گه‌ڕان

Shadow Shadow
سیاسه‌تی

میلیشیایەكی عێراقی هۆكاری ڕاگرتنی هێرشە موشەكییەكان ئاشكرا دەكات

2020.10.07 - 14:46
میلیشیایەكی عێراقی هۆكاری ڕاگرتنی هێرشە موشەكییەكان ئاشكرا دەكات

ناس کورد-

وتەبێژ بەناوى میلیشیای "کەتائیب سەید شوهەدا"ى عێراق ڕایگەیاند، هۆکارى کەمبوونەوەى هێرشە موشەکییەکان پەیوەندى بە هەماهەنگى نێوان گروپە سەرەکییەکانى "بەرگرى" و گروپە نوێیەکان هەیە کە هاتونەتە ریزى بەرەنگارى "داگیرکەرەوە".

 

كازم فەرتوسى لە لێدوانێكدا بۆ ڕۆژنامەی "العربي الجدید" نزیك لە دەوڵەتی قەتەر (7 تشرینى یەکەمى 2020) ڕایگەیاندووە، کەمبوونەوەى هێرشە موشەکییەکان لەم ڕۆژانەى دواییدا هیچ پەیوەندییەکى بە فشارى ئەمریکا و ڕێوشوێنە ئەمنییەکانی حکومەتەوە نییە، بەڵکو هۆکارەکەى ڕێککەوتن و دروستکردنی هەماهەنگی نێوان گروپە سەرەکییە بەرهەڵستاکارەکان (مقاوەمە) و گروپە نوێیەکانی ترە کە دەیانەوێت بەرەنگای ئەمریکا ببنەوە.

 

لەدواى هەڕەشەکەى ئەمریکا بۆ داخستنى باڵیۆزخانەکەى لەبەغدا هێرشە موشەکییەکان روویان لەکەمبوونەوە کردووە، بەراورد بە پێشتر کە بەشێوەى نیمچە رۆژانە هێرشى لەو شێوەیە ئەنجامدەرا.

 

لەو کاتەوە عێراق هەوڵەکانى چڕکردووەتەوە بۆ کۆتایی هێنان بە هێرشەکان و لێکۆڵینەوەى دەستپێکردووە بۆ دەستگیرکردنى ئەنجامدەرانى.

 

رۆژنامەى شەرقولئەوسەت (6ی تشرینی یەکەمی 2020) بڵاویکردەوە، مستەفا كازمی پاڵپشتی وەرگرتووە بۆ لێپیچینەوە لە 16 میلیشیای چەكدارى تۆمەتبار بە ئەنجامدانى هێرشە موشەکییەکان.  


بەڵام سەكۆ ئەلیكترۆنییەكانی میلیشیا چەكدارەكانی نزیك لە ئێران لە عێراق بڵاویانكردەوە كە بلاسخارت پەیامێكی ئیدارەی ئەمەریكای گەیاندووە بە ئەبو فدك بۆ ئاگربەستێكی دوو مانگە.

 

لەمبارەیەوە ماڵپەڕی "ئەلترا عێراق" و سەكۆی "صابرین نیوز" لە ئاشكراكردنی ئامانجی سەردانی جنین بلاسخارت، نوێنەری نەتەوە یەكگرتووەكان بۆ بارەگای حەشدی شەعبی، هەندێ شیكار و زانیارییان بڵاوكردووەتەوە كە "ناس كورد" بەدواداچوونی بۆ كردووە (4 تشرینی یەكەمی 2020) و ئاماژە بەوە دەكات، ئیدارەی ترەمپ لە دوا مانگی ویلایەتی خۆیدا پێشنیازی كردووە بۆ میلیشیاكانی هەڵگری ناوی حەشدی شەعبی، هێرشكردنە سەر بەرژەوەندییە ئەمەریكییەكان لە عێراق بۆ ماوەی 60 ڕۆژ ڕاگرن.

 

زیاتر بخوێنەوە: راپۆرتەكان: ئاگربەستێكی 60 رۆژی لە نێوان میلیشیاكانی عێراق و ئەمەریكا



ئەم زانیارییانە كە سەرچاوەكانیان میلیشیاكانن ئاماژەیان بەوە نەكردووە ڕاگرتنی هێرشەكان لەپای چی دەبێت و ئەمەریكا چ گفتێك دەدات لە بەرامبەردا، بەڵام ئەوە تێبینی كراوە لە دوای سەردانەكەی بلاسخارت، هیچ هیرشێك لە بەغداو دەوروبەری ئەنجام نەدراوە.