گه‌ڕان

Shadow Shadow
سیاسه‌تی

مەسرور بارزانی ’’نیگەرانە لە سیاسەتی تەعریب و دەستدرێژی’’ بۆسەر کورد

2020.09.22 - 16:21
مەسرور بارزانی ’’نیگەرانە لە سیاسەتی تەعریب و دەستدرێژی’’ بۆسەر کورد

ناس كورد-

مەسرور بارزانی، سەرۆکى حکومەتی هەرێم لەگەڵ جەیمس جێفری، نوێنەری تایبەتی ئەمریکا بۆ کاروباری سوریا و هاوپەیمانێتی نێودەوڵەتی دژی داعش کۆبووە و ڕایگەیاند، "نیگەرانە لە سیاسەتی تەعریب و دەستدرێژی بۆسەر موڵک و زەوی دانیشتوانی کوردی ناوچە کوردستانییەکانی دەرەوەی هەرێم". 

 

بەپێی ڕاگەیەنراوی کۆبوونەوەکەى ئەمڕۆ سێشەممە، 22ی ئەیلولی 2020، "گفتوگۆ دەربارەی گۆڕانکاری و پێشهاتەکانی عێراق و سوریا و گرنگیی هاوکاریکردنی هێزی پێشمەرگە و سوپای عێراق کرا بۆ ڕوبەڕوبوونەوەی هەڕەشەکانی داعش کراوە." 

 

هەر بەپێی ڕاگەیەنراوەکە، جەیمس جێفری ڕۆڵی مەسعود بارزانی و حکومەتی هەرێم لە لەیەک نزیکردنەوەی هێزەکانی ڕۆژئاوای کوردستانی بەرز نرخاند و جەختی لە پشتیوانیی ئەمریکا بۆ هەرێمی کوردستان کردەوە و وتی ”هەرێمی کوردستان بە هۆی هەمەڕەنگی و زیندوویتی و دۆستایەتییەکەی لە گەڵ ئەمەریکا و وڵاتانی ڕۆژئاوا، پێگەیەکی گرنگ و ستراتیجی لە ڕۆژهەڵاتی ناوەڕاستدا هەیە“ .

 

ئاماژەى بەوەشکردووە، مەسرور بارزانی وێڕای سوپاسکردنی پشتیوانیی ئەمەریکا، باسی لە دۆخی ئێستای عێراق و ناوچەکە و پەیوەندییەکانی نێوان هەرێمی کوردستان و حکومەتی فیدراڵی و ئاماژەی بەوەدا کە "پرۆسەی گفتوگۆ لەگەڵ بەغدا بەردەوامە بە ئامانجی گەیشتن بە چارەسەرێکی بنەڕەتییانەی کیشەکان لەسەر بنەمای دەستور."

 

هاوکات جەختیشی "لە گرنگیی بەردەوامبوونی هەماهەنگیی ئەمنیی نێوان هێزی پێشمەرگە و سوپای عێراق کردەوە بەتایبەتی لە ناوچە کوردستانییەکانی دەرەوەی ئیدارەی هەرێم بۆ ڕووبەڕووبوونەوەی هەڕەشەکانی داعش."

 

هەروەها سەرۆکی حکومەت "نیگەرانی خۆشی بەرامبەر بەردەوامبوونی سیاسەتی تەعریب و دەستدرێژی و هەڵکوتانە سەر موڵک و زەوی دانیشتووانی کوردی ناوچە کوردستانییەکانی دەرەوەی هەرێم دەربڕی."