گه‌ڕان

Shadow Shadow
سیاسه‌تی

هەڵمەتى دژە گەندەڵى کازمى لە چواردەورى مالیکییەوە دەستیپێکرد

ڕۆژنامەیەک: مالیکى سامانەکەى لەنێوان کەسە نزیکەکانیدا دابەشکردووە

2020.08.29 - 14:47
ڕۆژنامەیەک: مالیکى سامانەکەى لەنێوان کەسە نزیکەکانیدا دابەشکردووە

ناس کورد-

حکومەتى عێراق جەنگى دژە گەندەڵى لە کەسەکانى چواردەورەى نورى مالیکییەوە دەستپێکرد بەبێ لێدانى ڕاستەوخۆ لەخۆى، لە هەنگاوێکدا کە بەشێک لە چاودێران پێیانوایە تاقیکردنەوەى هێزە وەک لەوەى بگۆڕێت بۆ بەریەکەوتنى ڕاستەوخۆ لەگەڵ مالیکى.

 

بانکى ناوەندى عێراق هەفتەى ڕابردوو بڕیاریدا بە سڕکردنى سامانى نۆ بەرپرسى ئێستا و پێشوو لەگەڵ دەستبەسەراگرتنى موڵک و ماڵى، کە لەناویاندا یاسر سەخیل، زاواى مالیکى و لوقمان سەخیلى براى تێدایە، ئەوەش بەهۆى پێنەدانەوەى قەرزەکانیان بە حکومەت.

 

سەخیل زاواى مالیکییە و ئەندامى پەرلەمانى عێراقە لە دەوڵەتى یاسا، مالیکى کاندیدیکرد بۆ پۆستى وەزیرى ناوخۆ لە حکومەتەکەى کازمى، سەرەڕاى نەبوونى هیچ ئەزمونێکى لە بوارى ئاسایش و بەڕێوەبردن.

 

دەوڵەتى یاسا لەلایەن کوتلە سیاسییەکانەوە روبەڕووى رەخنەى توند بووەوە، کاتێک سەخیل کاندیدکرا بۆ ئەو پۆستە، ئەوەش بەهۆى کەمى ئاستى خوێندن و چونى بۆ پەرلەمان بە "بڕوانامەى ساختە" و نەبوونى شارەزایی لە بوارى ئاسایش.

 

بەپێی راپۆرتێکى رۆژنامەى (عەرەب)ى لەندەنى، مستەفا کازمیی سەرۆکوەزیران بڕیاریداوە بە رەوانەکردنى گەندەڵکاران بۆ دادگا بەبێ لەبەرچاوگرتنى پێگەکانیان لەناو دەوڵەتدا، بەڵام هەندێ لە چاودێران بەدورى دەزانن فراوانکردنى ئەو هەڵمەتە ئامانجەکەى بەریککەوتن بێت لەگەڵ نورى مالیکى، لەکاتێکدا کازمى هەوڵى هێورکردنەوەى دۆخەکە دەدات لەگەڵ حزب و میلیشیاکانى نزیک لە ئێران کە لەزیاد لەبەرەیەکەوە بەرەو رووى جوڵاون بۆ لاوازکردنى بەتایبەتى لەدواى سەردانەکەى بۆ ئەمریکا.  

 

هەروەها پێیانوایە، ئەو هەنگاوەى کازمى نزیکترینە بۆ دڵنیاکردنەوەى خۆپیشاندەران و بەدیهێنانى داواکارییەکانیان زیاتر لە ڕاگەیاندنى جەنگ دژە مالیکى، بەتایبەت کە بەرەنگاربونەوەى گەندەڵى لەسەرووى داواکاریی خۆپیشاندەرانەوەیە.  

 

 چەند سەرچاوەیەکى عێراقى بە رۆژنامەکەیان ڕاگەیاندووە، "مالیکى پێشتر سەروەتەکەى لەنێوان کەسە نزیکەکانیدا دابەشکردووە، وەک ئامادەکارییەک بۆ دورخستنەوەى لەروودانى هەر شتێک لە داهاتوودا".

 

 دەشڵێن، هەنگاوەکەى حکومەت ئامانجەکەى ناپێکێت چونکە راستەوخۆ بە ئاڕاستەى مالیکى نییە، بەڵام پەیامێکە بۆ مالیکى کە دۆخى پارێزراو نییە وەک پێشتر پێیوابوو.

 

بەوتەى سەرچاوەکان، چەندین دۆسیە دەکرێنەوە بەبێ بە ئامانجگرتنى راستەوخۆى ئەو کەسانەى خاوەن پێگەى دیارن، ئەوەش واتاى ئەوەیە کازمى لە رێگەى بە ئامانجى گرتنى کەسە نزیکەکانى ئەو کەسانەوە زەنگى ئاگادارکردنەوە لێدەدات و وایان لێدەکات خۆیان ون بکەن لە دەسەڵات، یان وڵات جێبهێڵن، یاخود کێشەکانیان لەگەڵ حکومەت چارەسەر بکەن، بەوەش پارەیەکى زۆر بۆ خەزێنەى حکومەت بگەڕێتەوە.

 

بەپێی رۆژنامەکە، کازمى سەرجەم متمانەى حکومەت و ئەو پشتوانییەى لەلایەن ئەمریکاوە بەدەستیهێناوە لەگەڵ چاکسازى دارایی بەکاردەهێنێت بۆ کردنەوەى دۆسیەکانى گەندەڵى.  

  

بەپێی راپۆرتێکى رۆژنامەى (دەیلى بیست)ى ئەمریکى کە پێشتر بڵاویکردەوە، لێکۆڵینەوەکانى وەزارەتى داد لەگەڵ کۆمپانیاى  “ساليبورت گڵۆباڵ سێرفیز” لە پێدانى بەرتیل بە بەرپرسانى عێراق، ڕۆڵى مالیکى و یاسرى زاواى ئاشکراکردووە.

 

کۆمپانیاى “ساليبورت” ساڵى 2014 گرێبەستێکى لە هێزى ئاسمانی بەدەستهێنا بۆ دابینکردنى خزمەتگوزاریی بۆ بنکەى ئاسمانى بەلەد لە باکورى بەغدا، کە لەلایەن کۆمپانیاى ئافاقەوە جێبەجێدەکرا کە لەژێر هەژمونى خانەوادەى مالیکیدایە و لەلایەن ئەحمەدى کوڕى و یاسرى زاوایەوە بەڕێوەدەبرێت.

  

بەپێی رۆژنامەکە، لێکۆڵینەوەکانى وەزارەتى دادى ئەمریکا ئاماژە دەکەن بە چالاکى گوماناوى کۆمپانیاى "ئافاق" کە بە نوێنەرایەتى “ساليبورت” ئەنجامیداوە و بەڵێنى بەبەرپرسانى حکومەت داوە پارەیان پێشکەش بکات لەبەرانبەر ئەنجامدانى گرێبەست لەگەڵ “ساليبورت”.