گه‌ڕان

Shadow Shadow
سیاسه‌تی

ناتانیاهۆ هۆشداری لە تەقینەوەیەکی دیکەی کارەساتبار لە بەیروت دەدات

2020.10.01 - 22:32
ناتانیاهۆ هۆشداری لە تەقینەوەیەکی دیکەی کارەساتبار لە بەیروت دەدات

ناس کورد-

لەمیانەى پیشکەشکردنى وتارێکدا لەکۆمەڵەى گشتى نەتەوە یەکگرتووەکان، سەرۆک وەزیرانى ئیسرائیل شوێنى کارگەیەکى دروستکردنى موشەک و گەنجێنەى تەقینەوەکانى حزبوڵاى لوبنانى لەناوچەیەکى بەیروت بەبەڵگەوە پیشاندا.

 

ناتانیاهۆ هەوڵى دا ڕاستەوخۆ وتەکانى ئاڕاستەى دانیشتوانى شاری بەیروت بکات، ئەوەش لەرێگەى پیشاندانى وێنەى مانگە دەستکردەکانەوە و ئەوەشى ڕاگەیاند، دەیەوێت ئەوەیان پیشانبدات کە ئەو کارگەیە تایبەتە بە حزبوڵا و ئەوەش کۆمپانیایەکى گاز و گەنجێنەى تەقینەوە و موشەکەکانیانە.



ناتانیاهۆ وتیشى: "بەخەڵکى عەنیزە دەڵێم هەوڵێک بدەن و لەسەرتان پێویستە لەسەر ئەو کارە ناڕازى بن، چونکە گەر ئەو موشەک و کەرەستانە بتەقێنەوە جارێکى تر کارەسات ڕوودەداتەوە." 



هەر لەمیانى وتەکانیدا، ناتانیاهۆ جەختى لەسەر ئەوەشکردەوە کە وڵاتەکەى هەڕەشە نیە بۆ سەر خەڵکى لوبنان، بەڵکو ئەوە ئێرانە هەڕەشەیە .

 

بەگوێرەى ڕۆژنامەى واشنتۆن ئەکزامینەر، حەسەن نەسروڵا ئەمیندارى گشتیى حزبوڵاى لوبنان وەڵامى ناتانیاهۆى داوەتەوە و داواى لەڕۆژنامەنوسان کردووە بۆ ڕاست و درۆستى ئەو تۆمەتانە بچنە ناوچەکە و بەدواى گەنجینەى چەک و تەقەمەنیدا بگەڕێن.

 

ڕۆژنامەکە باسى لەوەشکردووە ڕۆژنامەنوسان چوونەتە ناوچەکە، بەڵام هیچ شوێنەوارێکى چەک و تەقەمەنى و بۆمبیان نەدۆزیوەتەوە، بەوتەى ڕۆژنامەکە پیش گەیشتنى ڕۆژنامەکە بەو ناوچەیە حزبوڵا چەک و تەقەمەنیەکانى شاردووەتەوە.