گه‌ڕان

Shadow Shadow
سیاسه‌تی

دواى رەتکردنەوەى هەوڵى یەکەم لەلایەن سەرۆکایەتى پەرلەمانەوە

هەوڵێکى نوێ دەدرێت بۆ پرساندنى مەسرور بارزانى و قوباد تاڵەبانى و ئاوات شێخ جەناب  

2020.09.01 - 10:35
هەوڵێکى نوێ دەدرێت بۆ پرساندنى مەسرور بارزانى و قوباد تاڵەبانى و ئاوات شێخ جەناب  

ناس کورد-

 بڕیارە سبەینێ هەریەکە لە فراکسیۆنەکانى کۆمەڵ و یەکگرتوو جارێکى تر دەستبکەن بە کۆکردنەوەى واژۆ بۆ پرساندنى مەسرور بارزانى سەرۆکى حکومەت و قوباد تاڵەبانى جێگرى و ئاوات شێخ جەناب وەزیرى دارایی، لەسەر پرسی بڕینى بەشێک لە موچەى فەرمانبەران، دواى ئەوەى سەرۆکایەتى پەرلەمان یاداشتەکەى پێشووى رەتکردەوە.

 

لەچەند هەفتەى ڕابردوودا بە واژۆى 24 پەرلەمانتار یاداشتێک ئاڕاستەى سەرۆکایەتى پەرلەمان کرا بۆ پرساندنى ئەو سێ بەرپرسە باڵایەى حکومەت، بەڵام سەرۆکایەتى پەرلەمان بە پاساوى هەڵەى پەیڕەوى یاداشتەکەى رەتکردەوە.

 

سەرچنار ئەحمەد ،پەرلەمانتارى فراکسیۆنى یەکگرتوو لە پەرلەمانى کوردستان بە ناس  کوردى ڕاگەیاند "دواى رەتکردنەوەى یاداشتەکەمان لەلایەن سەرۆکایەتى پەرلەمانەوە، سبەینێ دەستدەکەینەوە بە کۆکردنەوەى واژۆ لەو بارەیەوە".

 

وتیشى "ئەمجارە سێ یاداشتى جیاجیامان ئامادەکردووە بۆ پرساندنى هەریەک لەو بەرپرسانە بەجیا، وەک ئەوەى سەرۆکایەتى پەرلەمان دیاریکردووە".

 

یاداشتەکەى پێشوو لەلایەن 24 پەرلەمانتارى فراکسیۆنەکانى کۆمەڵ و یەکگرتوو، سەربەخۆ، چەند پەرلەمانتارێکى یەکێتى و گۆڕانەوە واژۆکرابوو، بەڵام دیار نییە ئەمجارە چەند واژۆ کۆدەکرێتەوە.

 

بەگوێرەى پەیڕەوى ناوخۆى پەرلەمان، واژۆى 24 پەرلەمانتار رێژەیەکى یاساییە بۆ ئەوەى داواى پرساندنى بەرپرسانى حکومەت بکرێت بۆ پەرلەمان تا وەڵامى پرسیارى پەرلەمانتاران بدەنەوە.

 

"چاوەڕوانین ژمارەیەکى زیاتر واژۆ کۆبکرێتەوە، سبەینێ هەوڵەکانمان لەو بارەیەوە دەخەینەگەڕ"، سەرچنار ئەحمەد وایوت.

 

لەبارەى دەنگۆى فشارى سەر بەشێک لەو پەرلەمانتارانە تا ئەمجارە واژۆى لەسەر نەکەن، بەتایبەتى لەسەر پەرلەمانتارانى یەکێتى و گۆڕان، سەرچنار ئەحمەد وتى "ئێمەش لە راگەیاندنەوە بیستومانە کە فشاریان لەسەرە، بەڵام بەفەرمى هیچ یەکێکیان لە کێشانەوەى واژۆکەى ئاگادارینەکردوینەتەوە، سبەینێ یاداشتە نوێیەکە دەدەینە هەریەکەیان بۆدوبارە واژۆکردنى".