گه‌ڕان

Shadow Shadow
سیاسه‌تی

هادی عامری هەڵوێستى خۆى لەسەر وتارەکەى کازمى ئاشکراکرد

2020.08.31 - 20:52
هادی عامری هەڵوێستى خۆى لەسەر وتارەکەى کازمى ئاشکراکرد

ناس کورد-

 

هادی عامری، سەرۆکی هاوپەیمانی فەتح هەڵوێستى خۆى لەبارەى وتارەکەى مستەفا کازمی ئاشکراکرد و ڕایگەیاند، کازمى بەگرنگییەوە دەڕوانێتە ئەوخاڵانەی کە لە کۆبوونەوەکەیدا لەگەڵ هێزە نیشتمانییەکان خرانە ڕوو.

 

مستەفا کازمى سەرۆکوەزیران دوێنێ لە وتارێکى تەلەفزیۆنیدا پێکهێنانى لیژنەیەکى بۆ لێکۆڵینەوە لە دۆسیە گەورەکانى گەندەڵى و تاوانە نائاساییەکان ڕاگەیاند و ئاشکراشیکردبوو کە قۆناغى یەکەمى لێکۆڵینەوە لە کوژرانى خۆپیشاندەران کۆتایی هاتووە.

 

هادی عامری، سەرۆکی هاوپەیمانی فەتح ئەمڕۆ دووشەممە 31ی ئابی 2020، لە ڕاگەیاندراوێکدا ئاماژە بەوەکرد "پاش ئەوەی لە ناوەڕۆکی ئەو ڕاگەیاندراوەی کە مستەفاکازمی، سەرۆکوەزیرانی عێراق لە یادی شەهیدبوونی ئیمامی حسێن بڵاویکردەوە  ئاشنا بووین بۆمان دەرکەوت کە بەڕێزیان بەگرنگییەوە دەڕواننە ئەو خاڵانەی کە هێزە نیشتیمانییە عێراقییەکان لە کۆبوونەوەکەی 26ی ئەم مانگەدا لەگەڵ بەرێزیان جەختیانلەسەرکراوەتەوە".

 

وتیشى "ئێمە جەخت لەسەر جێبەجێکردنی ئەو خاڵانە دەکەینەوە و ڕایدەگەیەنین بەردەوامدەبین لەسەر پیادەکردنی ئەو بەرنامەیە، بەڵام لە هەمانکاتیشدا ئەم تێبینیانە دەخەینەڕوو و جەختی لەسەردەکەینەوە".

 

عامرى دەڵێت "ئێمە بڕاومان وایە یەکەم کاری سەرەکی ئەم حکومەتە سەپاندی ئەمن و ئاسایش و گەڕاندنەوەی شکۆی دەوڵەتە وڕەخساندنی کەشێکی لەبارە بۆ ئەنجامدانی هەڵبژاردنەکان".

 

دەشڵێت "هیچ دەرفەتێک نییە بۆ ڕاڕابوون لە نێوان بونی دەوڵەت  نەبوونی دەوڵەتدا، ئێمە لەگەڵ هەڵبژاردەی دەوڵەت و بەرقەراکردنی ژیانێکی شایستەین بۆ هاووڵاتیان. داوادەکەین دامودەزگا ئەمنییەکان بەهێزبکرێن، یاساکان جێبەجێبکرێن، دادپەروەری بەرقەرابێت و سەرپێچکاران ویاخییەکانی یاسا سزابدرێن".

 

"خۆپیشاندانی ئاشتیانە مافێکی دەستوریی هاووڵاتیانە، بەڵام دەبێت بە پێی ڕێکارە یاساییەکان و دەستورییەکان بێت و نابێت لەلایەن کەسانی گێرەشێوێنەوە بقوسترێتەوە بۆ ئەوەی ژیانی گشتی ودەوامی فەرمی لەکاربخرێت. دەبێت حکومەت بەدەستێکی ئاسنیی لەدەستی ئەودەنگانە بدات کە جاڕی هەڵگرتنی چەک دەدەن و بانگەشە بۆ دروستکردنی  گروپی چەکداری دەکەن"، عامرى وایوتیووە.

 

هەروەها جەختیکردووەتەوە کە پێویستە هێزە ئەمنییەکان و دادگاکان بەتووندی ڕووبەڕووی زنجیرەکانی ڕفاندن و تیرۆرکردن ببنەوە و تاوانباران ڕادەستی دادگا بکەنەوە بۆ ئەوەی سزای خۆیان وەربگرن و چیدی نەبن  بە هۆکاری پاشاگەردانی وڵات. "دەبێت بەزوترین کات خۆمان بگوێزینەوە بۆ قۆناغی لێپێچینەوە لە گەندەڵکاران و سزا بدرێن، چونکە دیاردەی گەندەڵی لە تیرۆرزم مەترسیداترە".

 

عامرى باسى لەوەکردووە "دەزانین حکومەت لەڕووی داراییەوە دوچاری قەیرانێکی گەورە بووەتەوە، بەڵام جەخت لەوەدەکەینەوە کە دەبێت بەگرنگییەوە بڕوانێتە دۆخی ژیانی چینی هەژاران و داپەروەری کۆمەڵایەتی بچەسپێنێت، پێشنیارێکمان لەو بوارەدا هەیە لەپەرلەمانی عێراق ڕایدەگەیەنین".

 

لەبارەى کشانەوەى هێزە بیانییەکانەوە، عامرى جەختیکردووەتەوە، دەبێت بەزووترین کات خشتەیەک بۆ پاشەکشەی هێزە بیانییەکان لە عێراقدا فەراهەمبکرێت بۆ ئەوەی عێراق تەواوی سەروەری خۆی بۆ بگرێتەوە.