گه‌ڕان

Shadow Shadow
سیاسه‌تی

ئەى براکەى چی دەڵێت ئێستا و دۆخی تەندروستی چۆنە؟

چیرۆکی دیارنەمانی خدر کەریم هێشتا کۆتایی نەهاتووە.. پۆلیسیش دەڵێت هیچ قسەیەکی لەسەر ناکەن

2020.08.30 - 13:47
چیرۆکی دیارنەمانی خدر کەریم هێشتا کۆتایی نەهاتووە.. پۆلیسیش دەڵێت هیچ قسەیەکی لەسەر ناکەن

ناس کورد-

لەدوای دۆزینەوە خدر کەریم، سەرۆکى پێشووی شارەوانی هەڵەبجە پاش دیارنەمانی بۆ ماوەى دوو ڕۆژ، لە ئێستادا بابەتی هۆکاری دیارنەمانەکەى هێندەى تر دۆسیەکەى ئاڵۆز کردووە بۆ خەڵک.

 

 

سەربەست کە براى خدر کەریمە بە ناس کوردى ڕاگەیاند، بارودۆخى تەندروستى براکەى لەئێستادا جێگیرە بەڵام نازانن لێکۆڵینەوەکانى پۆلیسى شارەکە لەو بارەیەوە بەکوێ گەیشتووە، پۆلیسى هەڵەبجەش ڕەتیدەکاتەوە قسە لەسەر ئەو ڕوداوە بکات.



وتیشى: "ڕۆژى سێشەممە (25ی ئاب) خدر دیارنەما، من بۆ ڕۆژى چوارشەممە بە فەرمیى سکاڵام تۆمارکرد لەسەر کەس نا بەڵکو هەروەکو سکاڵاى دیارنەمان کە گومانمان لە کەس نییە، وەکو ئەو ماوەیەش کەبەدوایدا دەگەڕاین هەوڵێکى وردى ئەوانم نەدەبینى، ئیدى ناشزانم شێوازى لێکۆڵینەوەى ئەوان چۆنە."

 

ئاماژەى بۆ ئەوەشکرد: "لەدواى دۆزینەوەشى پۆلیس و قائیمقام و بەڕێوەبەرى ئاسایش پەیوەندى پێوە کردوون و سەردانى کردوون بەڵام هیچ ئەنجامێکی لێکۆڵینەوەکەیان بەوان ڕانەگەیاندووە."

 

زیاتر بخوێنەوە: یەکەم قسەى خدر کەریم دواى دۆزینەوەى..دۆخى تەندروستى ’ناجێگیرە’

 

ڕۆژی 25ی ئابی 2020، خدر کەریم لە نزیک گۆڕەستانى باوەکۆچەک دۆزرایەوە دوای سێ ڕۆژ ونبوون و دەرچوونی لە ماڵ.

هەر ئەو کات سەربەستی براى خدر کەریم بە ناس کوردى وت، "براکەم تەندروستى زۆر جێگیر نییە و زۆر ناتوانێت قسە بکات، ماندووبونى زۆرى پێوە دیارە".    

 

بەوتەى سەربەست، براکەى دواى دۆزینەوەى تەنها ئەوەندەى وتووە "داواى لێبوردن دەکەم"، ئەوەش بەهۆى ماندووبوون و گەڕانى خەڵکێکى زۆر بەدوایدا لەماوەى ئەو سێ رۆژەدا.  

 

بە ڕاگەیەنراوی فەرمیش، نە پۆلیسی هەڵەبجە، نە شارەوان و نە پارێزگاش هیچ ڕوونکردنەوەیەکیان بڵاونەکردووەتەوە لەسەر کەیسەکە.

 

لەبارەى تەندروستى براکەشیەوە، سەربەست کەریم وتى، "بەپێى ئەو پسپۆڕانەى کە شیکارییان دۆخەکەى کردووە گەر ئەو ڕۆژە نەماندۆزیایەتەوە گورچیلەى دەوەستا و فشارى خوێنى بەرزبوویەوە، بەڵام بەپێى پشکینیە نوێیەکانیشى تەندروستى جێگیرە و لەڕووى دەروونیشەوە هەندێ هەڵچوونى هەیە بەڵام بەگشتى جێگیرە دۆخى تەندروستى."

 

لەسەر ئەنجامى ئەو لێکۆڵینەوانەى کە پۆلیسى هەڵەبجە گرتویەتیە بەر لەسەر ئەو ڕوداوە ناس کورد پەیوەندى بە بەرزان عوسمان، وتەبێژى پۆلیسى هەڵەبجەوە کرد، ناوبرا وتى: "هیچ قسەیەک لەسەر ئەو ڕوداوە ناکەم."

 

ناس کورد پەیوەندی بە چەند کەسێکی نزیکی خدر کەریم کرد بەڵام ئەوانیش ڕەتیانکردەوە باس لە وردەکاری بابەتەکە و هۆکاری دیارنەمانی بکەن.