گه‌ڕان

Shadow Shadow
سیاسه‌تی

هەوڵێکى ئەمریکا دژى ئێران لە ئەنجومەنى ئاسایش شکستیهێنا

2020.08.15 - 08:44
هەوڵێکى ئەمریکا دژى ئێران لە ئەنجومەنى ئاسایش شکستیهێنا

ناس کورد-

 

ئەمریکا شکستیهێنا لەهەوڵێکى بۆ درێژکردنەوەى ئەو وادەیەى نەتەوەیەکگرتووەکان سەپاندوویەتى بۆ قەدەغەکردنى فرۆشتنى چەک بە ئێران، لەکاتێکدا پۆتین پێشنیازى کۆبوونەوەیەکى لوتکەى کردووە بۆ دورخستنەوەى ئەگەرى پێکدادان و هەڵکشانى زیاترى دۆخەکە.

 

 

بەپێی ئاژانسى رۆیتەرز، لەکاتى دەنگدان لەسەر درێژکردنەوەى وادەکە لە ئەنجومەنى ئاسایش، روسیا و چین دژى درێژکردنەوەى دەنگیاندا، کە لە مانگى تشرینى یەکەمدا کۆتایی دێت بەپێی رێککەوتنى ساڵى 2015 ى نێوان ئێران و وڵاتە گەورەکان.

 

هەروەها 11 ئەندامى ئەنجومەنى ئاسایش دەنگیاننەدا کە لەناویاندا فەڕەنسا و ئەڵمانیا و بەریتانیا بوونى هەیە، تەنها ئەمریکا و کۆمارى دومینکان لەبەرژەوەندى پڕۆژە بڕیارى درێژکردنەوەى وادەکە دەنگیاندا.

 

چانغ جون باڵیۆزى چین لە نەتەوەیەکگرتووەکان لەبەیاننامەیەکدا ڕایگەیاند "ئەو ئەنجامە دەریدەخات کە رێوشوێنە تاکلایەنەکان پشتیوانیان نییە و شکستدەهێنن".

 

سەرەڕاى شکستهێنانى هەوڵەکە، ئەمریکا ئێستا دەتوانێت هەڕەشەکانى جێبەجێبکات بۆ دوبارە سەپاندنەوەى سەرجەم ئەو سزایانەى نەتەوەیەکگرتووەکان سەپاندویەتى بەسەر ئێراندا بەبەکارهێنانى بەندێکى رێککەوتنى ئەتۆمى، سەرەڕاى کشانەوەى ترەمپ لە رێککەوتنەکە لەساڵى 2018.

 

کیلى کرافت باڵیۆزى ئەمریکا لە نەتەوەیەکگرتووەکان لەبەیاننامەیەکدا وتى "ئەمریکا لەچەند رۆژى داهاتوودا بەڵێنەکانى جێبەجێدەکات لەو بارەیەوە".

 

بەوتەى دیبلۆماتکاران، هەنگاوى لەو شێوەیە رێککەوتنى ئەتۆمى روبەڕوى مەترسی گەورە دەکاتەوە، بەتایبەتى کە ئێران بەکردەیی رێککەوتنەکەى پێشێلکردووە وەک وەڵامدانەوە بۆ کشانەوەى ئەمریکا و سەپاندنى سزاى تاکلایەنە بەسەریدا.

 

مەجید تخت روانجى باڵیۆزى ئێران لە نەتەوەیەکگرتووەکان هۆشداریدایە ئەمریکا لە پەنابردن بۆ سەپاندنەوەى سزا بەسەر وڵاتەکەیدا.

 

وتیشى "ئێران بەتوندى بەرانبەر هەر هەنگاوێکى لەو شێوەیە دەوەستێتەوە و بژارەکان سنوردارنین لەو بارەیەوە".

 

لاى خۆیەوە، ڤلادیمێر پوتین سەرۆکى روسیا پێشنیازى بەستنى کۆبوونەوەیەکى لوتکەى کرد لەرێگەى ئینتەرنێتەوە لەگەڵ ئەمریکا و سەرجەم وڵاتانى دیکەى رێککەوتنى ئەتۆمى بۆ رێگرى لە رودانى بەرەنگابوونەوە و هەڵکشانى زیاترى دۆخەکە لەنەتەوەیەکگرتووەکان لەبارەى بارودۆخى ئێرانەوە.

 

لەبارەى بەشداریکردن لە لوتکەکە، دۆناڵد ترەمپ وتى "گوێبیستى شتێکى لەو شێوەیە بووین بەڵام بەفەرمى پێمان رانەگەیەنراوە". بەڵام کۆشکى سەرۆکایەتى فەڕەنسا ڕایگەیاند ئیمانوێل ماکرۆن بەشدارى دەکات.