گه‌ڕان

Shadow Shadow
سیاسه‌تی

تەندروستیی هەرێم هۆشداری لە ’’پایزێکی ڤایرۆساوی’’ دەدات

2020.09.30 - 11:19
تەندروستیی هەرێم هۆشداری لە ’’پایزێکی ڤایرۆساوی’’ دەدات

ناس کورد-

وەزارەتى تەندروستیی هەرێم داوا لە هاوڵاتیان دەکات لەگەڵ هاتنى وەرزى پایز وریاتربن و زیاتر خۆیان بپارێزن بۆ ئەوەى ئامارى توشبووانى کۆرۆنا ڕوو لە دابەزین بکات.

 

ئاسۆ حەوێزى، وتەبێژى وەزارەتەکە بە ناس کوردى ڕاگەیاند، "لەگەڵ هاتنى وەرزى پایز نەخۆشییە ڤایرۆسییەکان زیاتر دەبێت کە هاوکاتە لەگەڵ بەردەوامى بڵاوبوونەوەى کۆرۆنا، بۆیە ئەگەرى توشبوون زیاتر دەبێت".

 

وتیشى، "هەڵکشانى ئامارەکانى کۆرۆنا پەیوەندى بەچەند هۆکارێکەوە هەیە کە دیارترینیان هاتنى پایزە کە وەرزێکى لەبارەى بۆ پەتا، توشبوون بەپەتاش سیستەمى بەرگریی جەستە لاواز دەکات و وادەکات خەڵک ئاسانتر توشى کۆرۆنا بن".

 

ئاسۆ حەوێزى جەختیکردەوە، لەگەڵ هەڵکشانى ئامارەکان، داکشانیش هەیە و پێویستە هاوڵاتییان زیاتر پابەندبن بە ڕێنماییە تەندروستییەکانەوە.

 

ڕونیشیکردەوە "لەناو هەموو رێنماییەکاندا بەستنى ماسک زۆر گرنگە، تەنانەت هەندێ توێژینەوە بە چارەسەر دایدەنێن".

 

ئاسۆ حەوێزى ئەوەشى خستەڕوو، وەزارەت خۆى ئامادەکردووە بۆ بەرەنگاربوونەوەى ڤایرۆسە لەوەرزى پایزدا، بۆ ئەو مەبەستەش هەڵمەتێکى هۆشیارکردنەوەى هاوڵاتیانیان دەستپێکردووە.

 

بەپێی ئامارەکانى وەزارەتى تەندروستى، کۆى گشتى تووشبوون بە ڤایرۆسەکە لە هەرێم گەیشتووەتە 47 هەزار و 137 کەس، کە 30 هەزار و 175 کەسیان چاکبوونەتەوە و 1725 کەسیان گیانیان لەدەستداوە.