گه‌ڕان

Shadow Shadow
سیاسه‌تی

وەزارەتی دەرەوەى ئەمریکا: باڵیۆزخانەکەمان لە بەغدا بەردەوامە لە کارکردن

2020.09.28 - 22:08
وەزارەتی دەرەوەى ئەمریکا: باڵیۆزخانەکەمان لە بەغدا بەردەوامە لە کارکردن

ناس کورد-

وتەبێژی هەرێمی بەناوی وەزارەتی دەرەوەى ئەمریکا جەختی کردەوە کە حکومەتی ئەمریکا تەواوی ڕێکار و ڕێوشوێنەکان دەگرێتەبەر بۆ پاراستنی باڵێۆزخانە و نێردە دیبلۆماسییەکان و دەڵێت، سەرباری ئاڵنگارییەکان بەڵام کاروباری باڵێۆزخانەکەیان لە بەغدا بەردەوام دەبێت.

 

ئەمڕۆ دووشەممە، 28ی ئەیلول 2020، سامیوێل وربێرگ، وتەبێژی هەرێمی بەناوی وەزارەتی دەرەوەى ئەمریکا ڕایگەیاند، "ئەمریکا بەردەوام دەبێت لە پەیوەندییە تەندروستەکانی لەگەڵ عێراقییەکان، لە ڕووی ئەمنییەوە هەماهەنگییەکانمان بەردەوامە لەگەڵ هێزە ئەمنییەکانی عێراق بە مەبەستی قەڵاچۆکردنی گروپە تیرۆرستییەکان".

 

وربێرگ دەشڵێت: "میلیشیا پشتیوانیکراوەکان باڵوێزخانەکەمان دەکەن بە ئامانج، بەڵام سەرباری ئەوەش  بەردەوام دەبین لەمانەوە لە عێراق، هەموو ڕێکارەکانیش دەگرینەبەر بۆ پارێزگاریکردن لە نێردە دبلوماسییەکەمان لە بەغدا".  

 

وتەبێژ ئەمریکییەکە باسی لەوەشکرد کە "لە نێوان ساڵی 2009 و2010  لەژێر هەڕەشەی موشەکی میلیشیاکانی سەر بە ئێران لە بەغدا ژیاوم و دەزانم مەترسییەکان لەچ ئاستێکدایە، بەڵام سەرباری ئەوە بەردەوام دەبین لە پاڵپشتیکردنی گەلی عێراق."

 

بەوتەی وربێرگ، "ئەوانی هێرش دەکەن سەر باڵوێزخانەکەمان ئامانجیان زیان گەیاندنە بە  بەرژەوەندییەکانی گەلی عێراق، چونکە نەمانی ڕۆڵی ئەمریکا لە عێراق یاخود بڕینی پەیوەندییەکانمان لەگەڵ ئەو وڵاتە، باجەکەی گەلی عێراق دەیدات".

 

وربێرگ بە دوریشی نەزانی وڵاتەکەی سزا وگەمارۆی توند دژبە فەرماندەکانی گروپە چەکدارییەکانی نزیک لە ئێرانەوە بسەپێنێت، هەماهەنگی پتەو لە نێوان هێزەکانی ئەمریکا و هێزە ئەمنییەکانی عێراقدا هەیە، زانیارییەکان ئاڵۆگۆڕ دەکەن.   

 

وتەبێژە ئەمریکییەکە جەختیشکردەوە کە "جوڵەکانی ئێستای ئەمریکا دژ بە گروپە چەکدارەکانی سەر بە ئێران هیچ پەیوەندییەکی بە هەڵبژاردنەکانی سەرۆکایەتی ئەمریکاوە نییە، هێرشکردنە سەر باڵوێزخانەکەمان ماوەیەکی دورودرێژە بەردەوامی هەیە".