گه‌ڕان

Shadow Shadow
سیاسه‌تی

داوا لە ئەنجومەنى ئاسایش دەکات کاردانەوەى بەپەلەی هەبێت

پەرلەمانی عەرەبی ’’پشتگیری هەر هەوڵێکی عێراق دەکەین لە دژی تورکیا’’

2020.08.12 - 12:51
پەرلەمانی عەرەبی ’’پشتگیری هەر هەوڵێکی عێراق دەکەین لە دژی تورکیا’’

ناس کورد-

سەرۆکى پەرلەمانى عەرەبی ئیدانەى بۆردومانەکەى تورکیاى کرد بۆ سەر ناحیەى سیدەکانى سەر بە پارێزگاى هەولێر، کە بەهۆیەوە چەند ئەفسەرێکی پاسەوانیی سنوری عێراق کوژران و داواش لە ئەنجومەنى ئاسایش دەکات بەپەلە بجوڵێت بۆ وەستانى هێرشەکان.

 

مشعەل فەهم، سەرۆکى پەرلەمانى عەرەبی ئەمڕۆ چوارشەممە لە بەیاننامەیەکدا ڕایگەیاند، "ئەو کردەوە دوژمنکارانە و پێشێلکارییە سەربازییە بەردەوامانە کە هێزەکانى تورکیا بۆ سەر خاکى عێراق ئەنجامى دەدەن، دوژمنکارییەکى مەترسیدارە بۆ سەر سەروەرى خاکى عێراق".

 

وتیشى، "ئەو کردەوانە پێشێلکارییەکى ڕوونى پەیماننامەى نەتەوە یەکگرتووەکان و یاسا و عورفە نێودەوڵەتییەکانە، هەروەها پێشیلکارییەکى ڕوونى بڕیارەکانى ئەنجومەنى ئاسایش و ڕێزنەگرتنى پەیوەندییەکانى وڵاتانى دراوسێیە".

 

سەرۆکى پەرلەمانى عەرەبی جەختیکردەوە "بەتەواوى لەگەڵ عێراق دەوەستین بۆ پارێزگارى لە ئاسایش و سەلامەتى هاوڵاتییانى و پشتیوانى هەر رێوشوێنێک دەکەین کە بۆ بەرگریکردن لەخۆى و بەرەنگاربوونەوەى هەر هێرشێک بۆ سەر خاکەکەى بیگرێتەبەر."

 

هەروەها ئامادەیی پەرلەمانى عەرەبی نیشاندا بۆ کارکردن لەگەڵ پەرلەمانى عێراق بۆ کۆکردنەوەى پشتیوانى هەرێمایەتى و نێودەوڵەتى بەمەبەستى وەستانى هێرشەکانى تورکیا بۆ سەر خاکى عێراق.

 

سەرۆکى پەرلەمانى عەرەبی داواى لە ئەنجومەنى ئاسایشى نێودەوڵەتى کردووە بەپەلە بجوڵێت بۆ وەستانى هێرشەکانى تورکیا بۆ سەر خاکى عێراق.

 

دوێنێ سێشەممە لەکاتێکدا هێزەکانى پاسەوانى سنورو پەکەکە لە کۆبوونەوەدا بوون لە سنورى ناحیەى سیدەکان بۆ قسەکردن لەسەر هێوکردنەوەى گرژییەکانى نێوانیان، فڕۆکەیەکى بێفڕۆکەوانى تورکیا شوێنەکەى بۆردومانکرد و بەهۆیەوە چەند ئەفسەرێکی پاسەوانیی سنوری عێراق کوژران.

 

بەهۆى هێرشەکەوە وەزارەتی دەرەوەى عێراق، سەردانە چاوەڕوانکراوەکەى وەزیرى بەرگرى تورکیاى بۆ بەغدا هەڵوەشاندەوە پێش چەند کاتژمێرێک لە ئەنجامدانى، هەروەها باڵیۆزى تورکیاى بانگهێشتکرد.