گه‌ڕان

Shadow Shadow
سیاسه‌تی

ڕاگەیەنراوێکی توڕە لە سوپای عێراقەوە لەبارەى بۆردومانەکەى تورکیا لە سیدەکان

2020.08.11 - 17:44
ڕاگەیەنراوێکی توڕە لە سوپای عێراقەوە لەبارەى بۆردومانەکەى تورکیا لە سیدەکان

ناس کورد-

تۆڕی ڕاگەیاندنی جەنگی سەر بە سوپای عێراق ڕایگەیاند، تورکیا لە ڕێگەی فڕۆکە بێفڕۆکەوانەوە "دەستدرێژیی کردووە و ئۆتۆمبێلێکی سەربازی سەر بە هێزەکانی پاسەوانی سنوری لە ناوچەى سیدەکان" کردووەتە ئامانج. 

 

ئەمڕۆ سێشەممە، 11ی ئابی 2020، تۆڕەکە لە ڕاگەیەنراوێکدا دەڵێت، لە بۆردومانەکەدا، محەمەد ڕەشید، فه‌رمانده‌ی لیوای 2ی پاسەوانی سنوور و فه‌رمانده‌ی فه‌وجی سێی پاسه‌وانی سنور، عه‌مید زوبێر حالی له‌ ئاكامی بۆردومانێكی توركیا شه‌هیدبوون".

 

پاشنیوەڕۆی ئەمڕۆ لە سنوری برادۆست ئۆتۆمبێلێکی پاسەوانی سنوری عێراق لەلایەن فڕۆکەکانی تورکیاوە کرایە ئامانج و بەڕێوەبەری ناحیەی سیدەکانیش دەڵێت، لەڕووداوەکەدا شەهید و بریندار هەیە و سەرجەمیان کوردن.  

  

ئیحسان چەلەبی، بەڕێوەبەری ناحیەی سیدەکان بە ناس کوردی ڕاگەیاند: "کاتژمێر 3:45 خولەکی ئەمڕۆ، ئۆتۆمبێلێکی هێزەکانی پاسەوانی سنوری عێراق لەسنوری چیای برادۆست لەلایەن فڕۆکەیەکی تورکیاوە کرایە ئامانج و بۆردومانکرا."  

  

وتیشی: "لەڕووداوەکەدا بەداخەوە شەهید و بریندار هەیە و سەرجەمیشیان کوردن."  

  

بەڕێوەبەری ناحیەی سیدەکان ئاماژەی بەوەشكرد: "چەند ڕۆژێکە ئەو هێزانە لەو ناوچەیەن و هاتوچۆ دەکەن بەمەبستی دانانی بنکە و خاڵی سەربازی، بەڵام ئەمڕۆ ئەو ڕووداوەی لێکەوتەوە."  

  

هاوکات دکتۆر کاروان فەیسەڵ، بەڕێوەبەری نەخۆشخانەى سیدەکان بە ناس کوردی وت، "دوا چارەکێکی تر تەرمەکان دەگەنە نەخۆشخانەکەیان و وەک ئەو دەڵێت، "پێنج شەهید هەن کە سیانیان پلەدارن."  

  

ئاماژەى بەوەشکردووە کە خەڵکێکی زۆر لە بەردەم نەخۆشخانە کۆبوونەتەوە بۆ پێشوازیکردنی لە تەرمەکان.  

  

دەربارەی ئەو ئەو هێزەی پاسەوانی سنوری عێراق بۆ کۆبوونەوە چوبێتن لەگەڵ پەکەکە، بەڕێوەبەری ناحیەی سیدەکان باسی لەوەکرد، هیچ زانیارییەکی لەوبارەیەوە نییە.