گه‌ڕان

Shadow Shadow
سیاسه‌تی

عێراق ماتەمینی لە سەرتاسەری وڵات ڕاگەیاند

2020.09.30 - 08:27
عێراق ماتەمینی لە سەرتاسەری وڵات ڕاگەیاند

ناس کورد-

حکومەتى عێراق ماتەمینی گشتیی و بۆ ماوەی یەک ڕۆژ ڕاگەیاند وەک هاوسۆزییەک لەگەڵ کوەیت بەهۆی مردنی سەباح ئەحمەد جابر سەباحی میری کوەیتەوە کە دوێنێ لە تەمەنی 91 ساڵیدا کۆچی دوایی کرد.

 

نوسینگەی ڕاگەیاندنی سەرۆکی حکومەتى عێراق لە ڕاگەیەنراوێکدا دەڵێت، "عێراق بە حکومەت و گەلەوە بەشداری خەمی برایانی دەوڵەتی کوەیتی ئازیز دەکات بەبۆنەی کۆچی دوایی سەباح ئەحمەد جابر سەباحەوە."

 

ڕاشیگەیاند، "بەو بۆنە بەئازارەوە، یەک ڕۆژ ماتەمینی گشتیی و فەرمی لە تەواوی کۆماری عێراق ڕادەگەیەنین کە 30ی ئەیلولی دەبێت، ئەوەش وەک وەفایەک بۆ ئەو کۆستە گەورەیە و هەڵوێستی ناوبراو لە بەرانبەر عێراق و کەیسە ڕەواکەى، هەروەها بۆ هەوڵەکانی بۆ ئاسایش و سەقامگیری ناوچەکە."

 

زياتر بخوێنەوە: مەسرور بارزانی بەداخە: ئەمیری کوەیت پەیوەندی بەهێزی لەگەڵ هەرێم هەبوو

 

هاوکات بەرهەم ساڵح، سەرۆککۆماری عێراق لە هەژماری تایبەتی خۆی لە تویتەر بەھۆی کۆچی دوایی میری کوەیت ڕایگەیاند، "بە دڵگرانییەکی زۆرەوە ھەواڵی کۆچی دوایی (شێخ سەباح ئەحمەد سەباح) مان بیست، ئەو برا گەورە و سەرکردەیەکی خەمخۆری تەبایی گەلانی ناوچەکە بوو، وەک ناسیومانە مرۆڤ دۆست و پێداگربوو لەسەر پەیوەندییە پتەوکانی عێراق و کوەیت، ماندوونەناسانە کاری لەسەر یەک هەڵوێستی و نەهێشتنی ناکۆکییەکان کردووە و لە پێناو ئاشتی و چاکەدا قوربانی دا، سەرەخۆشییمان بە کەسوکارمان لە کوەیتی برا رادەگەیێنین."

 

زیاتر بخوێنەوە: نەواف ئەحمەد سوباح.. شوێنگرەوەى ’’میری مرۆڤدۆستی’’ کێیە؟

 

دوێنێ سێشەممە، سەباح ئەحمەد جابر سەباحی، ئەمیری دەوڵەتی کوەیت لە تەمەنی 91 ساڵیدا کۆچی دوایی کرد دوای ئەوەى لە 23ی ئەیلول چووە ئەمریکا بە مەبەستی وەرگرتنی چارەسەر.  

  


شێخ سەباح ئەحمەد جابر موبارەك سەباح لەدایكبووی 1929یە، پانزەهەمین میری دەوڵەتی كوەیت و پێنجەمینە دوای سەربەخۆیی وڵات لە بەریتانیا.  

 

ماوەی 40 ساڵ وەزیری دەرەوە بووە بەتایبەت لە سەردەمی داگیركردنی كوەیت لەلایەن عێراقەوە لە ساڵی 1990 و رۆڵێكی سەرەكیی دیوە لە كۆكردنەوەی پاڵپشتی بۆ "پڕۆسەی ئازادكردنی كوەیت"، لە 29 حوزەیرانی 2006 بووتە میری وڵات و لە ئەیلولی 2020 بەهۆی نەخۆشییەوە گوازرایەوە بۆ وڵاتە یەكگرتووەكانی ئەمەریكا.  

  


لە سەردەمی ئەودا ژنانی كوەیت مافە سیاسییەكانیان بەدەستهێناوە، یەكەم ژن لە كابینەی ئەودا بووەتە وەزیر (2005)، بۆ یەكەمجاریش بەزۆر سەربازیكردنی گەڕاندوەتەوە بۆ وڵات، لە 2014 لەلایەن نەتەوە یەكگرتووەكانەوە نازناوی "فەرماندەی كاری مرۆیی" پێ بەخشراوە، بە شێخی دیبلۆماسیەتی عەرەبی دەناسرێت و سەردەمەكەشی تاڕادەیەكی زۆر بە ریفۆرمخواز.