گه‌ڕان

Shadow Shadow
سیاسه‌تی

’بەهەزاران بەڵگەنامەیتر لای دەزگای زانیارین’

مەلا بەختیار بەڵگەنامەیەكیتری كوشتنی بڵاوكردەوە

2020.09.27 - 17:57
مەلا بەختیار بەڵگەنامەیەكیتری كوشتنی بڵاوكردەوە

ناس کورد-

مەلا بەختیار نامەیەكی دەستنووسى یەكێك لەكادرەكانی ئاڵای شۆڕشی بڵاوكردەوە كە لەگەڵ دوو هاورێیتریدا كوژراون و داوا دەكات بەڵگەنامەی "خیانەتكارییان" ئەگەر هەیە بڵاو بكرێتەوە.

 

بەگوێرەى نامە دەستنووسەکە کە ئێوارەی ئەمڕۆ (یەکشەممە، 27ى ئەیلولی 2020)، مەلا بەختیار لە هەژمارى خۆى لە فەیسبوك بڵاویكردوەتەوە، كەسێك بەناوی عیدان ناسر باس لە بێتاوانی خۆی دەكات بۆ هاوڕێیەكی و وەسێت دەكات پاش كوشتنی بەشێوازی ئیسلامیانە بینێژن و دایك و باوكی هێور بكەنەوە، لەسەر گۆڕەكەشی بنووسن شەهید بۆ ئەوەی رۆحی ئاسوودە بێت، لە كۆتایشدا نوسیویەتی "با هەموو هاوڕێیان بزانن من بێ تاوانم بەخوای مەزن".

 

زیاتر: مەلا بەختیار داوای لێبوردن دەکات 

 

مەلا بەختیار دەڵێت ئەم نامەیە هی "شەهید عیدان ناسرە کە بەبێ دادگا لەگەڵ شەهیدان ئەکرەم و حەیدەر لە کاتی بڕیاری کوشتنیان بۆ هاوڕێیەکی نوسیوە".

 

هەروەها دەڵێت ناوەڕۆکی ئەم نامەیە بێ گوناهی ئەم شەهیدە و هاورێکانی دەردەخات. کە بە بڕیارێکی سەرپێیی هەرسێکیان گولەباران کراون.

لە كۆتایشدا دەڵێت "ئێستاش با بەڵگەیەک لە هەزاران بەڵگەنامە کە گیراون، لای دەزگای زانیاری یەکێتین، ئەگەر هەیە، با لەسەر خیانەتی ئەم شەهیدانە، هەروەها هەمو شەهیدانی ئاڵای شۆرش با بڵاوبکرێتەوە".

 

لەدوای بڵاوكردنەوەی كتێبی (لەبری بیروەری) لەناوەڕاستى ئەیلوولى 2020  بەرپرسان و میدیای فەرمی بزوتنەوەی گۆڕان هێرشی زۆریان كردە سەر گێڕانەوەكانی مەلا بەختیار دەربارەی سەركردەی كۆچكردوو نەوشیروان مستەفا، بەمدوایانەش لەلایەن هەندێ فەرماندە و بەرپرسی ئێستا و پێشووی یەكێتیی نشیتمانیی ـ یەوە رەخنە لەناوەڕۆك و هەندێ گێڕانەوەی كتێبەكە گیراوە، لەپاش ئەو ڕەخنە زۆرانەش ئەمە سێیەم جارە مەلا بەختیار نوسەری (لەبری بیرەوەری) بە لێدوان و نووسین بەرگری لەگێڕانەوە و ناوەڕۆكی كتێبەكە بكات، یەكەمیان لە كۆنگرەیەكی رۆژنامەوانی و دوو جارەكەیتر بە نووسین لەپەیجی تایبەتی خۆی.