گه‌ڕان

Shadow Shadow
سیاسه‌تی

گۆڕان داوایەکى بەپەلە ئاڕاستەى حکومەت دەکات ’بێدەنگ و بێھەڵوێست نابین’

2020.08.11 - 15:03
گۆڕان داوایەکى بەپەلە ئاڕاستەى حکومەت دەکات ’بێدەنگ و بێھەڵوێست نابین’

ناس کورد-

بزوتنەوەى گۆڕان ڕایگەیاند، پێویستە دەستبەجێ حکومەتى هەرێم لایەنە پەیوەندیدارەکان بە ئەرکی خۆیان هەستن بۆ کۆتایی هێنان بەو یاسا شکێنی و قاچاخچێتیەى لە سنورەکاندا تەشەنەی کردووە و ئەوان لەو بارەیەوە بێهەڵوێست نابن.

 

وتەبێژى بزوتنەوەى گۆڕان لە ڕاگەیەنراوێکى رۆژنامەنوسیدا ڕایگەیاند "ژیانی موچەخۆران و ھاوڵاتیانی ھەرێمی کوردستان لە ئاستێکی خراپدایە، بەڵام لەبری ھەنگاونانی خێرا بۆ چاکسازی و چارەسەری کێشەی موچە، کەچی قەبارەی گەندەڵی و قاچاخچێتی بە ئەندازەیەکی مەترسیدار زیادی کردووە".

 

ئاماژەى بەوەشکردووە"بەشداری بزوتنەوەی گۆڕان لە حکومەت تەنها لەپێناو چاکسازی و ڕێگریکردن لە گەندەڵی و قاچاخچێتی بووە، بەدڵنیاییەوە ئێمە نەک نابینە پاسەوانی ئەم بەد ڕەفتاری و کارە نایاساییانە، بەڵکو بەھەموو توانایەکمان ڕووبەڕووی دەبینەوەو بێدەنگ و بێھەڵوێست نابین".

 

"ئێستا سەرباری گەندەڵی و قۆرخکاری کۆمپانیاکانی نزیک لە حیزب، کەچی بەشێک لە بەرپرسان بەھاوکاری دامەزراوە ئەمنیەکان، سەرقاڵی قاچاخچێتی مەترسیدارن و بە ئاشکرا لە بازاڕدا نوسینگەی قاچاخیان داناوەو ھەموو کاڵایەکی قەدەغەکراو بەبێ ھیچ پشکنینێک دەھێننە کوردستانەوە، کە ئەمەش جگە لە یاسا شکێنی و گەندەڵی، مەترسیشە لەسەر تەندروستی ھاوڵاتیان"، وتەبێژى گۆڕان وایوتووە.

 

وتەبێژى گۆڕان جەختیکردووەتەوە، گۆڕان پێداگیری دەکات لە سەر چاکسازی لە دۆسیەی نەوت و خاڵی سنوری و باج و سیستەمی موچە.

 

ئەوەشى خستوەتەڕوو"پێویستە دەستبەجێ سەرۆکی حکومەت و جێگری سەرۆکی حکومەت و هەموو کابینە و هەردوو حزب و لایەنە پەیوەندیدارەکان بە ئەرکی خۆیان هەستن بۆ کۆتایی هێنان بەم یاسا شکێنی و قاچاخچێتیە کە لە سنورەکاندا تەشەنەی کردوەو بوەتە هۆی بەهەدەردانی مانگانەی دەیان ملیۆن دۆلاری داهاتی هەرێم".