گه‌ڕان

Shadow Shadow
سیاسه‌تی

دوو وەزیرى کابینەکەی عەبدولمەهدی بەتۆمەتى کوشتنى خۆپیشاندەران بانگهێشتى لێکۆڵینەوە کران

2020.09.03 - 22:40
دوو وەزیرى کابینەکەی عەبدولمەهدی بەتۆمەتى کوشتنى خۆپیشاندەران بانگهێشتى لێکۆڵینەوە کران

ناس کورد- 

ئەنجومەنى باڵاى دادوەرى عێراق ڕایگاند، دوو وەزیرى پیشووى کابینەکەى عەبدولمەهدى لەپرسى تایبەت بەلێکۆڵینەوە لەکوشتنى خۆپیشاندەراندا بانگهێشتکراون، دەشڵێت، چەند کۆبوونەوەیەکى بەمەبەستى بردنەپێشەوەى کەیسى لێکۆڵینەوە لەتۆمەتبارانى خۆپیشاندانەکانى تشرینى عێراق لەگەڵ دەزگا ئەمنییە باڵاکاندا بەڕێوەبردووە.

 

 ئەمڕۆ پێنج شەممە، 3ى ئابى 2020، لەڕاگەیەنراوێکدا ناوەندى ڕاگەیاندنى ئەنجومەنى باڵاى دادوەرى عێراق ڕایگەیاند، فایەق زێدان، سەرۆکى ئەنجومەنەکە لەگەڵ  هەریەکە لە عەبدولوەهاب ساعدى، سەرۆکى دەزگاى بەرەنگاربوونەوەى تیرۆر و قاسم ئەعرەجیى، ڕاوێژکارى ئاسایشى نەتەوەیى و عەبدولغەنى ئەسەدى، سەرۆکى دەزگاى ئاسایشى نیشتیمانى، لەکۆبونەوەیەکدا  گفتوگۆى لەبارەى دۆسییەى بەدادگا گەیاندنى تۆمەتبارانى کوشتنى خۆپیشاندەرانەوە کردووە.

 

ئاماژەى بەشکردووە، ئامادەبووانى کۆبونەوەکە باسیان لە گرتنەبەرى ڕێوشوێنە یاساییەکانی پەیوەست بەڕوداوەکانى کوشتنى خۆپیشاندەران و کارمەندانى هێزە ئەمنیەکان کردووە. 

 

ئەنجومەنى باڵاى دادوەرى لەسەر زارى زێدانەوە بڵاویکردووەتەوە، دەستەى لێکۆڵینەوەى تایبەت بەو پرسانە فەرمانى دەستگیرکردنى بۆ چەند کارمەندێکى سەر بەوەزارەتەکانى بەرگرى و ناوخۆ دەرکردووە بەڵام بەپێى یاسا پێویستى بەڕەزامەندى فەرماندەى گشتى هێزە چەکدارەکان ( مستەفا کازمیى، سەرۆک وەزیران ) و وەزیرى ناوخۆ هەیە .

 

ئەنجومەنى باڵاى دادوەرى ئەوەشى خستووەتەڕوو، دەستەى لێکۆڵینەوەى یاسایى لەڕەسافە بۆ ڕوونکردنەوە و وەرگرتنى زانیارى پەیوەست بەلێکۆڵینەوە لەو پرسەدا، هەریەکە لە وەزیرەکانى ناوخۆ و بەرگریى سەردەمى کابینەکەى عەبدولمەهدى بانگهێشتکردووە.

 

لەسەردەمى کابینەکەى عادل عەبدولمەهدیدا، یاسین یاسرى وەزیرى ناوخۆ و نەجاح شەمەرى وەزیرى بەرگرى بوون.

 

ئەو دەزگا باڵایەى دادوەرى لەعێراق دەشڵێت، چەندین ئەفسەر بەمەبەستى لێکۆڵینەوە لەو پرسەدا ڕاگیراون و ژمارەیەک تۆمەتبارى دیکەش لەلایەن دادگاى تەمیزەوە وردبینى لەدۆسییەکانیاندا دەکرێت.

 

لەخۆپیشاندانەکانى ساڵى ڕابردوودا کە لەلایەن عێراقیە ناڕازییەکانەوە بەشۆڕشى تشرین ناو دەبرێت و لەو مانگەوە دەستیانپێکرد و ناو بەناو تا ئێستاش بەردەوامە، بەهۆى گازى فرمێسک ڕێژى هێزە ئەمنییەکان و تەقەى قەناس بەدەستە نەناسراوەکانەوە زیاتر لە 550 کەس کوژران و بەهەزارانیش بریندار بوون.

 

بەگوێرەى ڕاپۆرتە میدیایەکانیش، میلیشیاکانى سەر بەئیران لەعێراقدا بەشداریان لەسەرکوتکردنى خۆپیشاندەراندا کردووە و لەکۆتایى ساڵى ڕابردووشدا لەژێر فشارى خۆپیشاندەراندا کابینەکەى عەبدولمەهدى دەستى لەکارکێشایەوە.