گه‌ڕان

Shadow Shadow
سیاسه‌تی

پەيوەندى بە واژۆى لێپرسينەوە لە مەسرور بارزانيەوە هەيە؟

پەرلەمانتارێکی گۆڕان هۆكارى دەستلەكاركێشانەوەى عەلى حەمە ساڵح ئاشكرا دەكات (تايبەت)

2020.08.29 - 18:01
پەرلەمانتارێکی گۆڕان هۆكارى دەستلەكاركێشانەوەى عەلى حەمە ساڵح ئاشكرا دەكات (تايبەت)

ناس کورد-

ئەندامێكى پەرلەمانى كوردستان لە فراكسيۆنى بزوتنەوەى گۆڕان دەڵێت، دەستلەكاركێشانەوەى عەلى حەمەساڵح لە سەرۆكايەتى فراكسيۆنەكە پەيوەندى بە واژۆى لێپرسينەوە لە مەسرور بارزانى سەرۆكى حكومەتەوە نييە و پێشتريش چەند جارێك داواى دەسەلەكاركێشانەوەى پێشكەش كردووە.

 

لە چەند ڕۆژى ڕابردوودا عەلی حەمەساڵح دەستی لە پۆستی سەرۆكی فراسیۆنی گۆڕان لە پەرلەمانی كوردستان‌ و ئەندامێتی جڤاتی نیشتمانی بزوتنەوەی گۆڕان كێشایەوە، ئەوەش بڵاوكرايەوە گوايە ڕێكخەر و خانەی ڕاپەڕاندن داوایان لێكردوە واژۆكەى بۆ بانگهێشتكردنی مەسرور بارزانی بۆ پەرلەمان بكێشێتەوە.

 

بەڵام جەلال محەمەد، پەرلەمانتارى فراكسيۆنى بزوتنەوەى گۆڕان بە ناس كوردى وت، عەلى حەمە ساڵح ماوەى دوو ساڵە سەرۆكى فراكسيۆنە و هيچ كێشەيەكى نەبووە، بەڵكو خۆى چەن جاڕێك داواى كردوە دەستبەردارى ئەو پۆستە ببێت بۆ ئەوەى زياتر وەك ئەندام پەرلەمانێك بتوانێت ڕۆڵ بگێڕێت لە هەندێك بابەت.

 

باسى لەوەشكرد، "لەبەرئەوەى سەرۆكى فراكسيۆن فشاری زياترى لەسەرە و كاتى كەمترە بۆ بەدواداچوون و ئەو جۆرە كارانە، پێشتريش چەند جارێك داواى دەستلەكاركێشانەوەى پێشكەشكردووە بەڵام كاتەكەى بە گونجاو نەزانراوە، ئێستاش داواى كردووەتەوە و پێموايە جۆرێك لە هەماهەنگى كردووە لەگەڵ سەروو خۆيەوە."

 

سەبارەت بەوەى كە دەستلەكاركێشانەوەكەى بەهۆى جۆرێك لە فشارەوە نەبووە لەسەرى، ئەو پەرلەمانتارەى فراكسيۆنى گۆڕان جەختیکردەوە کە "نەخێر هەر وەك ئەندامێكى فراكسۆنى گۆڕان دەمێنێتەوە و هيچ گرفتێكى نييە و بەو شێوازەش بەردەوام دەبێت، لە خولى پێشوو و ئەم خولەش يەكێكە لە ئەندامە چالاكەكانى پەرلەمان و دەتوانێت خزمەتى بزوتنەوەى گۆڕان و هاونيشتمانيانيش بكات."

 

سەبارەت بەو دەنگۆيانەى دەوترێ بەهۆى ئەوەوە بووە بزوتنەوەكە فشاری خستووەتە سەرى بۆ ئەوەى واژۆى بانگهێشتكردنى مەسرور بارزانى، سەرۆكى حكومەت بكێشێتەوە، جەلال محەمەد بە ناس كوردی وت کە "دەستلەكاركێشانەوەكە هيچ پەيوەندييەكى بەو بابەتەوە نييە، چونکە ئەو هەفتەیەکە نامەی دەستلەکارکێشانەوەى پێشکەشکردووە."

 

جەلال محەمەد هێماى بۆ ئەوەشكرد، "عەلی حەمە ساڵح تەنها دەيەوێت خۆى تايبەت بكات بۆ بەدواداچونەكانى بەتايبەتى بابەتى خاڵە سنوريەكان و نەوت و ئەو بابەتانەى تايبەتمەندى ئەوە، سەرۆكى لیژنه‌ى وزه‌ وسامانە سروشتیه‌كان و پیشه‌سازى و بازرگانييە و دەيەوێت لەسەر ئەو مەلەفانە كارى خۆى بكات."

 

سەبارەت بەوەشى كێ دەبێتەوە جێگرەوەى و سەرۆكى فراكسيۆنى گۆڕان وتى،، ئەوە لەناو فراكسيۆن بە ڕێكەوتن دەكرێت و يەكێك دياريدەكرێت بۆ شوێنگرتنەوەى.

 

بەپێى قسەكانى ئەو پەرلەمانتارە، عەلى حەمە ساڵح نزيكەى هەفتەيەكە دەستلەكاركێشانەوەكەى پێشكەشى بزوتنەوەى گۆڕان كردووە بەڵام نازانێت قبوڵكراوە ياخودنا.