گه‌ڕان

Shadow Shadow
سیاسه‌تی

میدیای یەکێتی ڕەخنە لە یادکردنەوەی ڕیفراندۆم دەگرێت

2020.09.25 - 20:19
میدیای یەکێتی ڕەخنە لە یادکردنەوەی ڕیفراندۆم دەگرێت

ناس کورد-

میدیاى فەرمى یەکێتى نیشتیمانى کوردستان ڕەخنە لە یادکردنەوەى ڕیفراندۆم دەگرێت لەشارى هەولێر کە لەلایەن پارتى دیموکراتى کوردستانەوە لەناوجەرگەى شارى هەولێر ئەنجامدرا.

 

ئەمڕۆ (هەینى) سێ ساڵ بەسەر ئەنجامدانى ریفراندۆم تێدەپەڕێت ئەو پڕۆسەیەى کە لەو کاتەدا و تائێستاش مشتومڕێکى زۆرى لەناوخۆى هەرێمى کوردستان بەدواى خۆیدا هێنا و دوو بەرى خوڵقاند بەرەى پشتیوانیکردن لە ئەنجامدانى و بەرەیەک کە لەگەڵ ئەو وادەیەدا نەبوون و هۆشدارى ئەوەیان دەدا کە ئەنجامدانى باش ناکەوێتەوە.

 

سەر لەئێوارەى ئەمڕۆش بەو بۆنەیەوە لە شارى هەولێر و لەناوەندى شارەکە پارتى دیموکراتى کوردستان ئاهەنگێکى جەماوەریى ئەنجامدا و ئەو کارەش کاردانەوەى لێکەوتەوە و میدیاى فەرمى یەکێتى نیشتیمانى کوردستان لە دەلاقەى پابەندنەبوون بە ڕێنماییە تەندروستییەکان و خۆپارێزى لە کۆرۆنا ڕەخنەى لە ئاهەنگەکە گرت.

 

هاوکات لە بەدواداچوونێکى ناس کوردا ئەوە دەرکەوتووە کە زۆرێک لەو لایەن و کەسایەتییانەى کە بەشدارى کارایان هەبوو لە ئەنجامدانى ڕیفراندۆمى 2017دا لە سێهەمین ساڵڕۆژى ئەو یادەدە یان بێدەنگییان هەڵبژارد یاخود پەیامێکى تەمومژیان بڵاوکردەوە یان بە دێڕێک گوزارشتیان لەو یادە کرد.

 

مەسعود بارزانى، سەرۆکى پێشووى هەرێمى کوردستان کە سەرکردەى ئەنجامدانى ریفراندۆم ناودەبرێت بە تەنها گوزارشتێک ئەم یادەى بەسەرکردەوە و لە هەژمارى خۆى لە تویتەر نووسیى (خۆ ناچەمێنین).

 

هاوکات تائێستا سەرۆکایەتیی هەرێمی کوردستان هیچ پەیامیکی لەوبارەیەوە نییە و جگە لە پارتیش زۆرینەی حزبەکانی دیکە بێدەنگن و هاسەرۆکانی یەکێتیش یەکێکیان بە شکستیکی گەورە ناوی دەبات و یەکێکیشیان بێدەنگی هەڵبژاردووە.

 

هەر ئەمڕۆ هەینی، مەسرور بارزانی، سەرۆکی حکومەتی هەرێم لە پەیامیکدا ڕایگەیاند: "بەرز و پایەدار بێت یادی پڕ شکۆی ڕیفراندۆم، یادی دەربڕینی هەستی ئازادیخوازانەی گەلی کوردستان، هیوادارم هەموو ئاوات و مافە ڕەواکانی گەلەکەمان بە شێوەیەکی ئاشتییانە و سەردەمییانە بێنە دی."

 

لەگەڵ ئەوەی پارتی لە میدیاکانییەوە ڕۆژی ڕیفراندۆم بە ڕۆژێکی مێژوویی ناودەبات، بەڵام تاوەکو ئێستا نێچیرڤان بارزانی، سەرۆکی هەرێمی کوردستان و جێگری سەرۆکی پارتی لەو بارەیەوە بێدەنگە و هیچ پەیامێکی لەوبارەیەوە بڵاونەکردووەتەوە. 

 

لەسەر ئاستی حزبەکانیش، لاهور شێخ جەنگی، هاوسەرۆکی یەکێتی لە پەیامێکدا ئەو رۆژەی بە شکستێکی گەورەزانی و ڕایگەیاند: ""25ی ئەیلولی 2017، ئەو ڕۆژەبوو کە چارەنوسی گەلی کوردستان و دەستکەوتەکانی، کران بە قوربانی لێکدانەوەی هەڵە و غروری چەند سیاسییەکی تێنەگەیشتوو و کاڵفام."  

 

ئاماژەی بەوەشكرد: "سەرباری شکستی ڕیفراندۆم و بێ هیواکردنی گەلێک لە سەربەخۆیی، بەڵام هەوڵەکانی یەکێتیی نیشتیمانیی کوردستان بۆ گەیشتن بە مافی ڕەوای چارەی خۆنوسین بەردەوام دەبێت." 

 

پەیامەکەی لاهور شێخ جەنگیش پەیامێکی تایبەت بە خۆی بوو، نەوەک پەیامی فەرمی حزبەکەی و تاوەکو ئێستا هاوتاکەی کە بافڵ تاڵەبانییە بێدەنگی هەڵبژاردووە، بەڵام یەکێتی لە میدیاکانییەوە پرۆسەکە بە شکستخواردوو ناودەبات.   

 

جگە لە بافڵ تاڵەبانی، قوباد تاڵەبانی، جێگری سەرۆکی حکومەتیش لە پشکی یەکێتی بەهەمانشێوە بێدەنگە و تائێستا هیچ پەیامێکی لەوبارەیەوە بڵاونەکردووەتەوە.  

 

هاوکات هەریەک لە بزووتنەوەی گۆڕان، کۆمەڵی ئیسلامی، یەکگرتووی ئیسلامی و بزووتنەوەی ئیسلامی بەهەمانشێوە بێدەنگن و هیچ پەیامێکیان لەوبارەیەوە بڵاونەکردووەتەوە. 

 

لە 25ی ئەیلولی 2017، ڕیفراندۆمی هەرێمی کوردستان ئەنجامدرا و تیایدا %92.7 دەنگیان بە بەڵێ دا بۆ سەربەخۆیی کوردستان، بەڵام بەهۆی لێكەوتەكانی ریفراندۆمەوە و دوای کەمتر لە مانگێک و لە شەوی 24ی تشرینی یەکەمی 2017، حكومەتی ئەوكاتەی هەرێم بە سەرۆکایەتی نێچیرڤان بارزانی راگەیەنراوێكی بڵاوكردەوەو ئەنجامەكانی ریفراندۆمەكەی 25ی ئەیلولی سڕكرد و داوای گفتوگۆی لەحكومەتی عیراق كرد.