گه‌ڕان

Shadow Shadow
سیاسه‌تی

وەزارەتى ڕۆشنبیرى سورە لەسەر جێبەجێکردنی بڕیارەکەى: هیچ نیەتێکی خراپمان نییە

2020.09.28 - 18:53
وەزارەتى ڕۆشنبیرى سورە لەسەر جێبەجێکردنی بڕیارەکەى: هیچ نیەتێکی خراپمان نییە

ناس کورد-

وەزارەتى ڕۆشنبیرى و لاوانى حکومەتى هەرێمى کوردستان جەختدەکاتەوە کە هیچ "نیەتێکى خراپ" لەپشت بڕیار و  ڕێنماییە نوێیەکەیانەوە نییە بۆ گۆڕانکارکردن لە پێدانى ژمارەى سپاردن بە کتێب و بڵاوکراوەکان.

 

وەزارەتی ڕۆشنبیری هەرێم ڕۆژی پێنجشەممە، 24ی ئەیلولی 2020، بڕیاریدا شێوازى پێدانى ژمارەى سپاردن بکات بە مەرکەزى، کە پێشتر لەلایەن بەڕێوەبەرایەتى پارێزگاکانەوە دەدرا.

 

زیاتر بخوێنەوە: بڕیارێکی وەزارەتی ڕۆشنبیری لەنێوان ’’ڕیکخستنەوە و گەڕانەوە بۆ سەردەمی بەعس’’  

 

ئەو بڕیارە مشتومڕ و کاردانەوەى زۆرى لێکەوتووەتەوە و بەشێک لە نوسەران بڕیارەکە بە "سەرکەوتکردن و سانسۆرخستنە" سەریان وەسف دەکەن، بەڵام وەزارەت دەڵێت بڕیارەکە تەنها بۆ ڕێکخستنەوەیە.

 

خەلیل عەبدوڵا، بەڕێوەبەرى گشتى دیوان لە وەزارەتى ڕۆشنبیرى بە ناس کوردى ڕاگەیاند، "بڕیارەکە پشتى بەدەقى یاسایی بەستووە، نوسەران و ڕۆشنبیران دڵنیادەکەینەوە کە هیچ نیتەتێکى خراپ لەپشتیەوە نییە".

 

زیاتر بخوێنەوە: دەیان نوسەر ’’بە توڕەییەکی زۆرەوە’’ داوا لە حکومەت دەکەن بڕیارێکی ’’شەرمهێن’’ ڕابگرێت

 

وتیشى، "ئامانجى سەرەکى لەو بڕیارە رێکخستنەوەى بوارى چاپەمەنییە بەتایبەت کە هەندێ کتێب لەماوەکانى ڕابردوودا دەرچوون کە هەڵەى زمانەوانى و ڕێزمانیان تێدا بووە، دەمانەوێت لەو ڕێگەیەوە ئەوە نەهێڵین".

 

وەزارەتى ڕۆشنبیرى لە بڕیارە نوێیەکەیدا جەختیکردوەتەوە لەسەر لەبەرچاوگرتنى پێوەرەکانى بەرژەوەندى باڵاى نیشتیمانى و نەتەوەیی و پاراستنى بەها پیرۆزەکان و تێکنەدانى شیرازەى کۆمەڵایەتى، بۆ پێدانى ژمارەى سپاردن بەهەر کتێبێکى نوێ.

 

زیاتر بخوێنەوە: ڕوونکردنەوەیەک سەبارەت بە هەوڵی زیندووکردنەوە و سەپاندنی سانسۆر لەلایەن وەزارەتی ڕۆشنبیریی هەرێمەوە

 

خەلیل عەبدوڵا باسى لەوەکرد، ئەو بڕیارە بۆ چاودێرى و سانسۆرخستنە سەر هیچ نوسەر و کتێبێک نییە، ئەو کارە پێشتر لە بەڕێوەبەرایەتییەکانى کتێبخانەکان کراوە و ئێستا دراوەتە دەست لیژنەیەکى مەرکەزى.

 

وتیشى، وەزارەت لیژنەیەکى لە بەڕێوەبەرایەتى گشتى کتێبخانەکان و بەڕێوەبەرایەتى کتێبخانەکانى پارێزگاکان و ئیدارەى گەرمیان و راپەڕین دروستکردووە، بۆ هەڵسەنگاندنى هەر کتێبێک کە بۆ ژمارەى سپاردن بەرزدەکرێتەوە، لیژنەکە کارەکان راییدەکات و پێویست ناکات نوسەرەکە بچێتە هەولێر بۆ وەرگرتنى ژمارەى سپاردن بۆ کتێبەکەى.

 

خەلیل عەبدوڵا دەشڵێت، بەپێی یاسا ئازادى نوسین و چاپەمەنى لە هەرێمى کوردستان بەرقەرار کراوە، بەلەبەرچاوگرتنى پێوەرەکانى بەرژەوەندى باڵاى نیشتیمانى و نەتەوەیی و پاراستنى بەها پیرۆزەکان و تێکنەدانى شیرازەى کۆمەڵایەتى.