گه‌ڕان

Shadow Shadow
سیاسه‌تی

سناپ باك.. ئەو سزايانەى ئەمريكا لەسەر ئێراندا دەيسەپێنێت چين؟

2020.09.20 - 18:10
سناپ باك.. ئەو سزايانەى ئەمريكا لەسەر ئێراندا دەيسەپێنێت چين؟

ناس کورد- 

ئەمڕۆ مايك پۆمپيۆ وەزیری دەرەوەی ئەمریکا ڕایگەیاند، وڵاتەکەی دوبارە سەرجەم سزاکان بەسەر ئێران دەسەپێنێتەوە و هۆشداریشیدا لە پابەندنەبونی نەتەوە یەکگرتووەکان بەو سزایانەوە.

 

لە گرنگترين سزا نێودەوڵەتيەكان كە میکانیزمى پەلەپيتكە "سناب باك"يش لەخۆ دەگرێت و ئەمريكا چالاكى كردوە لەسەر ئێران بەهۆى پێشێلكردنى بەندەكانى ڕێكکەوتنى ئەتۆمى، بريتين لە:

 

1- وەستاندنى سەرجەم چالاكيیە ئەتۆميەكانى تايبەت بە پيتاندنى يۆرانيۆم و چارەسەركردنەوە لەنێويشياندا گەڕان و گەشەپێدان و قەدەغەكردنى هاوردەكردنى هەر شتێك كە هاوكار بێت لە گەشەپێدانى چالاكيیە ئەتۆميەكان، لەوانەش گەشەپێدانى سيستمى هەڵدانى چەكى ئەتۆمى، هەروەها ڕێگەگرتن لە ئێران بۆ گەشەپێدانى موشەكە بالستيەكانى.

 

2- قەدەغەكردنى گەشتى بەرپرسانى بەرنامە ئەتۆمى و موشەكيەكانى ئێران و سڕكردنى سەرچاوەكانيان.

 

3- قەدەغەكردنى فڕۆشتن و كڕينى چەك بە هەموو جۆرەكانيەوە و ڕێگەگرتن لە دەستاودەستپێكردنى لە ئێرانەوە و بۆ ناو ئێرانيش.

 

4- پشكنينى بارهەڵگرەكانى لە ئێرانەوە و بۆ ناو ئێرانيش لەلايەن دەوڵەتانى جيهانەوە و دەستبەسەردا گرتنى هەر پێويستيەك كە قەدەغە بێت.

 

5- قەدەغەكردنى هەناردەى نەوت و غازى ئێرانى.

 

6- سەپاندنى سزا بەسەر هەناردە نانەوتيەكانى ئێران وەك كالپترۆكيمياويەكان.

 

7- سەپاندنى سزاى دياريكراو بەسەر دەيان كەسايەتى و پێكهاتەكەكانى ئێران.

 

ئەوانە لە گرنگترين ئەو سزايانەن كە سناب باك لە خۆ دەگرێت "میکانیزمى گەڕانەوەى ئێران بۆ بارودۆخى پێشوى" و پێويستە سەرجەم لايەنە نێودەوڵەتيەكان و وڵاتانى جيهان پێوەى پابەند بن، ئەم سزايانەش زياتر ئێران لە جيهانى دەرەوە پەراوێز دەخات.

 

ئەمڕۆ (یەکشەممە، 20ی ئەیلولی 2020)، مایک پۆمپیۆ، وەزیری دەرەوی ئەمریکا لە تویتێکدا ڕایگەیاند "دوو دڵ نابین لە سەپاندنەوەی سزاکان بەسەر ئێران، پێشبینی  هەموو شتێکیش لە نەتەوە یەکگرتووەکان دەکەین، دەبێت وڵاتانی ئەندام بە تەواوەتی پابەندی ئەو سزایانە بن، لە ڕۆژانی داهاتوودا کۆمەڵێک ڕێکار لەو بارەیەوە جێبەجێ دەکەین بۆ سەپاندنی ئەو سزایانە و لێپێچینەوە لە سەرپێچیکاران".  

  

وتیشی "هەوڵەکان بەردەوام دەبێت بۆ ئەوەی ڕژێمی ئێران ناچار بکەین پابەندی ڕێککەوتنێکی گشتگیر بێت کە مەبەست لێی بەرپەرچدانەوەی دەستدرێژییەکانی ئەو وڵاتەیە لەگەڵ سنوردارکردنی تواناکانی لە بڵاوکردنەوەی پشێوی و خوێنڕشتن".