گه‌ڕان

Shadow Shadow
سیاسه‌تی

هاوپەیمانێتی سوننەكان بۆ كازمی: بەدەستی ئاسنین لە گروپە چەكدارەكان بدە

2020.09.29 - 00:07
هاوپەیمانێتی سوننەكان بۆ كازمی: بەدەستی ئاسنین لە گروپە چەكدارەكان بدە

ناس کورد-

هاوپەیمانێتی هێزە عێراقییەكانی سوننە داوای "بڕیارێكی بوێرانە" دەكات لە شوێن پێ هەڵگرتنی گروپە چەكدارە ناساییەكان و دەستگرتن بەسەر تاقمە چەكدارە لە كۆنتڕۆڵ دەرچووەكان و بەرەنگاربوونەوەیان بەدەستی ئاسنین.

 

ئەمڕۆ دووشەممە، 28ی ئەیلولی 2020، هاوپەیمانێتییەكە لە ڕاگەیەنراوێکدا كە وێنەیەکی گەشتووە بە ناس كورد گلەیی ئەوە دەكات هێشتا ڕۆژێك تێپەڕی نەكردوە بەسەر هۆشداریی ئەوان و داواكردنیان لە سەرۆكوەزیران بۆ لێدانی گروپە چەكدارە نایاساییەكان بەدەستی ئاسنین، جارێكیتر ئەو گروپانە موشەكی كاتیۆشایان بەكارهێنا بۆ تەحەداكردنی دەوڵەت و دەزگا ئەمنییەكان.


هاوپەیمانێتییەكە جەخت لەوە دەكاتەوە ئەوەی ڕوویداوە و قوربانی سڤیلی لێ كەوتووەتەوە و نابێ هەروا بە ئاسانی گوزەر بكات، هەروەها دەڵێت، دەبێت حكومەت و فەرماندەی گشتی هێزە چەكدارەكان بەرپرسیارێتی یاسایی و دەستوری هەڵگرن لە پاراستنی هاوڵاتیان و داوا دەكات مستەفا كازمی "بڕیارێكی بوێرانە" بدات بۆ شوێن پێ هەڵگرتنی گروپە چەكدارەكانی دەرەوەی یاسا.

 

موقتەدا سەدر و عەمار حەکیم توڕەن لە ئاڵۆزییە ئەمنییەکانی ئەم دواییەی عێراق و داوای چارەسەرکردنی دۆخەکە و سەپاندنی سەقامگیری دەکەن.   

  

عەمار حەکیم، سەرۆکى هاوپەیمانى عراقیون هۆشداریدا لە بوونى پلانێک بۆ داڕوخانى وڵات و بردنى بەرەو فیتنە و ململانێ، هانى لایەنە پەیوەندیدارەکانیش دەدات شکۆى دەوڵەت بپارێزن.  

  

حەکیم لە راگەیەنراوێکدا ئاماژەى بەوەکردووە، بەردەوامى بە ئامانجگرتنى دامەزراوە گشتی و تایبەتەکان بەتایبەتى لە بەغدا و شوێنەکانى دیکە و ماڵى هاوڵاتییان لە ناوچەى رزوانییە کە روبەڕووى بۆردومان بووەتەوە و شەهیدى لێکەوتووەتەوە، ئاماژەیە بۆ بوونى پلانێک بۆ داڕوخانى وڵات و راکێشانى بەرەو فیتنە و ململانێ.  

  

هەروەها بەتوندى ئیدانەى ئەو "کارە تاوانکارانە" ى کردووە و هانى لایەنە پەیوەندیدارەکانى داوە، پەلە بکەن لە چارەسەرکردنى ئەو دۆخە و بە دادگایی گەیاندنى ئەنجامدەرانى هێرشەکان.  

  

هەروەها موقتەدا سەدر، ڕابەڕی ڕەوتی سەدر لە تویتێکدا دەڵێت، "چەند لایەنێکی گوماناوی دۆخەکە ئاڵۆز دەکەن و ئاسایش و ئاشتی دەخەنە مەترسییەوە."  

  

دەشڵێت، "ئامۆژگاری هەمووان دەکەم ژیری و شەرع و خۆشەویستی نیشتمانی بەکاربهێنن پێش ئەوەى وڵات بەرەو شەڕی ناوخۆیی و پێکدادانی شیعی-شیعی یاخود تایەفی ببەن."  

me_ga.php?id=1074  

ئەوە لەکاتێکدایە ئەمڕۆ بەهۆى کەوتنە خوارەوەى کاتیۆشایەک لە دەوروبەرى فڕۆکەخانەى بەغدا، سێ کەس کوژراون و دوو کەسى دیکەش برینداربوون کە ئەندامى یەک خێزانن و منداڵیشیان لەناودایە.  

  

زیاتر بخوێنەوە: لەدوای هێرشە موشەکییەکە.. کازمی بڕیارێکی بەپەلەی بۆ هێزەکان دەکرد  

  

سەرچاوەیەکى ئەمنى پێشتر بە ناس کوردى ڕاگەیاندبوو، هێرشەکە کاتژمێر 6:30 ئێوارە روویداوە بەهۆى کەوتنە خوارەوەى کاتیۆشایەک بۆ سەر ماڵێک لە گەڕەکى جیهاد لە نزیک فڕۆکەخانەى بەغدا.