گه‌ڕان

Shadow Shadow
سیاسه‌تی

یەکەم قسەى خدر کەریم دواى دۆزینەوەى..دۆخى تەندروستى ’ناجێگیرە’

2020.08.25 - 15:21
یەکەم قسەى خدر کەریم دواى دۆزینەوەى..دۆخى تەندروستى ’ناجێگیرە’

ناس کورد-

خدر کەریم سەرۆکى پێشووى شارەوانى هەڵەبجە پاش نیوەرۆى ئەمڕۆ لەهەڵەبجە دۆزرایەوە و بەوتەى برایەکى دۆخى تەندروستى "زۆر جێگیر نییە".

 

 

خدر کەریم کە لە ساڵانى 2005-2015 سەرۆکى شارەوانى هەڵەبجە بوو، ماوەى سێ رۆژ بوو دواى جێهێشتنى ماڵەکەى خۆى بێسەروشوێن بوو تا پاش نیوەڕۆى ئەمڕۆ لەلایەن کەسوکارەکەیەوە دۆزینەوەى راگەیەنرا.

 

سەرچاوەیەک لە پۆلیسى هەڵەبجە بە ناس کوردى ڕاگەیاند "خدر کەریم دۆزراوەتەوە هیچ کێشەیەکى واى نییە، لە ئێستادا لەناو کەسوکارى خۆدایە".

 

خدر کەریم لە نزیک گۆڕەستانى باوەکۆچەک دۆزراوەتەوە و لە ئێستاشدا براوەتەوە ماڵى خۆى لە گوندى باوەکۆچەک.

سەربەست کەریم براى خدر کەریم بە ناس کوردى ڕاگەیاند، "براکەم تەندروستى زۆر جێگیر نییە و زۆر ناتوانێت قسە بکات، ماندووبونى زۆرى پێوە دیارە".

 

وتیشى "پێدەچێت هۆکارەکەى ئەوەبێت کە سێ شەو و سێ رۆژ بێ نان و ئاو بووە، ئێستا تیمێکى تەندروستى پشکنینى بۆ دەکەن بۆ دڵنیابونەوە لە جێگیرى تەندروستى".

 

بەوتەى سەربەست، براکەى دواى دۆزینەوەى تەنها ئەوەندەى وتووە "داواى لێبوردن دەکەم"، ئەوەش بەهۆى ماندووبوون و گەڕانى خەڵکێکى زۆر بەدوایدا لەماوەى ئەو سێ رۆژەدا.