گه‌ڕان

Shadow Shadow
سیاسه‌تی

باس لە هەرێمى کوردستانیش دەکات

ماڵپەرێکى ئەمریکى ’پلانێک’ بۆ روبەڕوبونەوەى گروپە چەکدارەکانى عێراق پێشنیار دەکات 

2020.09.17 - 11:51
App store icon Play store icon Play store icon
ماڵپەرێکى ئەمریکى ’پلانێک’ بۆ روبەڕوبونەوەى گروپە چەکدارەکانى عێراق پێشنیار دەکات 

ناس کورد-

میدیایەکى ئەمریکى پلانێک بۆ بەرەنگاربوونەوەى میلیشیاکانى سەر بەئێران لەعێراقدا لەلایەن ئەمریکاوە، پێشنیار دەکات.

 

کەناڵی ناس کورد لە تێلیگرام جۆین بکە   

لەڕاپۆرتێکیدا ماڵپەڕێکى ئەمریکى ئەوەى ڕاگەیاندووە، دواى کەمکردنەوەى هێزەکانى لەعێراق، ئەمریکا لەڕێگەى بەکارهێنانى تەکنەلۆژیا و هەواڵگرییەوە بەرپەرچى هێرشى میلیشیاکانى سەر بەئێران لەعێراقدا بداتەوە و بۆ سەلامەتى هێزەکانیشى دەتوانێت لەهەرێمى کوردستان، بڵاوەیان پێ بکاتەوە.

 

لەڕاپۆرتەکەیدا ماڵپەڕى (زا هيل) ئاماژەى بۆ ئەوە کردووە، ویلایەتە یەکگرتووەکانى ئەمریکا دواى کەمکردنەوەى هێزەکانى لە 5 هەزار و 200 سەربازەوە بۆ نزیکەى 3 هەزار سەرباز، ئەمریکا دووچارى قۆناغێکى یەکلاکەرەوە دەبێت لەعێراقدا بۆیە ناچارە کارى زۆرتر بەکەمترین تیچو و وزە ئەنجام بدات بەتایبەت دواى زیادبوونى هێرشە موشەکییەکان بۆ باڵیۆزەکەى لەبەغدا لەلایەن میلیشیاکانى سەر بە ئێرانەوە.

 

ماڵپەڕەکە جەختى لەسەر ئەوەش کردووەتەوە، دواى تێکشکاندنى داعش لەساڵى 2017 و لەدەستدانى هەموو ئەو ناوچانەى لەژێر دەستى دابوو، هێزە عێراقییەکان کە لەلایەن هێزەکانى ئەمریکا مەشق و ڕاهێنانیان پێدەکرێت دەتوانن شانە نوستووەکانى داعش لەعێراق و سوریا تێکبشکێنن.

 

ئاماژەى بۆ ئەوەش کردووە، ئەو ئاڵنگارییەى کە ئێستا واشنتۆن لەبەغدا دووچارى بووەتەوە، بەرەنگاربوونەوەى هێرشە موشەکییەکانە لەلایەن میلیشیاکانى سەر بەئێران و مەترسیەکانى ڤایرۆسى کۆرۆنایە.

 

ماڵپەڕە ئەمریکییەکە باسى لەوەش کردووە، ویلایەتە یەکگرتوەکانى ئەمریکا و هێزەکانى هاوپەیمانان 8 بنکەى سەربازیان ڕادەستى حکومەتى عێراقى لەماوەى 4 مانگى ڕابردوودا کردووە، ئەوەش بەو واتایە کە هێزەکانى ئەمریکا تەنها لەچەند شوێنێکى کەم لەعێراقدا ماونەتەوە بەبەغدا و بنکەى ئاسمانى ئەسەد و بنکەکانى دیکە لەهەرێمى کوردستانەوە، ئەمەش واى کردووە واشنتۆن پێویستى بە کارى زۆرتر و بەسەرچاوەى کەمتر هەبێت لەعێراقدا.

 

ئەو میدیا ئەمریکییە هەروەها جەختى لەسەر ئەوەش کردووەتەوە، ئەمریکا لەعێراقدا خاوەن ئامێر و تەکنەلۆژیایە و دەتوانێت لەڕێگەى بەکارهێنانى درۆنەکان و هەواڵگرییەوە بەو کارە هەستێت.

 

ئەوەش خراوەتە ڕوو، درۆنەکان شەڕەکان نابەنەوە بەڵام ئەمریکا لەشەڕێکى گەورەدا نیە لەعێراق بەڵکو رێکخستنەکانى داعش ئەمڕۆ پێکهاتوون لەگروپى بچوک کە خۆیان لەکێو و دۆڵەکاندا شاردووەتەوە.

 

(زا هيل) ئەوەشى دەرخستووە، پاراستى دەستکەوتى شکستهێنانى داعش و بەرقەراربوونى عێراق پێویستى بەمەشق و ڕاهێنانى زیاترى هێزە عێراقییەکان هەیە ئەوە تەنها سوپاى عێراقى ناگرێتەوە بەڵکو دەبێت هێزەکانى پێشمەرگەش بگرێتەوە و پەتاکە ئەو ڕاهێنانەى ڕاگرتووە هێشتا ڕوون نییە کەى دەست بەتەواوکردنەوەیان دەکرێت.

 

ماڵپەڕەکە دەشڵێت، ئەمریکا پێویستى بەستراتیژى بەربەستدانان بۆ ئێران و میلیشیاکانى هەیە بۆ ڕاگرتنى ئەو هێرشە موشەکیانە و ئاماژەى بەبەکارهێنانى سیستمى C- RAM کردووە بۆ بەربەستدانان لەبەردەم موشەکەکاندا کە 14ى مانگى ئەیلول بەرەو ناوچەى سەوز وەشێنران و ئەوەش نمونەیەکە لەسەر چۆنیەتى بەرگریکردن لەو موشەکانە بەتەکنەلۆژیاییەکى بەرزەوە.

 

لەکۆتایى ڕاپۆرتى میدیا ئەمریکیەکەشدا ئاماژە بۆ ئەوە کراوە، داخستنى ژمارەیەک لەبنکە و پێگەکان لەئامانجگرتنى میلیشیاکان کەمدەکاتەوە و بڵاوەپێکردنى هێزەکانى ئەمریکا لەهەرێمى کوردستان سەلامەتى زیاتر فەراهەم دەکات.