گه‌ڕان

Shadow Shadow
سیاسه‌تی

لەساڵیادی ڕیفراندۆمدا سەرۆکایەتیی هەرێم هیچ پەیامێکی نییە

2020.09.25 - 14:17
لەساڵیادی ڕیفراندۆمدا سەرۆکایەتیی هەرێم هیچ پەیامێکی نییە

ناس کورد-

لەسێیەمین ساڵیادی ڕیفراندۆمدا، تائێستا سەرۆکایەتیی هەرێمی کوردستان هیچ پەیامیکی لەوبارەیەوە نییە و جگە لە پارتیش زۆرینەی حزبەکانی دیکە بێدەنگن و هاسەرۆکانی یەکێتیش یەکێکیان بە شکستیکی گەورە ناوی دەبات و یەکێکیشیان بێدەنگی هەڵبژاردووە.

 

ئەمڕۆ هەینی 25ی ئەیلولی 2020، سێ ساڵ بەسەر ئەنجامدانی ڕیفراندۆمی هەرێمی کوردستاندا تێپەڕدەبێت، ئەو ڕیفراندۆمەی بەشێک لە کورد بە ڕۆژێکی مێژوویی ناویدەبات و بەشێکی دیکەش پێیانوایە، شکستێکی گەورە بوو.

 

مەسعود بارزانی ئەوکات وەک سەرۆکی هەرێم ئەندازیاری ریفراندۆمەکە بوو، لەسەرەتاوە ئەگەرچی هەندێک لایەن لەگەڵ کاتی ئەنجامدانیدا نەبوون، بەڵام دواتر زۆرینەیان چوونە پاڵی و دەنگیان بە بەڵێ دا.

 

لە یەکەمین پەیامدا، مەسعود بارزانی، سەرۆکی پارتی دیموکراتی کوردستان لە تویتەری خۆی وێنەیەکی خۆی بڵاوکردەوە و  بە زمانی ئینگلیزی نوسیویەتی: "خۆ ناچەمێنین". 

 

هەر ئەمڕۆ هەینی، مەسرور بارزانی، سەرۆکی حکومەتی هەرێم لە پەیامیکدا ڕایگەیاند: "بەرز و پایەدار بێت یادی پڕ شکۆی ڕیفراندۆم، یادی دەربڕینی هەستی ئازادیخوازانەی گەلی کوردستان، هیوادارم هەموو ئاوات و مافە ڕەواکانی گەلەکەمان بە شێوەیەکی ئاشتییانە و سەردەمییانە بێنە دی."

 

لەگەڵ ئەوەی پارتی لە میدیاکانییەوە ڕۆژی ڕیفراندۆم بە ڕۆژێکی مێژوویی ناودەبات، بەڵام تاوەکو ئێستا نێچیرڤان بارزانی، سەرۆکی هەرێمی کوردستان و جێگری سەرۆکی پارتی لەو بارەیەوە بێدەنگە و هیچ پەیامێکی لەوبارەیەوە بڵاونەکردووەتەوە.

 

لەسەر ئاستی حزبەکانیش، لاهور شێخ جەنگی، هاوسەرۆکی یەکێتی لە پەیامێکدا ئەو رۆژەی بە شکستێکی گەورەزانی و ڕایگەیاند: ""25ی ئەیلولی 2017، ئەو ڕۆژەبوو کە چارەنوسی گەلی کوردستان و دەستکەوتەکانی، کران بە قوربانی لێکدانەوەی هەڵە و غروری چەند سیاسییەکی تێنەگەیشتوو و کاڵفام." 

 

ئاماژەی بەوەشكرد: "سەرباری شکستی ڕیفراندۆم و بێ هیواکردنی گەلێک لە سەربەخۆیی، بەڵام هەوڵەکانی یەکێتیی نیشتیمانیی کوردستان بۆ گەیشتن بە مافی ڕەوای چارەی خۆنوسین بەردەوام دەبێت."

 

پەیامەکەی لاهور شێخ جەنگیش پەیامێکی تایبەت بە خۆی بوو، نەوەک پەیامی فەرمی حزبەکەی و تاوەکو ئێستا هاوتاکەی کە بافڵ تاڵەبانییە بێدەنگی هەڵبژاردووە، بەڵام یەکێتی لە میدیاکانییەوە پرۆسەکە بە شکستخواردوو ناودەبات.  

 

جگە لە بافڵ تاڵەبانی، قوباد تاڵەبانی، جێگری سەرۆکی حکومەتیش لە پشکی یەکێتی بەهەمانشێوە بێدەنگە و تائێستا هیچ پەیامێکی لەوبارەیەوە بڵاونەکردووەتەوە. 

 

هاوکات هەریەک لە بزووتنەوەی گۆڕان، کۆمەڵی ئیسلامی، یەکگرتووی ئیسلامی و بزووتنەوەی ئیسلامی بەهەمانشێوە بێدەنگن و هیچ پەیامێکیان لەوبارەیەوە بڵاونەکردووەتەوە.

 

لە 25ی ئەیلولی 2017، ڕیفراندۆمی هەرێمی کوردستان ئەنجامدرا و تیایدا %92.7 دەنگیان بە بەڵێ دا بۆ سەربەخۆیی کوردستان، بەڵام بەهۆی لێكەوتەكانی ریفراندۆمەوە و دوای کەمتر لە مانگێک و لە شەوی 24ی تشرینی یەکەمی 2017، حكومەتی ئەوكاتەی هەرێم بە سەرۆکایەتی نێچیرڤان بارزانی راگەیەنراوێكی بڵاوكردەوەو ئەنجامەكانی ریفراندۆمەكەی 25ی ئەیلولی سڕكرد و داوای گفتوگۆی لەحكومەتی عیراق كرد.