گه‌ڕان

Shadow Shadow
سیاسه‌تی

پەیامێک ئاڕاستەى دەسەڵات و ئۆپۆزسیۆن دەکات

هەدەپە داواى گەڕانەوە بۆ رێککەوتنى دۆلمەباخچە دەکات بۆ چارەسەرى پرسی کورد

2020.08.31 - 22:38
هەدەپە داواى گەڕانەوە بۆ رێککەوتنى دۆلمەباخچە دەکات بۆ چارەسەرى پرسی کورد

ناس کورد-

 

پارتى دیموکراتى گەلان هەدەپە پەیامێکى ئاراستەى دەسەڵات و ئۆپۆزسیۆنى تورکیا کرد و جەختیکردەوە دانوستانەکانی دۆلمەباخچە بۆ چارەسەری کێشەی کورد تا ئێستاش لەجێی خۆیدایە.

 

هاوسەرۆکانى هەدەپە ئەمڕۆ لە کۆنفسرانێکى رۆژنامەنوسیدا لە پەرلەمانى تورکیا و لەبەیاننامەیەکى هاوبەشدا ڕایانگەیاند "ئەم ئاستەی پرسی کورد، ئیدی چارەسەری دەسەپێنێت، داوا  لە کەسانی دیموکرات و ئەو کەسایەتیانەی بیر لە دواڕۆژی ئەم وڵاتە دەکەنەوە دەکەین کە نابێت ئەم راستیە نادیدە بگرن".

 

جەختیشیان کردووەتەوە، هیچ کەسێک ناتوانێت لە چارەسەری رابکات "ئێمە لە قۆناغێکی وەهاداین کە ئیدی چەقۆ گەیشتووەتە ئێسقان. ئیدی چارەسەریەکی دیموکراتیک و ئاشتیانە خۆی دەسەپێنێت".

 

لەبەیاننامەیەکدا چوار خاڵ بۆ چارەسەرى پرسی کورد لەلایەن هەدەپەوە دیاریکراوە کە یەکەمیان ئاڕاستەى دەسەڵاتى تورکیا کراوە "پێویستە واز لە هەڵوێست و سیاسەتی شەڕ و چارەسەرنەکردن بهێنن. تورکیا ئەگەر کێشەی کورد چارەسەر بکات و کۆتایی بە شەڕ بهێنێت، ئەوا لە ناوچەکە دەبێتە خاوەنی پیرۆزمەندیەکانی دیموکراتیک و مۆدێلێکی بەهێز".

 

هەروەها جەختیکردووەتەوە، دانوستانەکانی دۆلماباخچە بۆ چارەسەری کێشەی کورد تا ئێستاش لەجێی خۆیدایە.

 

رێککەوتنى دۆلمە باخچە دواى چەند سالێک دانوستانى ئاشتى نێوان پەکەکە و تورکیا لە شوباتى 2015 لە کۆشکى دۆلمە باخچەى ئەنقەرە ڕاگەیەنرا، کە بەپێی رێککەوتنەکە پەکەکە لە کۆنگرەیەکى نائاساییدا چەکى دادەنا و پرسی کورد چارەسەر دەکرا، بەڵام رۆژێک دواى رێککەوتنەکە رەجەب تەیب ئەردۆغان رێککەوتنەکەى رەتکردەوە و چەند مانگێک دواتر شەڕ  هەڵگیرسایەوە و پرۆسەى ئاشتى شکستى هێنا.

 

هەدەپە لەخاڵێکى یکەى بەیاننامەکەدا تیشکی خستە سەر ئەوەی بۆ چارەسەری کێشەکە، بەرپرسیارێتیەکی گرنگ دەکەوێتە ئەستۆی لایەنە ئۆپۆزیسیۆنەکان و کۆمەڵگا، چونکە پرسی کورد، پرسێکی ژیانە و نابێت لە چنگی دەسەڵاتدا بهێڵرێتەوە. "پارتە ئۆپۆزیسیۆنەکان دەبێت داواکاریەکانی گەلی کورد بۆ بەدیهاتنی ماف و ئازادیان، وەکو بەشێک لە ئامانجی بەیەکەوە ژیانکردن و یەکسانی و دیمۆکراسیبوونی تورکیا تەماشا بکەن."

 

لە خاڵی سێیەمدا جەختکراوەتەوە "ئەم کێشەیە نابێت تەنها وەکو کێشەی کورد و هەدەپە تەماشا بکرێت. هەدەپە لە چوارچێوەی چارەسەری کێشەی کورددا، لایەنگری ماف و ئازادیە. بۆ بەدیهێنانی ئازادی و مافی گەلی کورد، پێویستە هەموو بەشەکانی کۆمەڵگای تورکیا، رۆڵێکی ئەرێنی ببینن. ئێمەش وەکو هەدەپە رۆڵمان بۆ دیالۆگ و دانوستانە. ئێمە ئامادەین کار لە گەڵ هەموو کەسێکدا بکەین کە هەوڵ بۆ چارەسەریەکی ئاشتیانە و دیمۆکراتیکدا دەدات."

 

هەروەها خاڵی چوارەمیدا هەدەپە باسى لەوەکردووە، بۆ کێشەی کورد، لە دەرەوەی رێبازی چەکداری و شەڕ، ئیدی هەڵبژاردەی دیالۆگ و دانوستان خۆی دەسەپێنێت. بۆ ئەم مەبەستەش دەبێت هەموو لایەنەکان، بیر لە دواڕۆژی تورکیا بکەنەوە و بە فیداکارانە هەنگاو بنێن.

 

"ئاشتی تەنها وەستاندنی شەڕ نییە، مەبەست لە ئاشتی ئەوەیە کە پلانێکی هاوبەش بۆ بێدەنگکردنی چەک، دابنرێت و بۆ چارەسەریی پرسی ١٠٠ ساڵەی کورد، هەنگاوی هاوبەش بنرێن"، لەبەیاننامەکەى هەدەپەدا هاتووە.