گه‌ڕان

Shadow Shadow
سیاسه‌تی

’’فشارى زیاتر بۆ سەر کازمى’’

ئێران ستراتیژیى هێرشى گروپە چەکدارەکانى لە عێراق دژى ئەمریکا ’’دەگۆڕێت’’

2020.09.22 - 10:50
ئێران ستراتیژیى هێرشى گروپە چەکدارەکانى لە عێراق دژى ئەمریکا  ’’دەگۆڕێت’’

ناس کورد-

 

ئێران بڕیاریداوە ستراتیژەکەى لە عێراق لەبارەى ئەو هێرشە سەربازییانەى گروپە چەکدارەکانى ئەنجامى دەدەن دژى هێزەکانى ئەمریکا بگۆڕێت، چونکە ترسی هەیە ئەو کارە یارمەتى هەڵمەتى دوبارە هەڵبژاردنەوەى دۆناڵد ترەمپ بدات لە هەڵبژاردنى سەرۆکایەتیدا، ئەوەش بەپێی رۆژنامەى (وۆڵ ستریت جۆرناڵ) ى ئەمریکى.

 

بەپێی راپۆرتێکى رۆژنامەکە، هەندێ بەرپرس و شیکەرەوەى ئەمریکى باسیان لەوەکردووە، پێناچێت ئێران و گروپە چەکدارەکانى هیچ هێرشێک ئەنجام بدەن کە کاریگەریى ئەرێنى هەبێت لەبارەى کۆکردنەوەى پشتیوانى بۆ دۆناڵد ترەمپ لەچەند هەفتەى داهاتوودا کە دەچێتە هەڵبژاردنى سەرۆکایەتییەوە.

 

لە دوو مانگى ڕابردوودا هێرشە موشەکییەکان لەلایەن میلیشیاکانى سەر بە ئێرانەوە بۆ سەر بنکە سەربازییەکانى ئەمریکا لە عێراق روویان لە زیادبوون کرد، بەڵام بەم دواییانە هێرشەکان کەمبوونەوە.

 

بەرپرسانى سەربازى ئەمریکى دەڵێن، لەو جۆرە هێرشانەدا دەکرێت 20 موشەک یان زیاتر لەیەک هێرشدا بەکاربهێنرێن، بەڵام لە ئێستادا لە هێرشەکاندا سێ بۆ پێنج موشەک بەکاردەهێنرێن.

 

دەشڵێن "ئێران هەوڵدەدات لە رێگەى ئەو هێرشە سوکانەوە ئەوە دەربخات کە هێشتا هەڕەشە دەکات، بەڵام شتێکى ئەوتۆ ناکات کە ببێتە هۆى وەڵامدانەوەى سەربازى وەکو بە ئامانج گرتنى سەربازانى ئەمریکا".

 

یەکێک لەبەرپرسەکان وتى "کارەکە زیاتر پەیوەستە بە ناردنى پەیامەوە نەک خواستى زیان پێگەیاندن".

 

بەشێک لە چاودێران پێیانوایە، ئێران نایەوێت رێوشوێنێک بگرێتە بەر کە هانى ئەمریکا بدات پلانى کشانەوەى هێزەکانى بگۆڕێت، بەتایبەتى کە بەرپرسانى تاران چەندینجار جەختیانکردووەتەوە کە دەیانەوێت ئەمریکا لەعێراق بچێتە دەرەوە.

 

جینیفەر كافاريلا یاریدەدەرەى ئاسایشى نیشتیمانى لە پەیمانگاى واشنتن ڕایگەیاند "ئەوەى پێویستە پێشبینی بکرێت لەجیاتى ئەوە، زیادبوونى فشارى ئێرانە بۆ سەر مستەفا کازمى سەرۆکوەزیران و پشتیوانە سیاسییەکانى، کە وەک بزوێنەرێکى نوێى فشارى ئەمریکى بۆ سەر تاران دادەنرێن".

 

لەبەرانبەردا بەشێک لە فەرماندە سەربازییەکانى ئەمریکا لەسەروى هەمویانەوە مارک میلى سەرۆکى دەستەى ئەرکانى هاوبەش، فرانک ماکنزى سەرۆکى فەرماندەیی ناوەندى ئەمریکا کە بەرپرسە لە پڕۆسە سەربازییەکان لە رۆژهەڵاتى ناوەراست و ئەففانستان، پێیانوایە هەڕەشەکانى ئێران تا ئێستا بەردەوامە.