گه‌ڕان

Shadow Shadow
سیاسه‌تی

’23 گروپ لە ئوردن لەلایەن ئەمریکا و ئیسرائیلەوە مەشقیان پێکراوە’

خەزعەلى رەتیدەکاتەوە تیرۆرکردنى چالاکوانان پەیوەندى بە گروپە چەکدارەکانەوە هەبێت

2020.08.30 - 22:46
App store icon Play store icon Play store icon
خەزعەلى رەتیدەکاتەوە تیرۆرکردنى چالاکوانان پەیوەندى بە گروپە چەکدارەکانەوە هەبێت

ناس کورد-

قەیس خەزعەلى ڕایگەیاند، چەکى گروپە چەکدارەکان لە عێراق "شەرعییە" لەکاتێکدا هێزەکانى ئەمریکا لەوڵاتدان، رەتیشیکردەوە گروپە چەکدارەکان پەیوەندیان بە پڕۆسەکانى تیرۆرکردنى چالاکوانانەوە هەبێت.

 

کەناڵی ناس کورد لە تێلیگرام جۆین بکە   

قەیس خەزعەلى لە وتەیەکى تەلەفزیۆنیدا بەبۆنەى یادى عاشوراوە وتى "بوونى چەک لەدەستى دەوڵەت، پرسێکى نوێ نییە و پێشتریش خراوەتەڕوو، کاتێک هەندێک باسى ئەو پرسە دەکەن، مەبەستیان لەهەموو چەکەکانى دەرەوەى دەستى دەوڵەت نییە، بەڵکو جۆرێکى دیاریکراوە لەچەک".

 

وتیشى "هەندێ لەلایەنەکان مەبەستیان لەو چەکە ڕاستەقینانەیە کە هەڕەشەیە بۆ سەر دەوڵەت، بەڵام هەندێکى دیکە مەبەستیان لەو چەکەیە کە چەکى بەرگریی گروپەکانى بەرگرییە، ئێمە سورین لەسەر هەڵوێستى نەگۆڕمان لەبارەى پشتیوانى دەوڵەت و دەزگا ئەمنییەکان بوونى چەک تەنها لەدەستى ئەواندا".

 

خەزعەلى دەڵێت، هیچ چارەسەرێکى ڕاستەقینە و ئاسایشى راستەقینە نییە تەنها لەرێگەى پشتیوانى دەوڵەتەوە نەبێت "ئایا ئەو چەکە ئەمریکییەى کە ئەبو مەهدى موهەندیس و قاسم سولەیمانى پێ کوژرا لەژێر کۆنتڕۆڵى دەوڵەتدایە؟ مادام داگیرکەر بوونى هەیە چەکى بەرگرى شەرعییە".

 

دەشڵێت، پێیانوایە پێویستە چەک تەنها لەدەستى دەوڵەتدا بێت لە رێگەى دامەزراوە ئەمنییەکانەوە "ئێمە باسى چەکى کاتى دەکەین نەک هەمیشەیی، چەکى پشتیوانى نەک جێگرەوە کە پشتیوانى شەرعیەت و دەوڵەت دەکات و بەرگرى لێدەکات".

 

لەبارەى تیرۆرکردنى چالاکوانانەوە، خەزعەلى وتى "هەندێ گروپى عێراقى هەن لە پارێزگاکان کە بەسەرباز گیراون و لەدەرەوە مەشقیان پێکراوە، زۆربەیان لە ئەردەن مەشقیان پێکراوە بەسەرپەرشتى راستەوخۆى هەواڵگرى ئەمریکا و ئیسرائیل، گروپەکان لەسەر پڕۆسەکانى کوشتن بەچەکى بێدەنگ و بەکارهێنانى بۆمب و قەناس مەشقیان پێکراوە".

 

"23 گروپ مەشقیان پێکراوە و سەرجەم پێداویستییەکانیان بۆ ئامادەکراوە و لەبەغدا و پارێزگاکانى ناوەڕاست و باشور بوونیان هەیە، جەختیان لەسەر پارێزگاکانى نەجەف و کەربەلا و بەسرە و زیقارە، بەرپرسن لە پڕۆسەکانى تیرۆرکردن و ئاڵۆزکردنى دۆخى ئاسایش"، خەزعەلى وایوت.

 

لەگەڵ ئەوەشدا خەزعەلى هەندێ چالاکوانى تۆمەتبارکرد بەوەى پەیوەندیان بە ئەجێنداى دەرەکییەوە هەیە و "گروپەکانى بەرگرى" تۆمەتبار دەکەن بە تیرۆرکردنەکان، بەبێ هیچ لێکۆڵینەوەیەک و داواى چەکدارکردنیان دەکەن.

 

وتیشى "داواکانى هەڵگرتنى چەک و بەرەنگاربوونەوەى توندوتیژى بە توندوتیژى ئامانجێکى روونى هەیە کە بە ئامانجگرتنى فەرماندە و ئەندامانى گروپەکانى بەرگرییە".