ناس کورد-
ئەنجومەنى باڵاى دادوەرى عێراق نوسراوێکى ئاڕاستەى دادگاکانى پێداچونەوەى فیدراڵى کرد لەبارەى تۆمارکردنى سکاڵا دژى رۆژنامەنوسان و داوادەکات پەلە نەکەن لە دەرکردنى فەرمانى دەستگیرکردنى رۆژنامەنوسان.
کەناڵی ناس کورد لە تێلیگرام جۆین بکە
بەپێی نوسراوێکى ئەنجومەنەکە کە ئەمڕۆ سێشەممە ئاڕاستەى دادگاکانى کردووە و وێنەیەکى دەست ناس کورد کەوتووە ئاماژە بەوەکراوە، لەسەر بنەماى بەندى دووەمى ماددەى 38 ى دەستور کە باس لە ئازادى رۆژنامەوانى و چاپ و بڵاوکردنەوە دەکات، پێویستە دادگاکان بەوردییەوە مامەڵە لەگەڵ ئەو سکاڵایانە بکەن کە دژى رۆژنامەنوسان تۆماردەکرێن.
هەروەها ئاماژەى بەوەکردووە ناچارکردنى رۆژنامەنوسان بۆ ئامادەبونیان لەبەردەم دادگا پێویستە بەپێی رێوشوێنە یاساییەکان بێت و نوسراوى تایبەت بە ئامادەبوونى لەبەردەم دادگا ئاڕاستەى بکرێت.
هەر بەپێی نوسراوەکە، پێویستە دادگاکان پەلە نەکەن لە دەرکردنى فەرمانى دەستگیرکردن بۆ رۆژنامەنوسان تەنها لەسەر بنەماى تۆمارکردنى سکاڵا لەسەریان.
