دەگەڕێننەوە بۆ تەواونەبوونى ڕاپۆرتى لیژنەى تایبەتمەند و دەڵێن، پێدەچێت ڕاگەیاندنى ئەنجامەکە بکەوێتە هەفتەى داهاتووەوە.

کەناڵی ناس کورد لە تێلیگرام جۆین بکە   

 

مستەفا چاوەڕەش، فەرماندەى هێزەکانى یەکەى حەفتاى یەکێتى (7 تشرینى یەکەمى 2020) بە ناس کوردى ڕاگەیاند، "بەپێى لێکۆڵینەوەى بەرایى کە تەواو بووە ڕوداوەکە ئاسایى بووە و زیانێکى ئەوتۆى نەبووە، کەرەستە سوتاوەکان کۆکراونەتەوە و ئامادەباشیش بۆ دووبارە نەبوونەوەى وەرگیراوە".

 

لاى خۆشیەوە ئەحمەد لەتیف، وتەبێژى هێزەکانى حەفتاى یەکێتى بەناس کوردى ڕاگەیاند، هێشتا ڕاپۆرتى لیژنەى پسپۆڕانى تەقینەوە لەسەر ڕوداوەکە تەواو نەبووە و سەرقاڵى پرسەکەن، بەڵام ئەوانەى کە شارەزاییان لەباڵەخانە و کارەبا هەیە چوونەتە شوێنى ڕوداوەکە و کێشەیەکى ئەوتۆیان نەبینیوە.

 

ئاماژەى بۆ ئەوەشکرد، ئەو تیمەى کە پێیدەڵێن "ئەلیف کاف"، ڕاپۆرتى ئەوان زیاتر بەهەند وەردەگیردرێت و پێدەچێت لەهەفتەى داهاتوودا ڕاپۆرتەکەیان تەواو بێت و ئەوانیش دواى تەواوبوونى بۆ ڕاى گشتى ئاشکراى دەکەن.

 

تەقینەوەکە پێشنیوەڕۆی (6ی تشرینی یەکەمی 2020)  ڕویدا لە کۆگایەکی چەک و تەقەمەنی هێزەکانى 70ى پێشمەرگە لە تاسڵوجە.  

 

ئەو کاتە مستەفا چاوڕەش (6ی تشرینی یەکەمی 2020) بە ناس کوردى ڕاگەیاندبوو، "لێکۆڵینەوە لە تەقینەوەکە بەردەوامە و هێشتا هۆکارەکەى نازانرێت، لیژنەى لێکۆڵینەوە پێکهێنراوە و سبەینێ ئەنجامەکەى ڕادەگەیەنرێت".