گه‌ڕان

Shadow Shadow
سیاسه‌تی

ڕاپۆرتێك: كازمی چیتر توانای دان بەخۆداگرتنی نەماوە

2020.09.29 - 13:01
ڕاپۆرتێك: كازمی چیتر توانای دان بەخۆداگرتنی نەماوە

ناس کورد-

رۆژنامەی ئەلعەرەبی چاپی لەندەن بڵاویكردەوە حكومەتی مستەفا كازمی چیتر توانای دان بەخۆداگرتنی نەماوە بەرامبەر پاساو و یارییە ئێرانییەكان لە دۆسیەی هێرشە موشەكییەكانی بەغدا.

 

ڕاپۆرتێكی ئەلعەرەب كە كۆنترین رۆژنامەی عەرەبییە لە بەریتانیا ئەمڕۆ (سێشەممە، 29ى ئەیلولی 2020) لەزاری چەند سەرچاوەیەكی سیاسییەوە ئەوەی خستووەتەڕوو كە مستەفا كازمی سەرۆك وەزیران سوورە لەسەر ئەوەی خاڵ لەسەر پیت دابنێت لە دۆسیەی بە ئامانجكردنی باڵیۆزخانەی ئەمەریكا و بەرژەوەندییە رۆژئاواییەكان تەنانەت ئەگەر ئەوە ببێتە هۆی ئاڵۆزی و كێشە لە پەیوەندییەكانی بەغدا و تاران.

 

رۆژنامەكە ئەوەشی خستوەتەڕوو كە وەزارەتی دەرەوەی عێراق بە مەبەست تەوەرەكانی گفتوگۆی فوئاد حسێنی وەزیری دەرەوە و حەسەن ڕۆحانی سەرۆك كۆماری ئێرانی بڵاو كردووەتەوە پاش ئەوەی سەرۆكایەتی كۆماری ئێران وایان بڵاوكردبوویەوە كە ڕۆحانی هەندێ پەیام و بەرچاوڕوونی داوە بە فوئاد حسێن و ئەویش سوپاسی زۆری هەڵوێستی ئێرانی كردووە بۆ هاوكاریكردنی عێراق.

 

زیاتر: لەدوای هێرشە موشەکییەکە.. کازمی بڕیارێکی بەپەلەی بۆ هێزەکان دەرکرد

 
 

دوێنێ (28ى ئەیلولی 2020) ئەحمەد سەحاف، وتەبێژی فەرمی وەزارەتی دەرەوەی عێراق، ئاشكرایكرد كە فوئاد حسێن پەیامێكی زارەكی لە سەرۆكوەزیرانی عێراقەوە گەیاندووە بە سەرۆككۆماری ئێران لەبارەی دۆخی ناوچەكە و  پێداچوونەوە بە ئەگەر و پێشهاتەكان و لێكەوتە چاوەڕوانكراوەكانیان.

 

بەقسەی سەحاف گفتوگۆكان زیاتر تایبەت بوون بە پرسە هەڵپەسێردراوەكانی نێوان عێراق و ئێران.

 

پەیامەکەى کازمى بۆ ئێران لە کاتێکدایە کە سەرەتای ئەم هەفتەیە ميدياكانى ئەمەریكا لەوانەش واشنتۆن پۆست و CNN ئەوەیان ئاشكرا كردووە کە مایك پۆمپیۆ لە پەیوەندییە تەلەفۆنییەکەدا لەگەڵ بەرهەم ساڵح، سەرۆككۆماری عێراق پەیامێكی هەڕەشەئامێزی بۆ میلیشیا شیعەكانی عێراق ناردووە ئەگەر بەردەوام بن لە هێرشی موشەكی بۆ سەر باڵیۆزخانەی ئەمەریكا و ناوەڕۆكی پەیامەكەش چوار خاڵی سەرەكی لەخۆی گرتووە كە بریتین لە:

 

یەکەم: داخستنی باڵیۆزخانەى ئەمریکا لە بەغدا ئەگەر هاتوو هەر هێزێکی ئەمریکی یان هاوپەیمانی نێودەوڵەتی ڕوبەڕوی هێرش ببنەوە.

 

دووەم: بەئامانجكردنی سەرکردە شیعییەکان و فەرماندەکانی گروپە چەکدارییەکان هاوشێوەی لەناوبردنی قاسم سولەیمانی و مەهدی موهەندیس.

 

سێیەم: ئەنجامدانی هێرشی ئاسمانی ورد و چڕ بۆسەر پێگە و بارەگاکانی گروپە چەکدارەکان و بەردەوامیش دەبێت تاوەکو هەڵوەشاندنەوەى ئەو گروپانە و کوژران و هەڵهاتنی فەرماندەکانیان.

 

چوارەم: وشککردنی سەرچاوەی دارایی تۆمارکراوی ئەو سیاسییانەى کە تێوەگلاون یاخود پەیوەندییان هەیە لەگەڵ ئەو میلیشیایانەى کە شوێنە دیبلۆماسی و ئەمنییەکانی ئەمریکایان کردووەتە ئامانج.