گه‌ڕان

Shadow Shadow
سیاسه‌تی

ناوەکەى دەگۆڕدرێت

فەڕەنسا وێستگەی ئەتۆمی ’تەموز’ی عێراق زیندو دەکاتەوە

2020.09.02 - 21:34
فەڕەنسا وێستگەی ئەتۆمی ’تەموز’ی عێراق زیندو دەکاتەوە

ناس کورد-

سەرۆکوەزیرانی عێراق ڕایگەیاند، وڵاتەکەی لەهەوڵی ئەوەدایە عێراق ببێت بە ئەندام  لەیانەی وڵاتە ئەتۆمییەکان، هاوکات سەرچاوەیەکی ئاگادارلە ئەمیندارێتی ئەنجومەنی وەزیرانی عێراق بۆ ناس کوردی ئاشکرا کرد، زیندوکردنەوەی وێستگەی ئەتۆمی (تەموز) پرسێکی گرنگی گفتوگۆکانی نێوان کازمی  و ئیمانوئیل ماکرۆن، سەرۆکی فەرەنسا بووە.

 

دوای ئەوەی ئەمڕۆ (چوارشەممە) مستەفا کازمی، سەرۆکوەزیرانی عێراق لە کۆنگرەیەکی ڕۆژنامەوانی هاوبەشدا لەگەڵ سەرۆکی فەڕەنسا ویستی وڵاتەکەی نیشاندا لەپەرەپێدانی وزەی ئەتۆمی و بەئەندامبوون لە یانەی "وڵاتە ئەتۆمییەکان"، ئەمڕۆ(چوارشەممە، 2ی ئەیلولی 2020) سەرچاوەیەکی ئاگادارلە ئەمیندارێتی ئەنجومەنی وەزیرانی عێراق بە ناس کوردی ڕاگەیاند "دانوستانەکانی نێوان کازمی  و ماکرۆن دوور لەچوارچێوەی گشتی سەردانەکەی سەرۆکی فەڕەنسا، تاڕادەیەکی زۆرچڕکرا بوونەوە لەسەر زیندوکردنەوەی وێستگەی ئەتۆمی تەمموز".

 

سەرچاوەکە ئاماژەی بەوە کرد "ماکرۆن بە پەرۆشەوە زانیارییەکانی لەسەر ئەو وێستگە ئەتۆمییە خاپورکراوە لە سەرۆکوەزیرانی عێراق وەرگرتووە و پێیوابووە ئەو پڕۆژەیە  پەیوەندی نێوان فەڕەنسا وعێراق دەباتە قوناغێکی ستراتیژییەوە و زیاتر پتەوی دەکات".

 

بەوتەی سەرچاوەکە "هەردوولا کۆک بوون لەسەر بەکارهێنانی ئەو وێستگەیە بۆ چالاکییە ئاشتییە مەدەنییەکان لەژێر سەرپەرشتی نێودەوڵەتی، بڕیاریشە ناوی وێستگەکە لەتەمموزەوە بگۆڕدرێت بۆ (سەلام)".

 

ئەمە لە کاتێکدایە کە ئەمڕۆ (چوارشەممە، 2ی ئەیلولی 2020) ئیمانوئیل ماکرۆن، سەرۆکی فەڕەنسا لە میانی کۆنگرەیەکی ڕۆژنامەوانی هاوبەشدا لەگەڵ مستەفا کازمی، سەرۆکوەزیرانی عێراق لە بەغدای پایتەخت وتی "دەمانەوێت بەردی بناغەی پڕۆژەی گرنگ لەعێراقدا بەرجەستە بکەین بەتایبەتی پڕۆژەی شەمەندەفەری میترۆ و دروستکردنی وێستگەی ئەتۆمی بەمەبەستی پەرەپێدانی کەرتی کارەبا لەعێراق".

 

وتیشی "لەگەڵ سەرۆکوەزیرانی عێراق گفتوگۆیەکی چڕمان کردووە دەربارەی کۆتایهێنان بەهەڕەشەکانی ڕێکخراوی داعش، تواناکانمان دەخەینە گەڕ لەپێناو کۆکردنەوەی پاڵپشتی کۆمەڵگای نێودەوڵەتی بۆ عێراق، بەبڕوای ئێمە لەچەند مانگی داهاتوودا ئەو پرسە بەلای بەرژەوندییەکانی عێراقدا دەشکێتەوە".

 

عێراق لەساڵی 1976 بە هاوکاری کۆمپانیا فەڕەنسییەکان پڕۆژەی ئەتۆمی خۆی ڕاگەیاند، بەڵام لەساڵی 1981 فڕۆکەکانی ئیسرائیل لەهێرشێکی ئاسمانیدا بۆ سەر بەغدا بەتەواوی وێستگەی ئەتۆمی تەمموزیان خاپورکرد و ئەو پڕۆژەیان لەگۆڕنا.