گه‌ڕان

Shadow Shadow
سیاسه‌تی

غالب محەمەد بۆ وەزیرێکی گۆڕان: ئێستا لەسەر ڕێبازی رێباز حەملانیت و زەردهەڵگەڕاویت

2020.09.17 - 19:46
غالب محەمەد بۆ وەزیرێکی گۆڕان: ئێستا لەسەر ڕێبازی رێباز حەملانیت و زەردهەڵگەڕاویت

ناس کورد-

غالب محەمەدی پەرلەمانتاری گۆڕان لە بەغدا نوسینێکی بەناونیشانی " بۆ وەزیرە زەرد هەڵگەڕاوەکەی بەرەی پارتی" ئاڕاستەی وەزیری ئاوەدانکردنەوەی هەرێم لەپشکی گۆڕان کرد و دەلێت، دیارە تۆ لەسەر ڕێبازی نەوشیروان مستەفا نەماویت، ئێستا لەسەر ڕێبازی ڕێباز حەملانیت.

 

غالب محەمەد، ئەندامی فراکسیۆنی گۆڕان لە پەرلەمانی عێراق لە هەژماری خۆی لەتۆڕی کۆمەڵایەتی فویسبوک بڵاویکردەوە: " وەزیرە زەرد هەڵگەڕاوە تەزیوەکەی دەستی پارتی، تۆ ئەگەر مەرد و جوامێر بویتایە تەنها بەیەک وشە بەرگریت لە ڕەوانشاد نەوشیروان مستەفا دەکرد کاتێک کەلە کەناڵەکەی نێچیرڤان بارزانیی پارتیەوە دوو کاتژمێر قسەلەبارەی نەوشیروان مستەفاوەکرا، وەک ئەوەی بڵێی هەڵهاتوی جەنگ بیت و تف لەقوڕگتدا وشکبوبێت بە ئێستاشەوە بێدەنگیت لەپێناو کورسیەکەت، دیارە تۆ لەسەر ڕێبازی نەوشیروان مستەفا نەماویت، ئێستا لەسەر ڕێبازی ڕێباز حەملانیت."

 

ئاماژەی بەوەشكردووە: "لەو ماوەی جەنابت وەک وەزیر دەست بەکاربویت ڕێگا و بانەکانی سلێمانی خراپتر بووە و ڕێگای  کەلار- سلێمانی بووە بەسەحرای عەرعەر لەم خەڵکە و هیچمان لەتۆ نەبینی، ڕێگای کەلار سلێمانی وەک ئەوەی چەن سەد مەترێک و بازگەیەکی تێدابێت دەبێت بەخێرای کیسەڵ بەسەریدا بڕۆیت هێندە چاڵ و چۆڵی تێدایە، نەک چاکنەکراوە بەڵکو زیاتر خراپ بووە."

 

غالب محەمەد کە نوسینەکەی ئاڕاستەی وەزیری ئاوەدانیکردنەوەی هەرێم کردووە لەپشکی گۆڕان ئاماژەی بەوەشكردووە: " بیستم جەبتان سەردانتانکردوە و بڕیاری دابینکردنی پارەتان داوە بۆ ئەوەی کار کردن لەو ڕێگا دەست پێبکاتەوە، بەڵام بە ئێستاشەوە یەک فلستان تەرخان نەکردوە، پێدەچێت دابینکردنی پارە وسفی سەرۆک وەزیرانی بوێت جەنابی وەزیر، باوازلەتونێلی دەربەندیخانیش بێنین کەنەک نەتوانی تونێلێک دروست بکەی، بەڵکو بەشەرمەوە بەناویدا تێدەپەڕیت."

 

ئەندامەکەی فراکسیۆنی گۆڕان لە پەرلەمانی عێراق باسی لەوەشكردووە: "جەناب بابیرت بخەمەوە لەم ماوەیەدا تونێلێکت کردەوە کە 152 ملیۆن دۆلاری  تێچووە بۆ ئەوەی مسرور بارزانی بەناویدا بڕوات، کاکی وەزیری زەرد هەڵگەڕاو هەرتۆنەبویت لەکۆبوونەوەی ئەنجومەنی وەزیراندا هێندە وەسف و ستایشی مسرور بارزانیت کردبوو وەزیرەکانی پارتی تەریق ببوونەوە، تۆ پێویستت بەپیاهەڵدانە لەلایەن هاو پیشەکانت لەپارتی و پیاوانی مەسرور بارزانی."

 

غالب محەمەد جەختیشیکردووەتەوە: "ئێمە بەڵێنمان بەنەوشیروان مستەفادا و لەسەر بەرنامەو ڕێبازەکەی بمێنینەوە و بیپارێزین، تا ئەوکاتەی دەتوانین خۆمان بەخاوەنیشی دەزانین، بۆیە ڕوبەڕوی ئەوکەسانەش دەبینەوە کە دژی ڕێباز و بەرنامەکەی ڕەوانشادن چ لەناو (پارتی و یەکێتی) بن چ لەناو (بزوتنەوەی گۆڕان)یشدا بێت،  ئێستا کەبەڕێژەیەکی  زۆر مرۆڤی زەرد هەڵگەڕاو و ڕوو زەرد زۆربووە و دژی بەرنامەو ڕێبازی ڕەوانشادن، ئەرکی من و ئەوکەسانەیە کەخۆیان بەشوێن کەوتەی ڕێبازی نەوشیروان مستەفا دەزانن ستۆپیان پێبکەین و ڕوی ڕاستەقینەیان دەربخەین بۆئەوەی ئەو بەرنامە بەکار نەهێنن بۆ گەیشتن بەپلەو پۆست و ئیشکردن لەپێناو ساڵانی داهاتوو بۆ خۆیان."

 

لەکۆتایی نوسینەکەشیدا ئاماژەی بەوەکردووە: "مرۆڤ کە ئیرادەو و هەڵوێستی نەبوو، ئەوا لەبەرامبەر پارەو ساماندا چۆک دادەدات، لوتی دەشکێت ئەوەش لەبارنامەی نەوشیروان مەستەفادا قابیلی قبوڵ نیە."

 

‎لەکابینەی نۆیەمی حکومەتی هەرێمی کوردستان، دانا عەبدولکەریم، لەپشکی بزووتنەوەت گۆڕان وەزیری ئاوەدانکردنەوەیە.