گه‌ڕان

Shadow Shadow
سیاسه‌تی

نامەیەكی ماڵئاوایی نەوەی یەکەم و دووەمی ئیخوان لە كوردستان بڵاوكرایەوە

2020.09.29 - 18:56
نامەیەكی ماڵئاوایی نەوەی یەکەم و دووەمی ئیخوان لە كوردستان بڵاوكرایەوە

ناس کورد-

سەركردەیەكی پێشووی كۆمەڵی ئیسلامی نامەیەكی بڵاوكردەوە كە تیشك دەخاتە سەر بارودۆخی جیابوونەوەی نەوەی یەكەم و دووەمی "كۆمەڵی برایانی موسوڵمان - ئیخوان" كە دواتر بووە هۆی دابەشبوونی "ئیسلامی سیاسی".

 

ئەمڕۆ سێشەممە، 29ی ئەیلولی 2020، تۆفیق کەریم، ئەندامی پێشوی مەكتەبی سیاسی کۆمەڵی ئیسلامی و بەرپرسی مەكتەبی ڕاگەیاندنی ئەو حزبە نامەیەكی ماڵئاوایی لە هەژماری خۆی لە فەیسبوك بڵاوكردەوە كە ساڵی 1988 ئاڕاستەی سەركردەی پێشووی یەكگرتوو مەولود باوە مورادی كردووە لەبارەی ناكۆكییەكانی چۆنییەتی ڕێكخستنی "كاری ئیسلامی لە كوردستان".


تۆفیق كەریم كە ئێستا وەك نوسەر و وەرگێڕ و ڕۆشنبیرێكی ئیسلامی كاردەكات نوسیویەتی، پاش ئاشكرابوونی ڕێكخستنی نوێی "برایانی موسڵمانان لە عێراق ـ ئیخوان"، دەزگای ئاسایشی بەعس دەستیكرد بە دەستیگیركردنیان، لەم كاتەشدا كۆچكردوو مامۆستا سدیق عەبدولعەزیز كە بەرپرسی لقی كوردستانی برایان بووە لەگەڵ كۆمەڵێكدا ئاوارەی ئێران بووە، لەپاش خۆپیشاندانی 13ی ئایاری 1987، "كادرەكانی تری ئەم كۆمەڵە هەمان رێگایان گرتوەتەبەر و لە ئۆردوگاكانی ئێران، مشتومڕ لە ناوخۆی ڕێكخستنی نوێدا لە نێوان نەوەی یەكەم و نەوەی دووەهەمی ڕێكخستن، سەری هەڵداوە."

بەپێی نووسینەكەی تۆفیق كەریم، نەوەی دووهەمی ڕێكخستنی "ئیخوان" كە ئارام قادر، ئیكرام كەریم، غازی حمە ئەمین، تۆفیق كەریم بوون ئاواتەخوازی شۆڕشی چەكداری بوون، هەروەها سەرسەختانە لایەنگری مامۆستا سدیقیشیان كردوە لەهەوڵی بەدەستهێنانی پشتیوانی ڕێكخستنی نێونەتەوەیی برایانی موسڵمان "ئیخوان"، بەڵام نەوەی یەكەم بێزاربوون لەم هەنگاوە و ویستویانە بەخێرایی خۆیان یەكلاكەینەوە "یان چەك هەڵگرتن یان رێكخستن"، ئەم مشتومڕەش زیاتر لە ساڵێكی خایاند، تا ئەوكاتەی سەرجەم كادرانی ڕێكخستنی نوێ بڕیار دەدەن لە مانگی تشرینی یەکەمی 1988 بگەڕێنەوە بۆ كوردستانی عێراق.


جێگەی ئاماژەیە ئەم ناكۆكییەی ناو "برایانی موسوڵمان" لە كوردستان لە ساڵانی 1990 بووە هۆی جیابوونەوەی بزوتنەوەی ڕاپەڕین "بەشێك لە كۆمەڵی ئێستا" و یەكگرتوو كە تا ئێستاش وەك دوو هێڵی ئیسلامی ڕكابەری یەكتر دەكەن.

 

دەقی نامەکە:

 

بسم الله الرحمن الرحیم
نامەی ماڵئاوایی
برای گەورە و خۆشەویستم كاك مەولود السلام علیكم و رحمە الله و بركاته پێشەكی سڵاوێكی پڕتین و سۆزت ئاراستە ئەكەم وە ئەپاڕێمەوە لە یەزدانی مەزن لە دونیادا بە موجاهیدی بتژیێنێت و لە قیامەتیشدا بتخاتە ریزی ئەوانەی (رضی الله عنهم و رضوا عنه)،
برای شیرینم: باوەڕم پێبكە ئامۆژگارییەكانی ئەو ئێوارە ئەوەندە كاری تێكردم و سودم لێوەرگرت چەند جارێك بیرم لێ كردەوە و پەیمانمدا بیانكەم بە كۆمەڵە چرایەك و لەبەر رۆشناییەكانیانەوە ڕێبكەم. وە ئەمگوت: ملی شەیتان بشكێت بۆ ساڵ و نیوێكە لە جیاتی ..... ئەم جەوە پڕ لە سۆز و ئیمانیە نەبووە؟ هەر چۆنێك بێت زۆرت لێ داوائەكەم كە گەردنم ئازاد بكەیت چونكە بە ڕاستی من زۆر بێ ئەدەبیم كردووە لە بەردەمی جەنابتدا.
گەورە و بەڕێزم: ئەوا من ئەچم بەرەو وڵاتی (محنة و ابتلا‌ء) ئەمەش نامەی ماڵئاواییە بۆتی دەنێرم خوا ئەیزانێت دڵم زۆر حەسرەتمەندە بەم فیراقە بەڵام توخوا تۆیش منت لە بیر نەچێ و جاربەجارێك یادی ئەو ساتانە بكەرەوە كە رووبەڕووت ئەوەستام و خۆم سورئەكردەوە و ئاگام لە خۆم نەبوو زۆر قسەی بێ ئەدەبیم ئەهات بەممدا (بەڵام بەخوا هەموو لە دەروونێكی دڵسۆزییەوە ئەهات) لەو یادكردنەوەدا دوعای بە كوڵم بۆ بكە. فما أثقل الحمل و ما أضعف الحمال.
براكەم: ئەوە بزانە شێوە و چۆنیەتی ئەودیو بەسراوە بە چەنیەتی هێزی نەخشە و تەوجیهی ئەم دیوەوە. كەواتە چاوەڕوانی توێشوو و وزەین بۆ بڕینی ئەو ڕێگا سەختە.
دوا وەسیەتم لە خزمەتتاندا ئەوەیە:
زۆر ئاگات لە مامۆستابێت فرە بچۆرە خزمەتی هاوبەشی هەموو خۆشی و ناخۆشیەكی بە توخوا هەرگیز دڵی مەشكێنە و بێ دەنگیش مەبە لە هەموو حەقێك كە ئەبێ وابێ
لە كۆتاییدا خوا حافیزیت لێ ئەكەم و ئەڵێم:
أستودعك الله الذی لا تضیع ودائعه
برای بچوكت
تۆفیق كەریم