گه‌ڕان

Shadow Shadow
سیاسه‌تی

لەسەر کەمکردنەوەی بەرهەمهێنانی نەوت کازمی و وەزیری نەوت دژی یەک دەوەستنەوە

2020.09.11 - 16:23
لەسەر کەمکردنەوەی بەرهەمهێنانی نەوت کازمی و وەزیری نەوت دژی یەک دەوەستنەوە

ناس کورد-

بەگوێرەی میدیا جیهانییەکان، مشتومڕەکانی نێوان دەسەڵاتدارانی حکومەتی عێراق لە بارەی پابەندبوون بە بڕیارەکەی ( ئۆپێک پلەس) لە زیادبووندایە و لەسەر ئەو پرسە ناکۆکی لەنێوان سەرۆکوەزیران و وەزیری نەوتدا دروست بووە و سەرۆکوەزیران دەیەوێت پابەندبن و وەزیری نەوتیش بەپێچەوانەوە. 

 

ئاژانسی"ڕوێتەرز" بڵاویکردووەتەوە:  "دوای بەرزبوونەوەی نرخی نەوت بۆ سەروو 40 دۆلار، بەرهەڵستییەکان لە ناو حکومەتی عێراق دژ بەبڕیارەکەی ڕێکخراوی ئۆپێک زیادیانکردووە و داوادەکرێت عێراق لەکەمکرنەوەی بەرهەمی نەوتەکەی بەشێوەیەکی جیاواز لەئەندامانی دیکەی ڕێکخراوەکە ببخشرێت".

 

ئاماژەی بەوەشکردووە: "پابەندبوون بە بڕیارەکەی ڕێکخراوی وڵاتانی بەرهەمهێنی نەوت (ئۆپێک) عێراقی دوچاری ئاڵنگاری سەخت کردووەتەوە،چونکە عێراق لە 97 %ی  بودجەکەی لەڕێگەی هەناردەکردنی نەوتەکەیەوە دابین دەکات".

 

عێراق لە ساڵی 2016 لە یەکەم ڕێکاری کەمکردنەوەی نەوتی ڕێکخراوی ( ئۆپێک) بەسەرکردایەتی ڕوسیا نەیتوانیوە پابەندی بڕیارەکان بێت. 

 

ڕۆیتەرز ئاماژەی بەوەکردووە: ""دۆخی ئابوری سەختی عێراق بەهۆی شەڕە بەردەوامەکانییەوە و دواکەوتن و لاوازی ژێرخانی کەرتی نەوت، وایکردووە عێراق دوچاری داتەپینی ئابوری ببێتەوە، بەجۆرێک لە ئێستادا قەرزە دەرکییەکانی عێراق گەیشتووەتە نزیکەی 133 ملیار دۆلار ".

 

بەرپرسێکی باڵای عێراق کە نەیوستووە ناوی ئاشکرابکرێت بە ئاژانسەکەی وتووە: "مشتومڕەکانی نێوان نوسینەکەی سەرۆکوەزیرانی عێراق و وەزارەتی نەوت لەسەر پرسی پابەندبوون و پابەندنەبوون بە بڕیارەکەی ئۆپێک  قوڵبووەتەوە، ئەنجومەنی وەزیران لەگەڵ پابەندبوونە بە بڕیارەکە، بەڵام وەزارەتی نەوتی عێراق پێیوایە کە دەبێت لەبەر ئەو قەیرانە داراییەی کە دوچاری حکومەت بووەتەوە  نابێت پابەندی بڕیارەکە بن".

 

ئەمە لەکاتێکدایە، هەفتەی پێشوو عاسم جیهاد، وتەبێژی وەزارەتی نەوتی عێراق بە میدیاکانی ڕاگەیاندبوو، عێراق لە هەوڵی ئەوە دایە بتوانێت لەچارەکی یەکەمی ساڵی 2021 دا لە بڕیارەکەی ئۆپێک ببخشرێت".

 

بەگوێرەی پێشبینییەکانی بانکی نێودەوڵەتی، ئابوریی عێراق لە ساڵی 2020 بەڕێژەی 7.9% دابەزینی بەخۆیەوە دیوە، ئەوەش بەهۆی دابەزینی نرخی نەوت و بڵاوبوونەوەی ڤایرۆسی کۆرۆناوە بووە، ئەمە لەکاتێکدا کە ئابوری عێراق لەساڵی 2019 بەڕێژەی4.4 %دا گەشەی کردبوو.