گه‌ڕان

Shadow Shadow
سیاسه‌تی

هۆشدارییەک لە تەندروستییەوە: زۆربەى توشبووانى پەتاى وەرزى توشى کۆرۆنا بوون

2020.10.06 - 15:36
App store icon Play store icon Play store icon
هۆشدارییەک لە تەندروستییەوە: زۆربەى توشبووانى پەتاى وەرزى توشى کۆرۆنا بوون

ناس کورد-

بەرپرسێکى تەندروستى سلێمانى هۆشداریدەدات لەوەى، ئەگەر هەیە هۆکارى بەربڵاوى پەتاکانى ئێستا، توشبوون بێت بە کۆرۆنا نەک پەتا وەرزییەکانى دیکە، بۆیە پێویستە خەڵک پشکنین بکەن.

 

کەناڵی ناس کورد لە تێلیگرام جۆین بکە   

یاد نەقشبەندى، وتەبێژى تەندروستى سلێمانى (6ی تشرینی یەکەمی 2020) بە ناس کوردى ڕاگەیاند "بەشێکى زۆرى خەڵک لەم وەرزەدا کە نەخۆشدەکەوێت پێیوایە توشى پەتاى وەرزى بووە، لەکاتێکدا رەنگە بەشى زۆرى کۆرۆنا بێت".

 

وتیشى "ئەو کەسانە رەنگە سەرەتا کۆکە و چەند نیشانەیەکى سوکیان هەبێت و پێیانوایە پەتاى وەرزییە، بۆیە سەرەتا ناچنە نەخۆشخانە، کاتێک دۆخیان زۆر خراپ دەبێت دەچن ئەوکاتیش چارەسەرکردنى قورسە و شوێنیش لە نەخۆشخانەکان دەگرن".

 

نەقشبەندى باسى لەوەشکرد، نیشانەکانى پەتاى وەرزى هاوشێوەى کۆرۆنایە، بۆیە هاووڵاتى خۆى ناتوانێت جیاى بکاتەوە دەبێت سەردانى پزیشک بکات بۆ ئەوەى پشکنینى پێوست بکات.

 

جەختیشیکردەوە، ئەوەى ئەگەرەکەى زیاتر کردووە کە رەنگە زۆربەى هۆکارى پەتاى ئێستا کۆرۆنا بێت، هەڵکشانى ئامارى مردنە، چونکە مردنى 40 کەس لە پێنج رۆژدا لە سلێمانى زۆرە و پەتاى وەرزى نییە.

 

وەزارەتى تەندروستیی هەرێم (30ی تشرینی دووەمى 2020) داواى لە هاوڵاتیان کرد لەگەڵ هاتنى وەرزى پایز وریاتربن و زیاتر خۆیان بپارێزن بۆ ئەوەى ئامارى توشبووانى کۆرۆنا ڕوو لە دابەزین بکات.  

  

ئاسۆ حەوێزى، وتەبێژى وەزارەتەکە بە ناس کوردى ڕاگەیاند، "لەگەڵ هاتنى وەرزى پایز نەخۆشییە ڤایرۆسییەکان زیاتر دەبێت کە هاوکاتە لەگەڵ بەردەوامى بڵاوبوونەوەى کۆرۆنا، بۆیە ئەگەرى توشبوون زیاتر دەبێت".  

  

وتیشى، "هەڵکشانى ئامارەکانى کۆرۆنا پەیوەندى بەچەند هۆکارێکەوە هەیە کە دیارترینیان هاتنى پایزە کە وەرزێکى لەبارەى بۆ پەتا، توشبوون بەپەتاش سیستەمى بەرگریی جەستە لاواز دەکات و وادەکات خەڵک ئاسانتر توشى کۆرۆنا بن".  

  

ئاسۆ حەوێزى جەختیکردەوە، لەگەڵ هەڵکشانى ئامارەکان، داکشانیش هەیە و پێویستە هاوڵاتییان زیاتر پابەندبن بە ڕێنماییە تەندروستییەکانەوە.  

  

ڕونیشیکردەوە "لەناو هەموو رێنماییەکاندا بەستنى ماسک زۆر گرنگە، تەنانەت هەندێ توێژینەوە بە چارەسەر دایدەنێن".  

  

ئاسۆ حەوێزى ئەوەشى خستەڕوو، وەزارەت خۆى ئامادەکردووە بۆ بەرەنگاربوونەوەى ڤایرۆسە لەوەرزى پایزدا، بۆ ئەو مەبەستەش هەڵمەتێکى هۆشیارکردنەوەى هاوڵاتیانیان دەستپێکردووە.