بەڵگە؛ لە هەولێر و دهۆک بۆری نەوتی هەرێم کون کراوە و چەند کەسێک لەسەر ئەو پرسە دەستگیرکران

ناس کورد-

لەوەڵامی بەدواداچوونێکی سەرۆکی فراکسیۆنی گۆڕان لە پەرلەمانی کوردستان، وەزیری ناوخۆی هەرێم ئاشكرایدەکات، لەچەند شوێنێک بۆری نەوتی کوردستان کون کراوە و چەند کەسێکیش لەسەر ئەو پرسە دەستگیرکراون.

کەناڵی ناس کورد لە تێلیگرام جۆین بکە   

 

عەلی حەمە ساڵح، سەرۆکی فراکسیۆنی گۆڕان لە پەرلەمانی کوردستان لە هەژماری خۆی لەتۆڕی کۆمەڵایەتی فەیسبوک بڵاویکردەوە: "پاش کۆکردنەوەی زانیاری، لە 6ی مانگی یەکی ئەمساڵ دەستمانکرد بە بەدواداچونی فەرمی بۆ کونکردنی بۆری نەوتی ھەرێمی کوردستان لە چەندین شوێن لە پارێزگای ھەولێرو دھۆک."

 

ئاماژەی بەوەشكردووە: "دوای زیاتر لە حەوت مانگ، ئەنجامی وەڵامی پرسیارەکانم بۆ دۆسیەکەم بەدەست گەشتەوە و چەندین بەڵگەنامەی یاسایی ئەم دۆسیەمان لەبەردەستدایە."

 

لەوەڵامی بەدواداچوونەکانی سەرۆکی فراکسیۆنی گۆڕاندا، ڕێبەر ئەحمەد، وەزیری ناوخۆ نوسراوێکی ئاڕاستە کردووە و بەپێی وەڵامەکەی لەچەندین شوێن ئەم بۆریانە کونکراوە.

 

لەنوسراوەکەی وەزیری ناوخۆی هەرێمدا هاتووە: "لەبەر گرنگی بابەتی کونکردنی بۆری نەوتی هەرێمی کوردستان، هێزەکانی پۆلیس و ئاسایش و پۆلیسی کاروباری پاراستنی دەزگا نەوتییەکان بەدواداچوونی بەردەوام و لێکۆڵینەوە لەو پرسە دەکەن."

 

ئاماژەی بەوەشكردووە: "توانرا چەند شوێنێک دەستنیشانبکرێت لەسنوری پارێزگای هەولێر و چەند تۆمەتبارێک دەستگیرکراون و کەیسەکە لەدادگای لێکۆڵینەوەیە."

 

بەگوێرەی نوراوەکەی وەزیری ناوخۆ: "لەپارێزگای دهۆکیش بۆری نەوتی کوردستان کون کراوە و چەند تۆمەتبارێکیش دەسگیرکراون و کەیسەکەیان لە دادگای لێکۆڵینەوەیە."