گه‌ڕان

Shadow Shadow
سیاسه‌تی

داوایەکیش لە پەکەکە دەکات

بارزانی بۆچوونی خۆی لەسەر مستەفا کازمی دەربڕی

2020.08.16 - 10:23
App store icon Play store icon Play store icon
بارزانی بۆچوونی خۆی لەسەر مستەفا کازمی دەربڕی

ناس کورد-

مەسعود بارزانی، سەرۆکى پارتی دیموکراتی کوردستان بە بۆنەی 74مین ساڵیادی دامەزراندنی حزبەکەیەوە دەڵێت، مستەفا كازمیی سەرۆكوەزیرانی ئێستای عێراق تێگەییشتنی بۆ دۆزی گەلی كوردستان هەیە و داواش لە هێزە سیاسییەكانی كورد لە پارچەكانی تر دەکات كە "ڕەچاوی دۆخی هەرێمی كوردستان بكەن و نەبنە هۆی ئەوەی زیان لە هەرێمەکە بدرێت".

کەناڵی ناس کورد لە تێلیگرام جۆین بکە   

 

ئەمڕۆ یەکشەممە، 16ی ئابی 2020، مەسعود بارزانی دەڵێت، "ئەمساڵ یادی شازدەی ئاب لە كاتێكدا دەكەینەوە كە گەلەكەمان لە بەردەم تەحەددیات و كۆسپی گەورە دایە. ئێستا كوردستان لەگەڵ گرفتی ئابووری و تەندروستی و پیلانی جۆراوجۆری ناحەزاندا دەستوپەنجە نەرم دەكات. هەر ئەوەیشە وا دەكات ئەركی پارتی و سەركردایەتی و كەوادیر و ئەندام و لایەنگرانی پارتی لە هەموو كاتێك قورستر بێت."

 

دەشڵێت، "لەپێناو تێپەڕاندنی ئەو دۆخە دژوارەدا پێویستە كاربەردەست و كەوادیری پارتی لە ناو جەماوەر و لە ئاستی چاوەڕوانیی جەماوەردا بن و ببنە هۆكاری چارەسەركردنی گرفت و كێشەكانی خەڵك. پێویست دەكات هەموو پارتییەك ئەوە لە یاد نەكات كە بەرپرسیارێتیی سەرەكیی پاراستن و پێشخستنی هەرێمی كوردستان لەسەر شانی ئەوە و دەبێ لەپێناو كوردستانێكی بەهێزدا خۆی لە هەموو كەسێك زیاتر ماندوو بكات."

 

ئاماژەى بەوەشکردووە، "لەبارەی پەیوەندییەكانی نێوان هەولێر و بەغدایش، پارتی بە درێژایی تەمەنی خەباتی سیاسیی خۆی، خوازیاری دانوساندن و چارەسەركردنی كێشەكان بە شێوەیەكی ئاشتیانە و لێكتێگەییشتن بووە. لە ئێستایشدا جەخت لە پەیڕەوكردنی هەمان نەهج دەكەینەوە و هاوكات هەموو هەوڵ و تێكۆشانی پارتی بۆ ئەوە دەبێت كە لەگەڵ تێكۆشەر و نیشتیمانپەروەرانی تری كوردستان مافە دەستوورییەكانی گەلی كوردستان بچەسپێنێت و دژی هەموو بیرۆكە و عەقلییەتێك دەوەستێتەوە كە بیەوێ خەبات و قوربانیدانی گەلی كوردستان و شەراكەتی گەلی كورد لەناو دەوڵەتی عێراق پشتگوێ بخات. یانیش بیەوێ كیانی هەرێمی كوردستان كە بەرهەمی سەدساڵ خوێنی سەدانهەزار شەهید و فرمێسكی سەدانهەزار دایكە شەهیدە، لە مانا بەتاڵ بكاتەوە. باشیش دەزانین ئەوەی ئێستا هەیە بە هیچ شێوەیەك لە ئاست قوربانیدانی بێهەژمار و، خەون و ئاواتی سەربەخۆیی گەلەكەماندا نییە."

 

جەختیکردووەتەوە کە "بۆچوونی ئێمە لەگەڵ بەڕێز مستەفا كازمیی سەرۆك وەزیرانی ئێستای عێراق كە تێگەییشتنی بۆ دۆزی گەلی كوردستان هەیە، ئەو دەرفەتە هەیە كە كێشەكانی نێوان هەولێر و بەغدا لە چوارچێوەی دەستووردا چارەسەر بكرێت و هەردوولا بگەینە ئەنجامی باش. ئەو دەستوورەی كە ئەگەر وەك خۆی جێبەجێ كرا با ئێستا زۆرێك لەو گرفتانە نەدەبوون كە لە نێوان هەولێر و بەغدادا هەیە."

 

لە کۆتاییدا دەڵێت، "لێرەدا بە پێویستی دەزانم داوایش لە هێزە سیاسییەكانی كورد لە پارچەكانی تر بكەم كە ڕەچاوی دۆخی هەرێمی كوردستان بكەن و نەبنە هۆی ئەوەی زیان لە هەرێمی كوردستان بدرێت. چونكە چیتر خەڵكی هەرێمی كوردستان ناتوانن تەحەمولی زیان و بوردومان و كێشەی تر بكەن. هەرێمی كوردستان خۆی گرفت و كێشەی تری هەیە و بەرگەی زیان و ئازاری زیاتر ناگرێت. بۆیە داوا لە وڵاتانی دراوسێ و هێزە كوردییەكان دەكەین ڕێز لە سەروەریی هەرێمی كوردستان و عێراق بگرن و هەرێمی كوردستان نەكەنە گۆڕەپانی ململانێێی خۆیان."