گه‌ڕان

Shadow Shadow
سیاسه‌تی

ئۆتۆمبێلێکی سەربازیی سوپای تورکیا لە برادۆست تەقییەوە و کوژراو و بریندار هەیە

2020.08.21 - 13:53
ئۆتۆمبێلێکی سەربازیی سوپای تورکیا لە برادۆست تەقییەوە و کوژراو و بریندار هەیە

ناس کورد - ئاکۆ حەمەد ڕابی

ئەمڕۆ ئۆتۆمبێلێکی سەربازیی سوپای تورکیا لە گەروی دایلا لە سنوری برادۆست تەقیوەتەوە و بەوهۆیەوە 10 سەربازی تورکیا بەرکەوتوون لەنێوان کوژران و برینداربوون، هاوکات دوای ڕووداوەکەش لە گوندی شاپانە سەربازانی سوپای تورکیا تەقەیان کردووە و لە ئەنجامدا هاوڵاتییەک بریندار بووە.

 

ئەمڕۆ هەینی، 21ی ئابی 2020، سەرچاوەیەک لە ناوچەی برادۆست بە ناس کوردی ڕاگەیاند، تەقینەوەکە لە گەروی گوندی دایلا لە سنوری ناوچەی برادۆستی سەر بەقەزای سۆران ڕوویداوە، بەهۆیەوە 10سەربازی سوپای تورکیا کوژراون و بریندار بوونە و سەرجەمیان بە هێلیکۆپتەری سەربازی گواستراونەتەوە بۆ تورکیا.


ئەو سەرچاوەیە باسی لەوەشکرد کە "تائێستا بەتەواوی ڕوون نەبووەتەوە کە ئۆتۆمبێلەکە چۆن تەقیوەتەوە، بەڵام پێدەچێت بەهۆی دانانەوەی بۆمب لەلایەن گەریلاکانەوە ئۆتۆمبێلەکە تەقیبێتەوە."

 

هاوکات هەر ئەمڕۆ هەینی سەربازانی سوپای تورکیا تەقەیان کردوە و لە ئەنجامدا هاوڵاتیەکی خەڵکی گوندی شاپاوە برینداربووە و گواستراوەتەوە بۆ نەخۆشخانەی مێرگەسۆر.

 

ناس کورد پەیوەندیکرد بە ملا سەعید دایلایی موختاری گوندەکە بەڵام پەیوەندیەکەی بەردەست نەبوو.


هاوکات دیار دەنیز، وتەبێژی هێزەکانی پاراستنی گەل (HPG) باڵی سەربازی پەکەکە بە ناس کوردی ڕاگەیاند: "گەریلاکانی ئێمە بەردەوام چالاکی دژی سوپای تورکیا ئەنجامدەدەن، لەسەر چالاکیەکەی ئەمڕۆش تا ئێستا زانیاری تەواومان بەدەست نەگەیشتوە".

 

ئاماژەی بەوەشدا کە "پێشتر زۆرجار چالاکی لەو شێوەیەمان دژی سوپای تورکیا ئەنجامداوە."