گه‌ڕان

Shadow Shadow
سیاسه‌تی

جەژنی نیشتمانی پێشنیارکراوی عێراق بەر ساڵڕۆژی مەرگێک دەکەوێت لە کوردستان

2020.09.28 - 14:47
جەژنی نیشتمانی پێشنیارکراوی عێراق بەر ساڵڕۆژی مەرگێک دەکەوێت لە کوردستان

ناس کورد-

بەهۆى ناڕەزایەتى یەکێتیى نیشتیمانیى کوردستان لە بەروارەکەى کە هاوکاتە لەگەڵ ڕۆژى کۆچى دوایى تاڵەبانى، پڕۆژە یاساى دیاریکردنى ڕۆژى جەژنى نیشتیمانى کۆمارى عێراق و دەرچونى لەژێر ئینتدابى بەریتانیا پەکیکەوتووە و خوێندنەوەى دووەمى بۆ کاتێکى نادیار دواخراوە.

 

لەلێدوانێکیدا بۆ ماڵپەڕى مەدا، جاسم حەمیداوى، ئەندامى لیژنەى ڕۆشنبیرى لەپەرلەمانى عێراق ڕایگەیاند، هۆکارى دواکەوتنى خوێندنەوەى دووەم بۆ پڕۆژە یاساى جەژنى نیشتیمانیى کۆمارى عێراق و دواخستنی بۆ کاتێکی دیکە لەسەر داواى ژمارەیەک لایەنى سیاسى کوردی بووە و بۆ کاتێکی نادیار دواخراوە.

 

حکومەتى عێراق دەنگى لەسەر پێشنیارێکى حەسەن نازمى، وەزیرى ڕۆشنبیریدا بەمەبەستى دیاریکردنى  تشرینى یەکەمى هەموو ساڵێک وەکو ڕۆژى نیشتیمانى بۆ کۆمارى عێراق کە ڕۆژى سەربەخۆیی و دەرچوونە لەژێر ئینتدابى بەریتانى 1932 و بوون بە ئەندام لە ڕێکخراوى نەتەوە یەکگرتووەکان.

 

پێشتریش پێشنارێکى حکومەتەکەى مالیکى لەساڵى 2008 بۆ دیاریکردنى ڕۆژێک بۆ ئەو یادە بەهۆى ناکۆکى لایەنە سیاسیەکانەوە لە پەرلەمان پەکخرا.

 

لاى خۆیەوە د. جوان ئیحسان فەوزى سەرۆکى فراکسیۆنى یەکێتى نیشتیمانى لەپەرلەمانى عێراق ڕایگەیاند، بەروارى 3ى تشرینى یەکەم هاوکاتە لەگەڵ یادى کۆچى دوایى جەلال تاڵەبانیدا کە یادێکى خەمناکە بۆ ئەوان و بەوەش ناتوانن لەڕۆژێکى وەهادا ئاهەنگ بگێڕن بۆ یادى نیشتیمانى وڵاتەکەیان.

 

جوان ئیحسان روونیکردەوە، ڕۆژى نیشتیمانى کۆمارى عێراق جەژنى هەموو عێراقیەکانە کە هەست بەپەیوەست بوون بەو مێژووە دەکەن و ئاهەنگى بۆ دەگێڕن دەبێت ئەو جەژنەش بۆ هەمووان بێت نەک لایەن و چینیکى دیاریکراو لەسەر حسابى ئەوانى دیکە.

جەختیشى کردەوە، وەک فراکسیۆنى یەکێتى داواکارییەکیان ئاڕاستەى سەرۆکایەتى پەرلەمان و لیژنەى ڕۆشنبیرى کردووە بۆ ئەوەى بەروارى ئەو یادە بگۆڕن بۆ ڕۆژێکى دیکە.