گه‌ڕان

Shadow Shadow
سیاسه‌تی

رێواز فایەق لە پەرلەمانتارێکى یەکێتى توڕە دەبێت

داوادەکرێت پەرلەمان بە غیابى لێپرسینەوە لە وەزیرى دارایی بکات

2020.09.08 - 14:45
داوادەکرێت پەرلەمان بە  غیابى  لێپرسینەوە لە وەزیرى دارایی بکات

ناس کورد-

پەرلەمانتارێکى یەکێتى لە پەرلەمانى کوردستان داوا دەکات پەرلەمان بە "غیابى" لێپرسینەوە لەوەزیرى دارایی بکات لەبارەى موچەى فەرمانبەرانەوە، سەرۆکى پەرلەمانیش داوایکرد یاداشت لەو بارەیەوە بەرزبکاتەوە بۆ ئەوەى بڕیارى لەسەر بدرێت.

 

کاروان گەزنەیی، پەرلەمانتارى یەکێتى لەکۆبوونەوەى ئەمڕۆى پەرلەمانى کوردستاندا ڕایگەیاند، لەمانگى 12ى ساڵى ڕابردووەوە وەک 23 پەرلەمانتار داواى پرساندنى وەزیرى داراییان کردووە لەبارەى موچەى فەرمانبەران و دواکەوتن و پاشەکەوتى موچەوە.

 

وتیشى "وەزیرى دارایی تەنها بۆى هەیە 14 رۆژ پرساندنەکە دوابخات، بەڵام تا ئێستا  ئەوە نەکراوە و سەرۆکى پەرلەمان نەیخستووەتە بەرنامەى کارەوە".

 

ئەو پەرلەمانتارە سەرۆکایەتى پەرلەمانى بە "پێشێلکردنى پەیڕەوى ناوخۆ" تۆمەتبارکرد و باسى لەوەشکرد، پرسیار ئاڕاستەى وەزارەتى کارەبا کراوە بەڵام سەرۆکایەتى پەرلەمان ئاڕاستەى وەزیرى شارەوانى کردووە ئەویش وەڵامیداوەتەوە کە ئەوە پەیوەندى بەئەوەوە نییە.

 

ئەوەشى خستەڕوو، جگە لەوە پرسیار لە وەزیرێک کراوە ئەویش وتویەتى لەراگەیاندن وەڵامیداتەوە، ئەوەش "سوکایەتییە" بە پەرلەمانتاران.

 

لاى خۆیەوە رێواز فایەق سەرۆکى پەرلەمان قسەى بە پەرلەمانتارەکەى یەکێتى بڕى بە پاساوى ئەوەى "نوقتەى نیزامى" وەرناگرێت و وتى "کە من قسە دەکەم تۆ قسە مەکە".

 

هەروەها داواى لەو پەرلەمانتارە کرد یاداشت پێشکەش بکەن بۆ ئەوەى بەشێوەى "غیابى" پرسینەوە لە وەزیرى دارایی بکرێت.

 

سەرۆکى پەرلەمان باسى لەوەشکرد، بۆ بەدواداچوونى وەڵامنەدانەوەى پرسیارەکانى پەرلەمانتاران و ئەو کێشانەى باسدەکرێن لەو بارەیەوە، سکرتێرى پەرلەمان راسپێردراوە بەدواداچوون بکات.