گه‌ڕان

Shadow Shadow
سیاسه‌تی

پێش کۆبونەوەکەى شەممە واژوو بۆ گەڕانەوە بۆ یەک بازنەى هەڵبژاردنەکان کۆدەکرێتەوە

2020.09.24 - 15:40
پێش کۆبونەوەکەى شەممە واژوو بۆ گەڕانەوە بۆ یەک بازنەى هەڵبژاردنەکان کۆدەکرێتەوە

ناس کورد-

ئەندامێکى لیژنەى یاسایى لەپەرلەمانى عێراق جەخت لەسەر ئەوە دەکاتەوە، سێ ئاڕاستە لەبارەى دابەشکردنى بازنەى هەڵبژاردنەکانەوە لەئارادایە و واژووش بۆ گەڕانەوەى یەک بازنەى هەڵبژاردنەکان کۆکراوەتەوە.

 

حوسێن عەقابى، ئەندامى لیژنەى یاسایى لەپەرلەمانى عێراق بەمیدیاکانى وڵاتەکەى ڕاگەیاندووە، هیچ میکانیزمێکى ڕوون نیە بۆ دابەشکردنى بازنەى هەڵبژاردنەکان و 3 ئاڕاستە هەیە بۆ دابەشکردنى ئەوانەش ئاڕاستەیەک ڕووەو ئەوەیە بکرێتە 3 بۆ 5 بازنە و ئاڕاستەیەکى دیکەش لەگەڵ 5 بۆ 7 بازنەدایە و ئاڕاستەى سێیەمیش لەگەڵ گەڕانەوەیە بۆ یەک بازنەیى.

 

 ئاماژەى بۆ ئەوەش کردووە، ژمارەیەکى زۆرى لایەنە سیاسیەکان واژوویان کۆکردووەتەوە بۆ ئەوەى دەنگدان لەڕێگەى کارتى بایۆمەترییەوە بکرێت و لەدواى کۆبونەوەى سێ سەرۆکایەتیەکەش لەگەڵ سەرکردەى لایەنە سیاسیەکان جۆرێک لەڕێککەوتن هاتووەتە ئاراوە بۆ ئەوەى دەنگدان بەکارتى بایۆمەترى بێت.

 

ئەو پەرلەمانتارە باسى لەوەش کردووە، کۆکردنەوەى واژووى پەرلەمانتاران بۆ گەڕانەوەیە بۆ یەک بازنەى هەڵبژاردنەکان و ناکۆکیەکانیش لەسەر بازنەى هەڵبژاردنەکان هێشتا فراوان و گەوهەرى ئەو پرسەیە.

 

عەقابى پێشیوایە لەدوو ڕۆژى داهاتوودا لایەنەکان لەسەر بازنەى هەڵبژاردنەکان دەگەنە ڕێککەوتن.

 

بەگوێرەى داواکارییەکى محەمەد حەلبوسى سەرۆکى پەرلەمان بۆ پەرلەمانتاران، وابڕیارە ڕۆژى (شەممە) دانیشتنێکى پەرلەمان بەمەبەستى یەکلایى کردنەوەى ناکۆکییەکان لەسەر یاسای هەڵبژاردنەکان و خۆئامادەکردن بۆ هەڵبژاردنى پێشوەختە لەساڵى داهاتودا بەڕێوەبچێت.