گه‌ڕان

Shadow Shadow
سیاسه‌تی

وردەکارى شەڕو ئاڵۆزییەکانى پەکەکە و پاسەوانی سنور لە برادۆست

2020.08.11 - 13:11
وردەکارى شەڕو ئاڵۆزییەکانى پەکەکە و پاسەوانی سنور لە برادۆست

ناس کورد- ئاکۆ حەمەد رابی

ئەمڕۆ (سێشەممە، 11ی ئابی 2020) لەکاتێکدا کە هێزەکانی پاسەوانی سنور-عێراق (IBP) لە ناوچە سنوریەکانی  برادۆست ویستویانە چەند خاڵێکی سەربازی نوێ دابنێن، شەڕ و گرژى لەنێوان ئەو هێزە و  گەریلاکانی پارتی کرێکارانی کوردستان (پەکەکە) دروستدەبێت و لە ئەنجامدا شوانێک لەو ناوچەیە دەبێتە قوربانى.

 

شەوکەت برادۆستی لە ناحیەی سیدەکان بەناس کوردی ڕاگەیاند، ئەمڕۆ هێزەکانی پاسەوانی سنور ویستیان ڕەبایەو چەند خاڵێکی نوێی سەربازی لەسنوری سیدەکان دابنێن، ئەم کارەش نیگەرانی و ناڕەزایەتی پەکەکەی لێکەوتەوەو شەڕ لەنێوان هێزێکی پەکەکەو پاسەوانی سنور ڕویدا.

 

ئاماژەی بەوەشدا ، بەهۆی شەڕەکەوە شوانێکى ناوچەکە بریندار بووەو گواستراوەتەوە بۆ نەخۆشخانەی سۆران و فیشەکێک بەر قاچی کەوتوە.

 

برادۆستی ڕونیکردەوە :"ئێستا دۆخەکە تاڕادەیەک ئاسایی بۆتەوە بەڵام کێشەکەیان وەک خۆی ماوەتەوە".

 

لەلایەکی ترەوە سەرچاوەیەکی ئاگادارو نزیک لە ڕووداوەکە بە ناس کوردی ڕاگەیاند: " ئەو جێگایەی‌ کە هێزەکانی پاسەوانی سنور دەیانەوێت ڕەبایەو بارەگای سەربازی تێدا دابنێن، ماوەیەکی زۆرە گەریلاکانی پەکەکە لەو جێگایەن، بۆیە ئەو جێگایە سەبارەت بە پەکەکە گرنگە و بۆیەش نیگەرانن لەو هەنگاوە و بەم کارە ڕازی نین بۆیەش تەقەیان بەسەر هێزەکەدا کردوە.

 

وتیشی، ئەو جێگایە دوو گەرون لە ناوچەی برادۆست و پەکەکە نایەوێت هیچ هێزێک لەوێ بارەگای هەبێت.

 

ئەو سەرچاوەیە ئاماژەی بەوەشدا کە، پەکەکە زیاتر لەوە نیگەران و توڕە بووە کە پاسەوانی سنور بێ پرس هەوڵیداوە خاڵی سەربازی دابنێت.

 

باسی لەوەشکرد کە، ئێستا هەرچەندە هەردوو لایان بەرامبەر یەکترن، بەڵام هەوڵێک هەیە کە پێکەوە دابنیشن و لەو بارەیەوە گفتوگۆ بکەن.

 

هاوکات بە پێی ئەو زانیاریانەی کە دەست ناس کورد کەوتوە، پاسەوانی سنوری حکومەتی عێراق هێزێکی زۆری ڕەوانەی سنوری برادۆست کردووە.

 

ناس کورد هەوڵیدا لێدوان و زانیاری لەبارەی کێشەو ڕوداوەکەوە لە بەرپرسانی پارتی کرێکارانی کوردستان (پەکەکە)ەو هێزەکانی پاسەوانی سنور وەربگرێت، بەڵام وەڵامیان نەبوو.

 

ناوچەی برادۆست،سنورێکی بەرفراوانی هەرێمی کوردستانەو لەڕوی کارگێڕیەوە سەر بە قەزای سۆرانە لە پارێزگای هەولێر. ناوچەکە سێگۆشەی‌ سنوری نێوان عێراق و تورکیاو ئێرانە.