گه‌ڕان

Shadow Shadow
سیاسه‌تی

تەندروستى جيهانى: پێش ئەم وادەيە ڤاكسين بەردەست نابێت

2020.09.04 - 17:04
تەندروستى جيهانى: پێش ئەم وادەيە ڤاكسين بەردەست نابێت

ناس کورد-

 

ڕێكخراوى تەندروستى جيهانى پێشبينى ناكات تا ناوەڕاستى ساڵى داهاتوو هيچ چارەسەرێك بۆ خۆپاراستن لە ڤايرۆسى كۆرۆناى نوێ COVID-19 بەردەست بێت.

 

مارگرێت هاريس وتەبێژى ڕێكخراوى تەندروستى جيهانى لە شارى جنێفەوە بە ڕۆژنامەنوسانى ڕاگەياند، "پێشبينى ئەوە ناكەين تا ناوەڕاستى ساڵى داهاتوو هيچ ڤاكسين و چارەسەرێك لەسەر ئاستێكى فراوان بۆ ڤايرۆسى كۆرۆنا بەردەستبێت".

 

ئاماژەى بەوەشداوە، ڤاكسينەكان گەيشتونەتە قۆناغى سێيەم و كاتى زياتريان دەوێت، پێويستمان بەوە هەيە بزانين كە ڕاستى پاراستنى ئەو ڤاكسينانەى دروست دەكرێت تا چەندن.

 

وتەبێژەكەى تەندروستى جيهانى تەئكيديشى كردوەتەوە، هەروەها پێويستە دڵنيابن ڤاكسينەكان پارێزراون "لە قۆناغى سێيەمى تاقيكردنەوە قەرەوێڵەييەكان پێش ڕەزامەنديدان لەسەر بەكارهێنانيان".

 

سەرەڕاى ئەوەى زياتر لە 9 مانگە ڤايرۆسى كۆرۆنا لە جيهاندا باوبووەتەوە، بەڵام ژمارەى توشبووانى ڤايرۆسەكە بەردەوامە لە بەرزبوەتەوە.

 

تائێستا زياتر لە 26 مليۆن و 500 هەزار توشبوو و نزيكەى 900 هەزار گيانلەدەستدان تۆماركراون و لەو ژمارەيەش نزيكەى 19 مليۆنى چاكبونەتەوە.

 

پێشتريش ڕێكخراوى تەندروستى جيهانى بڵاويكردەوە، 172 دەوڵەتى جيهان هاوكارن لە هەوڵەكان بۆ دروستكردنى ڤاكسين و داواشيكردبوو پارەى زياتر بۆ هەوڵەكان دابين بكرێن.