گه‌ڕان

Shadow Shadow
سیاسه‌تی

ناکۆکییەکى تر بەرۆکى یاساى هەڵبژاردنەکان دەگرێت

2020.09.30 - 09:00
ناکۆکییەکى تر بەرۆکى یاساى هەڵبژاردنەکان دەگرێت

ناس کورد-

لەکاتێکدا ناکۆکى لایەنەکان لەسەر پرسی فرە بازنەیی بەردەوامە، کێشەیەکى نوێ لەنێوانیان سەریهەڵداوە لەسەر پشت بەستن بە دەنگدانى ئەلیکترۆنى یان بایۆمەترى.

 

بەهار مەحمود، ئەندامى لیژنەى یاسایی پەرلەمانى عێراق بە ڕۆژنامەى سەباحى نیمچە فەرمى ڕاگەیاندووە، "یاساى هەڵبژاردنەکان میکانیزمى دەنگدانى دیاریکردووە بەپێی کارتى ئەلیکترۆنى، بەڵام دواى دەنگدان لەسەر خشتەى بازنەکانى هەڵبژاردن، 50 واژۆ کۆکراوەتەوە بۆ گۆڕانکاریکردن لە شێوازى دەنگدان".

 

وتیشى، "داواکاریی هەیە لەلایەن زۆرینەى ئەندامانى پەرلەمانەوە بۆ گۆڕینى بۆ کارتى بایۆمەترى بە ئامانجى سنوردانان بۆ ساختەکاریی".

 

لاى خۆیەوە، محەمەد غزى، سەرۆکى لیژنەى یاسایی ڕایگەیاند، بە هەر جۆرێک بێت کارتى بایۆمەترى پڕۆژەى هەڵبژاردنى داهاتووە و تاکە کارتى هەڵبژاردنە.

 

بەپێی ئامارەکانى کۆمسیۆنى هەڵبژاردنەکان، ژمارەى دەنگدەرانى تۆمارکراو لە سیستمى بایۆمەتری گەیشتووەتە 15 ملیۆن و 205 هەزار و 648 کەس، لە کۆى گشتیی دەنگدەران کە ژمارەیان 26 ملیۆن و 642 هەزار و85 دەنگدەرە.  

 

سەعید کاکەیی ئەندامى پێشووى ئەنجومەنى کۆمسیاران پێیوایە، دەنگدان بە کارتى بایۆمەترى یان ئەلیکترۆنى جیاوازییەکى زۆر هەیە لەنێوانیاندا، بە پشتبەستن بەوەى دووەم دەتوانرێت ساختەکاریی ریشەکێش بکرێت.