بەهۆی تەقینەوەیەکەوە کارەبای گشتیی سەرجەم سوریا کوژایەوە [ڤیدیۆ]

ناس کورد-

بەهۆی تەقینەوەی بۆرییەکی غازەوە کارەبای سەرجەم وڵاتی سوریا کوژایەوە و وەزیری نەوتی وڵاتەکەش دەڵێت، تەقینەوەی بۆری غازەکە بەهۆی هێرشی تیرۆریستی بووە.

 

ئاژانسی فەرمیی "سانا"ی سەر بە حکومەتی سوریا لەزاری عەلی غانم، وەزیری نەوت و سامانە سروشتییەکانی سوریا ڕایگەیاند  "هێڵی بۆری سەرەکی غاز لە نێوان زەمیر و وەعەدرا لە شاری دیمەشق لە کردەوەیەکی تیرۆرستیدا تەقێنرایەوە".

 

وەزیری نەوتی سوریا ئاماژەی بەوەشكردووە، بەهۆی تەقینەوەکەوە کارەبای سەرجەم وڵاتەکە کوژاوەتەوە و ئەو کەرتەی غازی پەکخستووە.

 

ئەوەشی خستووەتەڕوو، تیمەکانی بەرگریی شارستانی و ئاگرکوژێنەوە، ئاگرەکەیان کۆنتڕۆڵکردووە کە لە ئەنجامی تەقینەوەکەوە دروست بوو.

 

لەلایەکی دیکەوە محەمەد زەهیر، وەزیری کارەبای سوریا ڕایگەیاند، لەئێستادا کارەبای بەشێک لەشارەکان و ناوەندی شاری دیمەشق هەڵکراوەتەوە و لە هەوڵدان بۆ چاککردنەوەی بۆری غازەکە و هەڵکردنەوەی کارەبای سەرجەم شار و ناوچەکانی دیکەش.

 

ئەوە بۆ دووەمجارە کارەبای گشتی لە سوریا دەکوژێتەوە، ئەوەش  دوای ئەوەی لە ساڵی 2013شدا بەهۆی بۆردومانی تیرۆرستانەوە بۆری غازى ئەو وڵاتە تەقینرایەوە.