هەرێم بۆ بەنێودەوڵەتیكردنی دەروازەكانی چاوەڕوانی واژوویەكی عادل عەبدولمەهدییە

کەناڵی ناس کورد لە تێلیگرام جۆین بکە   

ناس كورد–فوئاد عەبدوڵا
چوار دەروازەی سنوری لاوەكی لە سنوری پارێزگای سلێمانی بۆ بوون بە نێودەوڵەتییان چاوەڕوانی واژوو و رەزامەندی عادل عەبدولمەهدی سەرۆك وەزیرانی عێراق دەكەن.

.

سالار عەبدوڵا ئەندامی دەستەی دەروازە سنورییەكانی عێراق تایبەت بەناس كورد-ی ڕاگەیاند "دوای سەردانیكردنی شاندێكی فەرمی حكومەتی عێراقی كە نوێنەری 12 وەزارەتی لەخۆگرتبوو بۆ بەسەركردنەوەی چوار دەروازەی سنوری لاوەكی پارێزگای سلێمانی، ئەو لیژنەیە بەكۆی ئەندامانی ڕەزامەندی دەربڕیوە لەسەر بە نێودەوڵەتیكردنیان ".

.

ئاماژەی بەوەش كرد، شاندە فەرمییەكە ڕۆژی (پێنجشەممە)ی ڕابردوو راپۆرتی خۆیان بەرزكردۆتەوە بۆ دكتور كازم عیقابی سەرۆكی دەستەی دەروازە سنورییەكانی عێراق و ئەنجومەنی دەستەكەش كە لە 24 نوێنەری وەزارەت و دەستە پێكهاتووە لەكۆبوونەوەی خۆیاندا بەكۆی دەنگ ڕەزامەندیان نیشانداوە لەسەر بەنێودەوڵەتیكردنی ئەو چوار دەروازەیە.

.
رۆژی 10ی نیسانی 2019 شاندێكی فەرمی حكومەتی عێراق كە لە نوێنەری 12 وەزارەت پێكهاتبوو سەردانی پارێزگای سلێمانیان كرد و لە نزیكەوە دەروازەكانی پشتە و كێلێ و سەیرانبەن و تەوێڵەیان بەسەركردەوە بەمەبەستی ئامادەكردنی راپۆرتێك لەبارەی بەنێودەوڵەتیكردنیان.

.

ئەندامەكەی دەستەی دەروازە سنورییەكانی عێراق روونیكردەوە، ئەنجوومەنەكە لەم ڕۆژانەدا نووسراوی ڕەزامەندی خۆی بەرزكردۆتەوە بۆ ئەنجوومەنی وەزیران تا عادل عەبدولمەهدی سەرۆك وەزیرانی عێراق دوا بڕیاری ڕەزامەندی خۆی لەبارەیەوە بدات و فەرمانی نێودەوڵەتیبوونی ئەو دەروازانە بەفەرمی بدات.

.