گه‌ڕان

Shadow Shadow
سیاسه‌تی

هۆكارەكانى سەركەوتنى ژنانى سەركردە بەسەر کۆرۆنادا چين؟

لێکۆڵینەوەیەک هۆکاری سەرکەوتنی ئەو وڵاتانەی سەرۆکەکانیان ژنە بەسەر کۆرۆنادا ئاشکرادەکات

2020.09.05 - 20:45
لێکۆڵینەوەیەک هۆکاری سەرکەوتنی ئەو وڵاتانەی سەرۆکەکانیان ژنە بەسەر کۆرۆنادا ئاشکرادەکات

ناس کورد- 

بەپێى لێكۆڵينەوەيەكى هەردوو زانكۆى "ليڤەرپوڵ" و "ڕيدينگ"ى بەريتانى، ئەو وڵاتانەی ژنان سەرۆكايەتیيان دەكەن سەركەوتوو بوون لە كۆنتڕۆڵكردنى پەتاى كۆرۆنا و ژمارەى گيانلەدەستدان تێياندا نيوەى وڵاتانی دیکەی  جيهانە.

 

بەپێى لێكۆڵينەوەكە كە پێگەى "بلومبێرگ" بڵاويكردوەتەوە، لێكۆڵينەوە لەسەر داتاكانى سەرەتاى بڵاوبوونەوەى ڤايرۆسى كۆرۆنا تا 19ى مانگى ڕابردوو كراوە و بەراورد لەنێوان 19 وڵات كە ژنان دەيبەن بەڕێوە و وڵاتانی دراوسێيان كراوە.

 

ڕونيشكراوەتەوە، هۆكارى ئەوەى ژنان لە ئيدارەدانى قەيرانى كۆرۆنادا سەركەوتوو بوون دەگەڕێتەوە بۆ زوو گرتنەبەرى كەرەنتينە و داخستن و ڕێوشوێنەكانى تر، بەهۆى ئەوەشەوە لە كاتى ترۆپكى بڵاوبوونەوەى پەتاكە، توشبووان لە وڵاتەكانيان كەمبوون .

 

ئەوەش هاتووە، وەڵامدانەوەى سەركردە ژنەكان خێراترە، لەوانەيە بەهۆى ئەوەوە بێت كە ژنان زووتر وەڵامى مەترسیيەكان دەدەنەوە بەشێوەيەكى گشتى، ئەوەش بەپێى چەندين لێكۆڵينەوە كە لەو بارەيەوە كراون.

 

بەهۆى ڕێوشوێنەكان و داخستن و كەرەنتينە ژمارەى توشبووان كەمدەبێتەوە، بەڵام مەترسى لەسەر ئابوريى دروست دەكات، بەپێى لێكۆڵينەوەكە ژنانى سەركردە لەكاتى بڵاوبونەوەى كۆرۆنادا لەوەشدا سەركەوتوو بوون.

 

ئەو لێكۆڵينەوە بەريتانيیە هێماى بۆ ئەوەشكردوە، بەشێوەيەكى گشتى ژنان سەركێشى كەمتر دەكەن كاتێك باتەكە پەيوەندى بە تەندروستييەوە هەيە، بەڵام لەلايەنى داراييدا سەركێشى گەورەتر دەكەن، پياو بەپێچەوانەى ئەوەوەيە، بۆيە ژنان ڕێوشوێنى خۆپاراستنى خێراتر دەگرنەبەر و موجازەفەى گەورەى ئابورييان كرد بە داخستن و كەرنتينەى پێشوەخت.

 

تەئكيديش كراوەتەوە، هەروەها پەيوەندى سەركردە ژنەكان زۆر جياوازترە لەگەڵ هاووڵاتيان و شێوازێكى زياتر ديموكراتيیانە و هاوبەشانە پەيڕەو دەكەن، لەكاتێكدا پياوان زياتر شێوازى ئاراستەكردن پەيڕەو دەكەن.

 

سەرەڕاى ئەوانەش بارودۆخى هەر وڵاتێک جياوازە لەكاتى بڵاوبونەوەى پەتاى كۆرۆنا، ئەو وڵاتانەی ژمارەی دانيشتوانيان زۆرە پياوان بەڕێوەيان دەبەن، بەڵام سەركەوتنى ئەو 19 سەركردە ژنە لە كۆنترۆڵكردنى كۆرۆنا كارێكە پێويستى بە لێكۆڵينەوەى قوڵ هەيە.