گه‌ڕان

Shadow Shadow
سیاسه‌تی

پەیامێکی ’’توند و بەپەلە’’ لە سەدرەوە بۆ گروپە چەکدارەکان

2020.09.30 - 12:00
پەیامێکی ’’توند و بەپەلە’’ لە سەدرەوە بۆ گروپە چەکدارەکان

ناس کورد-

موقتەدا سەدر پەیامێکى توند ئاڕاستەى گروپە چەکدارەکان دەکات و هۆشداری دەدات کە چەکەکانیان نەگۆڕن بەرەو ئامانجگرتنى گەل.

 

سەدر ئەمڕۆ چوارشممە، 30ی ئەیلولی 2020، لە پەیامێکدا بۆ "گروپەکانى بەرگریى (مقاوەمە)" کە لەهەژمارى خۆى لە تویتەر بڵاویکردووەتەوە نوسیویەتى، "پارێزگارى لە ناوبانگى بەرگرى و جیهاد بکەن و وەک خۆى بە عێراقى بیهێڵنەوە، نەبەرگرى ڕۆژهەڵات نە ڕۆژئاوا".

 

سەدر دەشڵێت، "من یەكەم كەس بووم دروشمی بەرەنگاربوونەوەی ئەمەریكام بەرزكردەوە، زۆربەتان لەژێر و فەرمانی ئاڵای مندا شەڕی داگیركەرتان كردووە، ئێستا گومان لە جیهاد و بەرهەڵستكاری من دەكەن؟؟".

 

جەختیشیکردووەتەوە، بۆیە پێویستە جیهاد نەگۆڕن بۆ سیاسەت و رووى چەکەکانیان ئاڕاستەى گەل نەکەن و نەیانخەنە بەردەم جەنگ و بۆردومانەوە "موقاوەمە مەكەنە مقاولات و خەڵكی خۆتان مەكوژن".

 

ئاماژەى بەوشکردووە "با پێكەوە كاربكەین بۆ كۆتاییهێنان بە بڵاوبوونەوەی هێزە سەربازییەكانی ئەمەریكا و بەیاساییكردنی باڵیۆزخانەكەی یەكەمجار بەڕێگای پەرلەمان و نێودەوڵەتی."

 

"ئەگەر ڕازی نەبوون ئەوە هەموو گەلی عێراق لەژێر چاودێری مەرجەعە گەورەكانمان بەرهەڵەستیان دەكەین پێكەوە نەك تاك تاك،" سەدر وا دەڵێت.

 

عەدنان فەیحان، هاوكات سەرۆكی عەسایب لە پەرلەمانی عێراق ڕایگەیاند، ئەگەر خشتەی كشاندنەوەی سوپای ئەمەریكا لە عێراق دانەنرێت ئەوە دەیانكەنە ئامانج و بڕیاری دەركردنی بیانییەكانیش سوپای توركیا دەگرێتەوە.


فەیحان كە سەرۆكی لیستی "صادقون"ی سەر بەبزوتنەوەی عەسایبی قەیس خەزعەلییە لە پەرلەمانی عێراق (15 كورسی) لە بەرنامەی "العاشرة" ی كەناڵی ئەلعێراقییەی فەرمیدا كە ناس كورد بەدواداچوونی بۆ كردووە ڕایگەیاند، "ئەگەر سوپای ئەمەریكا نەكشێتەوە ئەوە وەك داگیركەر مامەڵەیان لەگەڵدا دەكەین و دەیانكەینە ئامانج."

فەیحان وتیشی، حكومەتی ئێستا لەسەریەتی بڕیاری پەرلەمان بۆ دەركردنی هێزە بیانییەكان جێبەجێ بكات كە نۆ مانگ بەسەر دەرچوونیدا تێپەڕیوە، وتیشی، "ئەو بڕیارە هێزەكانی توركیاش دەگرێتەوە".