گه‌ڕان

Shadow Shadow
سیاسه‌تی

عێراق؛ موچەی زیاتر لە هەشت هەزار کەس بڕدرا کە دوو موچە وەردەگرن

2020.08.29 - 21:13
عێراق؛ موچەی زیاتر لە هەشت هەزار کەس بڕدرا کە دوو موچە وەردەگرن

ناس کورد-

وەزیری کار و کاروباری کۆمەڵایەتیی عێراق ڕایگەیاند، بەهۆی هەبوونی دوو موچەوە، موچەی هەشت هەزار و 392 کەسی لە لیستی چاودێری کۆمەڵایەتیدا بڕیوە و بەشێکیان پارەکانیشیان لێوەردەگیرێتەوە.

 

ئەمڕۆ شەممە 29ی ئابی 2020، لە کۆنفرانسێکی ڕۆژنامەوانیدا، عادل ئەلڕوکابی، وەزیری کار و کاروباری کۆمەڵایەتی عێراق رایگەیاند، بڕیاریانداوە موچەی ئەو کەسانە ببڕن کە لە چوارچێوەی چاودێری کۆمەڵایەتی دوو موچە وەردەگرن و ژمارەیان شەش هەزار و 814 کەسن.

 

وتیشی، هەروەها هەزار و 578 کەسی دیکە موچەی خاوەن پێداویستی تایبەت وەردەگرن و خاوەن پێداویستی تایبەتیش نین، بۆیە موچەکانیان بڕدراوە و ئەوەی وەریشیان گرتووە لێیاندەسەندرێتەوە، چونکە مافی هەژارانیان خواردووە."

 

ئاماژەی بەوەشكرد، لە بەرواری 17ی ئەم مانگەوە، وەزارەتەکەیان داوای لەو کەسانە کرد کە لە چوارچێوەی چاودێری کۆمەڵایەتی دوو موچە وەردەگرن، لە ماوەی 30 رۆژدا سەردانی وەزارەتەکەیان بکەن، بە پێچەوانەوە روبەڕوی دادگا دەکرێنەوە.

 

ئەوەش لەکاتێکدایە، پێشتر وەزارەتەکە ڕایگەیاندبوو، زیاتر لە 12 هەزار سودمەند هەن  کە موچەی چاودێری کۆمەڵایەتی وەردەگرن بەشێوەی دوو موچە، لەگەڵ ئەوەشدا موچەی خانەنشینی وەردەگرن، یان فەرمانبەرن و لە کارەکانیان بەردەوامن.