گه‌ڕان

Shadow Shadow
سیاسه‌تی

قوباد تاڵەبانی: غەدرم لە سەڵاح كوێخا كرد و پەشیمانم

2020.09.29 - 09:49
App store icon Play store icon Play store icon
قوباد تاڵەبانی: غەدرم لە سەڵاح كوێخا كرد و پەشیمانم

ناس کورد-

قوباد تاڵەبانی، جێگری سەرۆكی حكومەتى هەرێمى کوردستان لاواندنەوەیەكی بۆ سەڵاح كوێخای سەرپەرشتیاری پێشووی ئیدارەی گەرمیان بڵاوكردەوە، كە سپێدەی ئەمڕۆ بە كۆرۆنا گیانی سپارد و بەنمونەی دەست پاك و رەوشت بەرز ناوی دەبات كە لەقۆناغی حوكمڕانیدا ناوی خۆی نەزڕاندووە.

 

کەناڵی ناس کورد لە تێلیگرام جۆین بکە   

قوباد تاڵەبانی لە نوسینێكدا لە پەیجی تایبەتی خۆی لە فەیسبوک ئەمڕۆ (سێشەممە، 29ى ئەیلولی 2020) دەڵێت "هەر کاتێک وشەی جوامێر یان پیاوی مەردم دەکەوێتە بەر گوێ، یەكسەر کاک سەڵاحی کوێخام دێتە بەرچاو. کاک سەڵاح نموونەی مەردایەتی و مێرخاسی و پەرۆشی بوو بۆ خاک و نیشتمان. پێشمەرگەیەکی پارتیزان و دڵسۆز، دەوڵەتمەدار و بەرپرسێکی دەست و دامێن پاک و ڕەوشت بەرز و بە هەموو مانایەک مەرد".

 

هەروەها جەخت دەكاتەوە كە سەڵاح كوێخا جیاواز بوو و تا دواساتەکانی ژیانی بە پاکێتی و بەهەمان ئەو بیر و باوەڕەوە ژیا کە لە گەنجێتیدا لەپێناویدا بووە پێشـمەرگە و هەرگیز ڕیگەی نەدا ناو و ناوبانگی لەکەدار بێت.

 

قوباد تاڵەبانى لە بەشێکى ترى نووسینەکەیدا ئاماژە بەوە دەکات"وەکچۆن لە سەردەمی شاخ و پێشمەرگایەتیدا مەرد و جوامێر بوو، لە قۆناغی پاش پێشمەرگایەتیشدا هەر مەرد و جوامێر مایەوە. نەیهێشت پلە و پۆست ناوی بزڕێنێت. ئەو دەسەڵاتە زۆرەی وەک سەرپەرشتیاری ئیدارەی گەرمیان هەیبوو، بەکاری نەهێنا بۆ بەهێزکردنی پێگەی خۆی یان بۆ پڕکردنی گیرفانی".

 

قوباد تاڵەبانی لەباسکردنى سەڵاح کوێخادا نموونە بە ڕۆژانى  دواهەمین کۆنگرەى حزبەکەى دەهێنێتەوە و باس لەوە دەكات لە دوا کۆنگرەی یەکێتی، لەناو گەرمییانیەکاندا سەلاح كوێخا پاشەكشەی كرد بۆ هەندێک هەڤاڵی تر تا  گرژی نەکەوێتە ناو کۆنگرەوە. هەروەها دەڵێت "لە ژیانمدا لە کەم شت پەشیمانم. بەڵام هەست دەکەم غەدرم لەم پیاوە مەزنە کرد. دوو ساڵ بوو داوای دەکرد خانەنشینی بکەم و هەڤاڵێکی تر لە شوێنەکەی دەستبەکار بێت، بەڵام من لێی پاڕامەوە کە لەبەر هەستیاری دۆخەكە و ئەو هاوسەنگیەی رایگرتبوو و هەروەها لەبەر ئەو ڕێزەی کە لە گەرمیان هەیبوو بەردەوام بێت لە خزمەتکردنی گەرمیان".

 

قوباد تاڵەبانی نوسیویشیەتی "ئێستا پەشیمانم و هەست ئەکەم غەدرم لە خۆی و مامۆستا هیامی هاوسەری کرد کە بە پێداگرییەکانم نەمهێشت لانیکەم دوو ساڵ بە ئارامی و دوور لە فشاری بەرپرسیارێتی پێکەوە بژین. زۆر دڵگرانم کە نەیتوانی یەک رۆژ چێژ لە ژیانی خانەنشینی ببینێت، چونکە هەرکە خانەنشین بوو تووشی پەتای کۆرۆنا بوو. لێرەدا هیچم نییە بیڵێم جگە لەوەی زۆر داوای لێبوردن بکەم لە مامۆستا هیام".

 

جێگری سەرۆكی حكومەت هیوا دەخوازێت سەڵاح كوێخا و ئەداکەی نموونەیەک بێت بۆ ئەو کەسانەی نایانەوێت مێژووی خۆیان بە کاری نەشیاو ناشیرین بکەن و دەڵێت "ژیان و تێکۆشانی کاک سەڵاح فێرمان دەکات هەر کەسێک کە ئەمڕۆ لەهەر بوارێکدا ناوبانگێکی هەیە، ئەگەر بە پاکی و بە رەوشت بەرزییەوە بژین، ئەوانیش دوای خۆیان وەک کوێخا جوامێرەکەمان بە جوانی دەچنە ناو مێژووەوە".

 

لە كۆتاییشدا قوباد تاڵەبانی دەڵێت "دوای هەموو ئەو ساڵانەی یەکتر ناسینمان هەست دەکەم تەنیا وشەیەک کە شیاو بێت لەپاڵ ناوی کاک سەڵاحدا دایبنێم ئەوەیە کە بڵێم: کاک سەڵاحی مەرد. رۆحت شادبێت کاک سەڵاح.. کوێخاکەی خۆم و گەرمیان".